كۆمەڵەی  وڵاتانی جی حەوت، داوای وەستاندنی دەستبەجێی هێرشەكان بۆ سەر دانیشتووان و ژێرخانی مەدەنی لە رۆژهەڵاتی ناوەڕاست دەكەن.

وەزیرانی دەرەوەی وڵاتانی جی حەوت، دوای كۆبوونەوەكەیان لە فەرەنسا، راگەیەندراوێكی هاوبەشیان بڵاوكردەوە‌و تێیدا داوای وەستاندنی دەستبەجێی هێرشەكان بۆ سەر هاووڵاتیان و ژێرخانی مەدەنی لە تەواوی رۆژهەڵاتی ناوەڕاست و سەرجەم بەرەكانی جەنگ كرد.

تەئكیدیشیان لە گرنگی كردنەوەی هاتوچۆ لە گەرووی هوورمز بە شێوەیەكی هەمیشەیی كردەوە و رایانگەیاند،پێویستە لە ڕێگەی دیبلۆماسییەوە چارەسەری گرژییەكانی نێوان ئەمریكا و ئێران بكرێت بۆ  رێگریكردن لە فراوانبوونی شەڕ.

لە ڕاگەیاندراوی وەزیرانی دەرەوەی جی حەوتدا ئاماژە بەوەشكراوە، بەهۆی وەستانی هاتوچۆ لە گەرووی هوورمز و بەرزبوونەوەی نرخی وزە، كۆمەڵەی حەوت رەزامەندی دەربڕیووە لەسەر بەكارهێنانی یەدەگی ستراتیژی نەوت بۆ هێوركردنەوەی بازاڕەكان.

ئەمش لە كاتێكدایە بەهۆی داخستنی گەرووی هورمز لەلایەن سوپای پاسداران و رێگەنەدان بە تێپەڕبوونی ئەو كەشتیانەی سەر بە ئەمریكا و ئیسرائیل و ئەو وڵاتانەن كە پشتگیری لە شەڕ دەكەن، وایكردووە نرخی یەك بەرمیل نەوت بەرێژەیەكی بەرچاو بەرزببێتەوە‌و 110 دۆلار تێپەڕێنێت، ئەمەش بووەتە هۆی دروستبوونی قەیرانی وزە‌و بەرزبوونەوەی ڕێژەی هەڵاوسان.