ئەمڕۆ رۆژی زمانی شیرینی كوردییە، كە  بەرامبەرە لەگەڵ 15ی ئایار و لەم رۆژەدا و لە 15ی ئایاری ساڵی 1932، گۆڤاری هاوار بۆ یەكەمجار لە دیمەشق، پایتەختی سوریا، لەسەر دەستی میر جەلادەت بەدرخان دەرچوو.گۆڤاری هاوار لەو سەردەمەدا تەنها زمانی كوردی نەپاراست، بەڵكو  دەروازەیەكیشی   بەڕووی زمان و رۆشنبیریی كوردیدا كردەوە.زمانی كوردی ملیۆنێك و 220 هەزار وشە لەخۆدەگرێت، هاوكات دوای زمانی كۆری ، زمانی كوردی بە دەوڵەمەندترین زمان دادەنرێت لە رووی وشەسازی و دەستەواژەوە.
سەرەڕای بەربەستە جیاواز و جۆراوجۆرەكانی بەردەم زمانی كوردی لەبەشە جیاوازەكانی كوردستان، بەڵام دۆخی زمانی كوردی پاشەكشەی نەكردووە و نەبووەتە هۆی ئەوەی مەترسیی لەناوچوونی لەسەر بێت.لە باكووری كوردستان زیاتر لە 20 ملیۆن كورد دەژین و كێشەی كوردیش لە توركیا فرە رەهەندە و لە پاڵ كێشەی ناسنامە، ئەمنی، سیاسیی، ئابووری و فەرهەنگی، كێشەی قەدەغەكردنی زمانی كوردی یەكێكە لە كێشە سەرەكییەكان، زمانی كوردی لە دوای توركی دووەمین زمانە زۆرترین كەس قسەی پێدەكەن. ئێستا زمانی كوردی بە گوێرەی دەستووری ساڵی 2005ی عیراق زمانی رەسمییە  و لەماددەی نۆدا هاتووە، زمانی عەرەبی و كوردی دوو زمانی رەسمی  عیراقن.
سەبارەت بە رۆژهەڵاتی كوردستان، جیاواز لە توركیا،لە دەستووری ئێراندا زمانی رەسمی فارسییە، بەڵام بەكارهێنانی زمانی ناوخۆیی و نەتەوەیی لە چاپەمەنی و ڕاگەیاندنی گشتیدا و فێركردنی ئەدەبیاتەكەیان لە خوێندنگاكاندا، شانبەشانی زمانی فارسی، رێگەپێدراوە. هەرچەندە ناوی هیچ زمانێكی تر بە رەسمی نەناسێندراوە. لەدوای ساڵی 2011  لە رۆژئاوای كوردستان و دوای دروستبوونی بەڕێوەبەرایەتی خۆسەر، بە دەیان سەنتەر و ناوەندی فێربوونی زمانی كوردی كرانەوە، ئەو منداڵ و گەنجانەی كوردیان نەدەزانی فێری نووسین و زمانی كوردی بوون.ئێستا خوێندن لەسەرەتاییەوە تا دوا قۆناغی زانكۆ بە زمانی كوردی دەخوێنن، ئیدارەی خۆسەر بە زمانی كوردی بڕیارو نووسراوەرەسمییەكانی  خۆی لە پاڵ زمانی عەرەبیدا دەردەكات، بەڵگەنامەكان بە زمانی كوردی تۆمار دەكرێن، میدیا و بڵاوكراوە ڕۆژنامەوانییەكان بە زمانی كوردیین.