.

02:13 PM - 24/08/2025

میلان بەرامبەر كریمۆنیسی دووچاری شكستێكی چاوەڕوان نەكراوبوو

لە بەردەوامی یارییەكانی هەفتەی دەستپێكی وەرزی نوێی خولی یانەكانی ئیتاڵیا ، ئەی سی میلان لە یاریگای سان سیرۆ پێشوازی لە كریمۆنیسی كرد ، سەرەڕای ئەوەی لە سەرەتای یارییەكەوە یاریزانانی رۆسۆنێری باڵادەست بوون ، بەڵام لە دەقیقەی ٢٨ دا فیدریكۆ بیسچیرۆتۆ بەربەستی یەكسان بوونی شكاند و گۆڵی پێشكەوتنی كریمۆنیسی تۆمار كرد ، دواتر یاریزانانی میلان فشارێكی زۆریان خستە سەر گۆڵی یانەی میوان و هەر بەو هۆیەشەوە لە دەقیقەی یەكی كاتی زیادكراوی گێمی یەكەمدا پاڤلۆڤیچ ئەنجامەكەی بۆ یانەی خاوەن یاریگا هاوسەنگ كردەوە و ئەو گێمەش بە گۆڵێك بۆ هەردوولا مایەوە ، لە دەستپێكی گێمی دووەمدا یاریزانانی كریمۆنیسی باشتر دەبیندران و لە دەقیقەی ٦١ یشدا فیدریكۆ بیسچیرۆتۆ توانی گۆڵی دووەمی خۆی و پێشكەوتنی یانەكەی تۆمار بكات ، دوای ئەو گۆڵەش ماسیملیانۆ ئەلێگری ڕاهێنەری میلان دوو گۆڕانكاری ئەنجامدا ، ئەویش لە پێناو ئەوەی جڵەوی یارییەكە بگرنەوە دەست و ئەنجامەكە یەكسان بكەنەوە ، بەڵام تا كۆتایی لە تۆمار كردنی گۆڵی دووەمی خۆیان سەركەوتوو نەبوون و یارییەكەشیان بە گۆڵێك بەرامبەر بە دوو گۆڵ بە یانەی كریمۆنیسی دۆڕاند