.
09:57 PM - 31/08/2025
پارتی دیموكراسی و یەكسانی گەلان دەم پارتی، پەیامی عەبدوڵا ئۆجەلان، رێبەری زیندانیكراوی پارتی كرێكارانی كوردستانی "پەكەكە"ی بەبۆنەی رۆژی جیهانیی ئاشتی بڵاوكردەوە و لە پەیامەكەیدا هاتووە، بانگەوازی ئاشتی و چارەسەریی دیموكراسی، هەڵمەتێكی سیاسیی ئاسایی نییە، بەڵكو هەنگاوێكی ستراتیجی و وەرچەرخانێكی مێژووییە. ئەوەشهاتووە، بانگەوازەكە، دەرگای بەڕووی قۆناغێكی نوێدا كردووەتەوە، كە تێیدا ژیانێكی دیموكراسییانەی پشت ئەستوور بە ئاشتی، جێگەی شەڕ و داڕووخان لە توركیا و رۆژهەڵاتی ناوەڕاستدا دەگرێتەوە.
عەبدوڵا ئۆجەلان پێی وایە، قۆناغی نوێ تەنیا هیوا و ئومێدێك نییە، بەڵكو راستییەكی بەرجەستەیە، كە پێویستە بە توانایەكی بەهێز و هەنگاوی كردەیی جددی، بونیادبنرێت. جگە لەوەی داوای هەنگاوی كردەیی كردووە بۆ پرۆسەكە، راشیگەیاندووە، ئاشتیی راستەقینە تەنیا بریتیی نییە لە بێدەنگكردنی چەك و كۆتاییهێنان بە شەڕ، ئاشتیی راستەقینە بەوە دێتەدی، دیموكراسی، ئازادی و دادپەروەریی كۆمەڵایەتی لە سەرجەم كایەكانی ژیاندا رەنگبدەنەوە و ببینرێن، ئەو گۆڕانكارییە كۆمەڵایەتییەش، تەنیا مافێك نییە بۆ گەلەكەمان، بەڵكو لە هەمانكاتدا، ئەركی سەرەكیی قۆناغی نوێیە.
هاوكات عەبدوڵا ئۆجەلان داوای لە گەلی كورد كردووە، خاوەندارێتیی لە ئەركە مێژووییەكەی سەرشانی بكات و خەباتی ئازادی و ئاشتی فراوان و گەورەتر بكات. وە لە كۆتایی پەیامەكەیدا نووسیویەتی، "بڕوام بەوە هەیە، هەمووان لە جددییەتی قۆناغەكە تێدەگەن و بە خۆیاندا دەچنەوە، بە جۆرێكیش رەفتار دەكەن، لەگەڵ رۆحی ئاشتیدا بگونجێت".
لە تۆڕە کۆمەڵایەتیەکان شەیری بکە
