.
10:04 AM - 30/08/2025
وەزارەتی بازرگانیی عیراق، رۆژی دووشەممە یەكی ئەیلولی 2025ی وەك دوایین وادە دیاری كرد بۆ نوێكردنەوەی فۆرمی ئەلیكترۆنیی بەشەخۆراكی هاووڵاتیان.
محەممەد حەنوون وتەبێژی وەزارەتی بازرگانیی عیراق رایگەیاند: ژمارەی ئەو كەسانەی كە فۆرمی بەشەخۆراكی ئەلیكترۆنییان نوێ كردووەتەوە گەیشتووەتە 37 ملیۆن هاوڵاتی لە ناوخۆی عیراق، هاوكات یەكی ئەیلول وەك دوایین وادەی تەواوكردنی پرۆسەی نوێكردنەوە دانراوە. بەوتەی محەممەد حەنوون، رێژەی ئەوانەی كارتی بەشەخۆراكی خۆیان لە هەرێمی كوردستان نوێكردووەتەوە گەیشتووەتە سەدا 85، بەجۆرێك لە هەڵەبجە سەدا 89، هەولێر سەدا 87، سلێمانی سەدا 86و لە دهۆك سەدا 82، بەمەش كۆی ئەو كەسانەی داتاكانیان نوێكردووەتەوە لە هەرێمی كوردستان گەیشتووەتە زیاتر لە چوار ملیۆن و 601 هەزار هاووڵاتی.
چەند مانگێكە پرۆسەی بەئەلیكترۆنیكردنی فۆرمی خۆراك لە هەرێمی كوردستان و پارێزگاكانی تری عیراق دەستپێكردووە، دوایین وادەش بۆ پڕكردنەوەی فۆرمەكە ڕۆژی دووشەممەی داهاتووە كە دەكاتە یەكی ئەیلولی 2025 .
لە تۆڕە کۆمەڵایەتیەکان شەیری بکە
