.

05:07 PM - 22/08/2025

چارەسەری گرێی پیس (شێرپەنجە)، هەر لابردنە  

بارزان شێخ عوسمان  

هەرچەندە ناونیشانی بابەتەكە پزیشكیی و زانستییە، بەڵام لە جیهانی سیاسەتیشدا بۆ هەندێك مەسەلە بەكاردێت . 

وەك لەزاری پزیشكەكانەوە بیستومانە  گرێ دروست بوون لە جەستەی مرۆڤدا دوجۆرە یەكەمیان بێ زیانە كە پێی دەڵێن  (benign ) ئەوەی تریان زیان بەخشە ( malignant cance) . بە كورتی خانە شێرپەنجەییەكان تا بمێننەوە لە جەستەدا زیان و پەلاماردانەكانیان زیاتر دەبێت. لە ژیانی حزبییشدا، دیاردەكانی ململانێی توندوتیژی ناوخۆی حزب، ناعەدالەتیی، دەستەگەریی بەهەموو جۆرەكانییەوە،  گەندەڵیی  و تاكڕەویی،  هەمان خەسڵەت و لێكەوتەیان هەیە و دەبنە شێرپەنجەی ناو ئەو  حزب ورێكخراوەدا. ئەوەی  بەرەبەیانی 22ی ئابی 2025 روویدا لە هۆتێل لالەزاری  پێشوو  هەمان ناولێنانی بۆ گونجاوە، چونكە  ئەو جێگەیە بووبووە ئەو خانە شێرپەنجەییەی كە لە جەستەی  یەكێتیی نیشتمانیی كوردستاندا دروست بووبوو كە خەریكبوو بەتەواوی بڵاو ببێتەوە  سلێمانیش بگرێتەوە.  
هەر زوو كە ناكۆكییەكە دروستبوو، واتە لە 8ی تەموزی 2021،  دەبوایە بە جۆرێكی تر چارەسەر بكرایە تا ئەو گرێ وگۆڵ و كۆسپ و كێشانە دروست نەبوونایە، (لەو كاتەدا قسەی خۆم لای كەسانی دڵسۆز كردووە). 

هەرچەندە بەندە دژی هەموو رێگە چارەیەكی توندوتیژ، قسەی زبر، پیاهەڵشاخاندن، سوكایەتیی، ناوزڕاندن و جنێودانم لە هەر كێشەیەكدا، نەخوازەڵا كوشتن و خوێنڕشتن، بەڵام رووداوەكەی  لالەزار  پێویستییەكی لە دوانەخراو بوو، رێگرتن بوو لە پەرەسەندنی خراپتر،  لەگەڵ ئەوەی  زۆر لە نزیكەوە كاك شێخ لاهورم دەناسی و رێزی یەكترمان زۆر گرتووە، بەڵام هەر لەسەرەتاوە دژی ئەو هەنگاوانەی بووم كە دەینا چ پێش 8ی تەموز، چ دواتریش.

 لە ئاست ئەمەی شەوی رابردوو یا بەرەبەیانی ئەمڕۆ، دەیتوانی  رێگە راستەكە هەڵبژێرێت تا بەرپرسیاری رژاندنی خوێنی كەس نەبێت و ئۆباڵی ترساندنی خەڵك و زیان گەیاندن بە ماڵ و حاڵی خەڵك نەكەوێتە ئەستۆی، كەچی بە داخەوە وەك لە گرتە ڤیدیۆییەكەیدا لەسەربانی بارەگاكەیەوە رایگەیاندووە بە نیازی شەڕ و كوشتار بووە. بە داخەوە دوور نەڕوانینەكەی كاك شێخ لاهور ئەوەی  بەدوادا هات كە خوێنی چەند مرۆڤێك بڕژێت، پێش هەموو شتێك درود بۆ گیانی قوربانییەكان لە هەر لایەك  بن ، داوای هەرچی زوتر باش بوونەوەش بۆ بریندارەكان دەكەم، بەڵام ئەوەی كە پێویست بوو بۆ لابردنی ئەو گرێیەی جەستەی شاری سلێمانی كراوە، كە سەرەتا لە رێگەی قانون و دادگاوە بووە دواتر لە ناچاریدا پەنا براوە بۆ بژاردەی چەك. بەراستی نەدەكرا ئەو هێزە چەكدارەی لالەزاری كردبووە حەشارگە، بە ئیدعای  پاراستنی سیمبولی سەرۆك مام جەلال سۆزی لایەنگر و ئەندامانی یەكێتی رابكێشێت و هەروا لێگەڕێن  بمێنێتەوە ، لەولاشەوە بە ئارەزوی خۆی و  بێ سڵكردنەوە  و بێ لێپرسینەوە ئەوەی پێی دەكرێت دەست لە یەكێتی بوەشێنێت و ببێتە مایەی سەرئێشەی ئەمنییش لە سلێمانیدا.  حكومەت و یەكیتیش لە ئاستیدا هەر دەستەوەسانبن و شیرو تیر لەیەكتر بسوون. بەڕاستیی هێزی چەكدار  لە هەرێمی كوردستان تەنانەت لە عیراقی فیدراڵیشدا كە لە نێو  هێزە چەكدارەكان (پێشمەرگە، ئاسایش، دژە  تێرۆر  و ….هتد )  ی سەربە حكومەتدا رێك نەخرابێت، دەبێتە میلیشیا و مل كەچی هیچ قانون و پرەنسیب و بنەمایەكی حوكمداریی نابێت، دەبێتە هێزێكی مافیا و تێرۆریست .

ئێستا گرێ خراپەكە لابراوە، بەڵام  دەبێت لە هەر كات زیاتر بە وریاییەوە مامەڵە بكرێت لەگەڵ لێكەوتە و دەرهاویشتەكاندا . 

هەندێك ناوەند لە دڵسۆزییان روانینی خۆیان دەخەنە رو دەبێت یەكێتی بە هەندیان وەربگرێت، هەندێك ئەركی قانونیی، ئیداریی، پیشەیی و مرۆیی خۆیانە پەیامەكانیان دەخەنەڕ و دەبێت یەكێتی لێیان تێ بگات (تفهوم) یان بكات، ئەوانیتریش وەك رەفتاری هەمیشەییان هەر دەگەڕێن بە دوای خاڵێكدا لە دژی یەكێتی بەكاری بهێنن و چەند رۆژێك بیكەنە هەڵڵا و تانە لێدان، دەبێت لەوەشدا یەكێتی هەر دان بە خۆدا بگرێت، تا راستییەكان بە تەواوی روون دەبنەوە .

بە كورتی سەرباری داخ و ئەفسوس بۆ ئەو قوربانیانە، كە بەرپرسیارتییەكەی دەكەوێتە ملی  ئەو كەسانەی سەركێشان كرد و شەڕیان هەڵبژارد، پڕۆسەكە هەنگاوێكی راست بوو، كۆتایی هات بە دوودڵیی و دردۆنگی هەندێك بەرامبەر رەوتی هەڵوێست و رووداوەكان، چیتر ناوترێت لالەزاریش بەشێكە   لە یەكێتی، ئیتر بیانووش نامێنێت بۆ فەرامۆش كردنی كەلێنە ئەمنییەكان كە پێشتر دەوترا ئەوە كەتنی گروپی لالەزارە، ئیدی لالە زاریش ناوە رەسەنەكەی كە باخچەی پڕ لە گوڵ و گوڵزارە دەگەڕێتەوە بۆ جاری جاران، نەك  حەشارگەی كەرەسەی نەفرەتیی و بێزراوی كوشتن و بڕینی وەك (درۆن، بیكەسی، دۆشكە)، دەبێتەوە بە شوێنێكی گەشتیاری نەك مەشقی چەك و لێدان و نیشانە شكێنی و عەنتریات .