.
10:09 AM - 30/08/2025
مەسعود پزیشكیان سەرۆك كۆماری ئێران بە توندی گەڕاندنەوەی سزاكانی ساڵی 2015ی بۆسەر وڵاتەكەی رەتدەكاتەوە و دەڵێت، سزاكان سەرچاوەی سەرەكی سەختییەكانی ئێرانە.
مەسعود پزیشكیان سەرۆككۆماری ئێران، لەچاوپێكەوتنێكی تەلەفزیۆنیدا رایگەیاند، گەڕانەوەی سزاكان لە ئەگەری پابەند نەبوون بە رێككەوتنی پێنج كۆ یەك رەتدەكەینەوە. ڕاشیگەیاند، كاتێك ئەوروپییەكان خۆیان زۆرێك لە یاساكان پێشێل دەكەن، بانگەشەی ئەوە دەكەن كە ئێران رێزی لە رێككەوتنەكە نەگرتووە.
وتیشی، زۆربەی كێشەكانی ئێران بەهۆی سزاكانەوەیە. سەبارەت بە ئەگەری دووبارەبوونەوەی شەڕ لە دژی وڵاتەكەی، پزیشكیان وتی، بەدوای شەڕدا ناگەڕێن، بەڵام ئەگەر بیانەوێت داگیركاری بكەن، ئەوا رووبەڕوویان دەبنەوە و لە شەڕ ناترسن، چونكە پێشتر گەلی ئیران سەلماندوویەتی ئەگەر شەڕ هەڵگیرسێت، یەكگرتوویی و یەكڕیزی ناوخۆیی زۆر بەهێزتر دەبێت.
قسەكانی پزیشكیان لەكاتێكدایە، وڵاتانی بەریتانیا، فەڕەنسا و ئەڵمانیا لە دوای جەنگی 12 رۆژەی نێوان ئیسرائیل و ئێران، دووجار لەگەڵ تاران كۆبوونەتەوە و پرسی بەرنامە ئەتۆمییەكەیان تاوتوێ كردووە و مانگێك مۆڵەتیان بە ئێران داوە پابەندی رێككەوتنی 2015ـی نێوان وڵاتانی پێنج كۆ یەك بێت، لە ئەگەری پابەند نەبوونیش، سزاكانی سەر ئێران چالاك دەكەنەوە، كە بە سناپباك ناسراوە.
لە تۆڕە کۆمەڵایەتیەکان شەیری بکە
