.
05:27 PM - 19/10/2025
ئەحمەد شەرع سەرۆك كۆماری سوریا بۆ قۆناغی راگوزەر ، داوای لە ڤلادیمێر پوتین سەرۆكی روسیا كردووە، بەشار ئەسەد سەرۆكی پێشووی سوریای تەسلیمبكاتەوە.
میدیاكانی سوریا لەزاری ئەشهەد سەلیبی جێگری بەڕێوەبەری وەزارەتی روسیا و ئەوروپای رۆژهەڵات لەوەزارەتی دەرەوە و تاراوگەنشینی سوریا رایانگەیاندووە، ئەحمەد شەرع لەمیانی دیدارەكەیدا لەگەڵ ڤلادیمێر پوتین بەڕوونی داوای تەسلیمكردنەوەی بەشار ئەسەدی كردووە، بەپێی وتەی ئەو لێپرسراوە،لایەنی روسی تێگەیشتنێكی روونی لەگرنگی بەدیهێنانی دادپەروەری لەسوریا نیشانداوە و ئاماژەی بەوەكردووە، دیمەشق خەریكە سیاسەتی دەرەوەی خۆی بەپێی بەرژەوەندییە نیشتمانییەكانی خۆی دادەڕێژێتەوە و كاردەكات بۆ چەسپاندنی پەیوەندییەكانی لەگەڵ سەرجەم وڵاتان و كۆمەڵگەی نێودەوڵەتی.
روونیشیكردەوە، گفتوگۆكانی نێوان هەردوولا بریتی بوون لەدانانی میكانیزمی یاسایی نوێ بۆ هاریكاری لەسەر داواكراوان و دۆسیە هەڵپەسێردراوەكان، هەروەها بەردەوامی هەماهەنگی لەگەڵ مۆسكۆ لەئەنجوومەنی ئاسایش و نەتەوە یەكگرتووەكان بۆ بەرزكردنەوەی ئاستی ئامادەیی سوریا و پاڵپشتیكردنی بەرژەوەندییە ستراتیژییەكان.
هەفتەی رابردوو ئەحمەد شەرع بەسەردانێكی رەسمی گەیشتە مۆسكۆی پایتەختی روسیا و لەگەڵ ڤلادیمێر پوتین هاوتا روسیەكەی كۆبووەوە و تاوتوێی ئەو پرسە دووقۆڵییانەی كە جێگای نیگەرانی هاوبەشن..
لە تۆڕە کۆمەڵایەتیەکان شەیری بکە
