.
04:30 PM - 28/11/2025
چەخماخ لێدە ، چراکەم هەڵنەکردووە...
رووناکیەکەم ئێوە خۆش، کاریشمان تەمام بووە...
نیوە دێری یەکەمی ئەم شیعرە کوردیە هەرچەندە بۆ کۆری گۆرانی دڵداری ووتراوە، بەڵام دەلالەتێکە کە چرا یادو یادگارێکی زۆری لەگەل ئەم میلەتە بەش مەینەتەی ئێمەدا هەیە و هەر ئەبێت لێمان نەبرێت تا قامی قیامەت.
ئەگەر مێژووی خەباتی رزگاری خوازی گەلی کوردستان تەماشابکەین ئەوا ئەبینین رەنگەجیاوازەکان و چینە جیاوازەکانی کۆمەڵگەی کوردی هەمیشە لە ریزی قوربانیدانان و خوێن بەخشین و گیانبازیدا بوون، ئەوە ئەم گەلەیە کە ماندوە و قوربانیداوە بۆیە دەستکەوتێکیش کە هاتبێتە دی بەری رەنجی هەژار وجووتیار و کرێکار و مامۆستا و ئەندازیار و خۆێندەوار و نەخوێندەواری ئەم میلەتەیە.
سەرکردایەتی کردن بەوە ناکرێت پێشکەوتن و سەقامگیری بکرێت بە موڵکی یەک لایەن و لەناو لایەنێکیشدا بە هی کەسێک و کاتی لێکەوتن بەرکەوتن و دوژمنکاریش سیاسەتی تەخوین کردن و تۆمەت بەخشینەوە بە لایەنەکانی دیکە و پاساو هێناونەوە بۆ خۆدەربازکردن بکرێت بە سیاسەتی کارکردن. ئەم فۆرمە لە سیاسەت کردن مۆدێلێکە ماوەی بەسەرچووە یان وەک ئێژن ئێکسپایەربووە و بە کوردی خۆمان بۆگەنی کردوە. ئەوەی بۆ کورد پێویستە لەئێستادا رووناکی وئاوەدانی و سەقامگیری نێو مالی خۆیەتی، ناحەقیەکی گەورەتان کرد کاتێک دەیان و سەدان پرۆژەو خزمەتگوزاری حکومەتتان کرد بە موڵکی تاکە کەسی لە کاتێکدا ئەو حکومەتە جێگری سەرۆکەکەی رەمزێکی یەکێتی یە و کۆمەڵێک لە وەزارەتەکانی پشکی یەکێتین، وە ئێستاش ناحەقیەکی گەورەتر ئەکەن کە پێشهاتێکی خراپ دێتە پێش و پرۆژەی رووناکی تووشی ئیفلجبوون ئەکا ئەم بەڵایە ئەتلێنن بەسەر ئەم نیشتیمانەدا لە کاتێکدا ئەمە شەرێکی ناوچەییە و ئێستا لەهەموو کات زیاتر بۆ کورد واباشە دەستمان لە دەستی یەکدا بێت. ئەوەی ئێستا و داهاتووی کورد پێویستی پێیەتی سیاسەتی تاکە کەسی و تاکە حزبی دادی نادا و بەرەو هەلدێرێکی دیکەمان ئەبات و ئەوکات تەخوینکردنیش چارەتان ناکات و کورد وەتەنی رێسەکە ئەکەنەوە بەخوری و ئەیدەنە دەستی میللەتەوە و ئەڵێن کاری ئێمە تەواو بوو.
بۆیە بە پێویستی دەزانم نەک تەنها وەک کادرێکی یەکێتی نیشتیمانی بەڵکو بەرلەوە وەک کوردێکی نیشتیمانی بڵێم سیاسەت لە پیاوانی گەورەی ئەم میلەتەوە فێربن و ئاورێک لە مێژوو بدەنەوە ئەوەی ئەیووت (چەپکە گووڵەکە) ئامانجی چەپکێک بوو لە رەنگی جیاواز و دەنگی جیاواز و بیری جیاواز و لە هەمووشی گرنگتر ئەوەیە پێویستە فەلسەفەی چەپکە گووڵەکە فێربن تا پێکەوەبوون فێربن و قبووڵکردنی بەرامبەر فێربن وە بزانن کە جوانی و چاکە تەنها بۆ ئێوە نیە و ناشرینی بۆ ئێمە، خۆشی و خۆشگوزەرانی بۆ ئێوە و مەینەتی و خەبات و شەهیدبوونیش بۆ ئەم میللەتە. بۆ ئێوەو بۆ ئێمەو بۆ هاورێکانی دیکەمان لە چەپکە گوڵەکەوە پێویستە هەموومان فێربین، پێکەوەبوونمان وەک چەپکێک لە رەنگی جیاواز ئاڵای ئەم کوردستانە ئەنەخشێنێ.
لە تۆڕە کۆمەڵایەتیەکان شەیری بکە
