.
12:00 PM - 24/08/2025
بەشێك لە میدیاكان سەنگەریان لە ئارامی سلێمانی گرتووە، بەڵام بە پێچەوانەی شەڕ‌ی دەروونی ئەو دەزگا میدیاییانە سلێمانی ئارامە و بە سنووردانان بۆ لە یاسا دەرچووان و ئازادكردنی سەرچنار ئارامتر دەبێت، یەكێك لە سەرپەرشتیارانی چالاكی كۆنفڕ‌انسە نێودەوڵەتییەكەی جینۆسایدیش ئاماژە بەوە دەكات، "ئەگەر سلێمانی ئارامترین شاری كوردستان نەبێت چۆن نوێنەرانی حەوت دەوڵەت بەشداری كۆنفڕ‌انسێك لەو شارەدا دەكەن".
رووماڵی بەشێك لە میدیاكان بۆ چەسپاندنی یاسا لە سلێمانی نادادپەروەرانە بوو
ئەندامی سەركردایەتی یەكێتیی نیشتمانیی كوردستان دەڵێت، "لە رووماڵی بەشێك لە میدیای عیراقی و عەرەبی بۆ چەسپاندنی یاسا لە سلێمانی، زیادەڕ‌‌ەویان كرد و نادادپەروەر بوون بەرامبەر بە یەكێتی و ئیدارەی حكومەتی خۆجێی شارەكە".
لە وتارێكدا كە لە بەشی بیروڕای وێبسایتی PUKMEDIA بڵاوكراوەتەوە، ستران عەبدوڵڵا، ئەندامی سەركردایەتی یەكێتیی نیشتمانیی كوردستان، ئاماژە بۆ ئەوەدەكات: ئەگەر میدیا عیراقی و عەرەبییەكان هەمان ئاستی گرنگیدانیان بەپرسی كورد پەیوەست بەكێشەكانی نێوان بەغدا و هەرێمی كوردستان، بەتایبەتی پرسی مووچەی هاووڵاتیانی هەرێم بدایە، ئەوا رۆڵێكی باشیان دەبوو لەچارەسەركردنی كێشەكان و یەكڕ‌یزی نیشتمانیی لە عیراق.
راشیگەیاند: ئەگەر میدیای عەرەبی بەبێلایەنی و پیشەیی مامەڵەی لەگەڵ كێشەی ئەمنی سلێمانیدا بكردایە، ئەوا وانەیەكی پیشەیی بۆ میدیای كوردی دەڕ‌‌ەخساند، بەڵام بەشێك لە میدیاكان نەیانتوانی پیشەییانە رۆڵی چەسپاندنی یاسا لەسلێمانی بگوازنەوە و لایەنگیرییان كرد.
سلێمانی لە سۆنگەی ئارامییەكەیەوە ئامێز بۆ چالاكییە نێودەوڵەتییەكان دەكاتەوە
ئەریوان سیوەیلی بەڕێوەبەری بەڕێوەبەرایەتی راگەیاندن و چاپ و بڵاوكردنەوەی سلێمانی بەوێبسایتی رەسمیی یەكێتیی نیشتمانیی كوردستان PUKMEDIA ی راگەیاند: لە سۆنگەی ئارامی پایتەختی رۆشنبیرییەوە چەقی چالاكییەكان لەو شارەدا كۆكراونەتەوە و تەنها لە كۆتاییەكانی ئەم مانگەدا سلێمانی ئامێز بۆ كۆمەڵێك چالاكی نێودەوڵەتی دەكاتەوە، كە ئەو چالاكیانە تەنها خەڵكی شارەكە بەشداری ناكەن، بەڵكو میوانی بیانی و نوێنەر و نمایندەی وڵاتانیش بەشداریی دەكەن.
سلێمانی بەهۆی چاوكراوەیی هێزە ئەمنییەكانییەوە بەردەوام ئارامە
هەر لەو بارەیەوە سەركەوت ئەحمەد وتەبێژی پۆلیسی پارێزگای سلێمانیش بۆ وێبسایتی رەسمیی یەكێتیی نیشتمانیی كوردستان PUKMEDIA دەڵێت: "سلێمانی بەردەوام بەهۆی چاوكراوەیی هێزە ئەمنیەكانییەوە بە ئارامی دەمێنێتەوە و دەرفەتێكی باش لەبەردەم چالاكییە رۆشنبیریی و هونەری و فەرهەنگییەكان هەیە لەو شارەدا بكرێن".
نێردە دیپلۆماسییەكان روو لە سلێمانی دەكەن
سەنتەری پەیوەندییەكانی چین ـ كورد لە بانگهێشتێكدا بۆ دەزگا و دامەزراوە میدیاییەكان ئاماژە بەچالاكییەكی گرنگ دەكەن لە زانكۆی سلێمانی، كە سەرەڕ‌ای بەشداری ژمارەیەكی زۆر لەمیوان، هەریەكە لە باڵیۆزی چین و سەركونسوڵی ئەو وڵاتەش بەشداریی تێدا دەكەن، لەمبارەیەشەوە یەكێك لە ئەندامانی ئەو سەنتەرە بە PUKMIDEA ی راگەیاند: سلێمانی چەقی بایەخدانە بە چالاكییە رۆشنبیریی و زانستییەكان و لەو پێناوەشدا بەرپرسان و نوێنەرانی وڵاتان بە تامەزرۆییەوە روو لە شاری سلێمانی دەكەن.
ئامادەكارییەكان بۆ پێشانگای نێودەوڵەتی كتێب
لەماڵپەڕ‌ی SULY BOOK ئاماژە بە هەنگاوە كردارییەكانی خولی حەوتەمی پێشانگای نێودەوڵەتی سلێمانی بۆ كتێب دەكرێت، كە ئەم خولە بەناوی سەرۆك مام جەلال ـ ەوەیە و دەبێت بە یەكێك لە گرنگترین چالاكیە رۆشنبیریی و فەرهەنگیەكانی هەرێمی كوردستان، بەپێی ئامارەكانی ساڵی رابردوو رێژەی سەردانكەران بۆ پێشانگای نێودەوڵەتی كتێب لەسلێمانی (963.000) كەس بووە و نزیك بووەتەوە لە یەك ملیۆن هاووڵاتی، لەكاتێكدا بە گریمانەیەكی زۆرەوە ئاستی بەشدارییكردن لەم خولەی پێشانگاكە زیاتر دەبێت و دەیان نووسەر و رۆشنبیر و كەسایەتی ناوچەیی و جیهانیی بەشداری تێدا دەكەن، ئەمەش بەڵگەی ئەوەیە كە سلێمانی بووەتە ئارامترین شاری عیراق و ژینگەیەكی ئارامی بۆ بزووتنەوەی رۆشنبریی سازداوە.
هەبوونی ژمارەیەكی زۆر لە حزب و رێكخراوی كۆمەڵگەی مەدەنی و چالاكوان لە سنووری پارێزگای سلێمانی سەلمێنەری ئەو راستییەیە كە ئارامی شارەكە ژینگەی خوڵقاندنیانە، چونكە دەتوانن ئازادانە كاروچالاكییەكانیان ئەنجامبدەن، جگە لەوەی زۆرترین خۆپیشاندان و گردبوونەوە و داواكردنی ماف لەم شارە ئەنجامدەدرێن.
سلێمانی بووەتە شاری مایك و لۆگۆی میدیایی
بەپێی دوایین ئامارەكانی لقی سلێمانی سەندیكای رۆژنامەنوسانی كوردستان زۆرترین دامەزراوە و كەناڵی میدیایی لەشاری سلێمانییە و ئارامی و سەقامگیرییە سیاسییەكەی بووەتە ژینگەیەكی گونجاوی كاری میدیایی، بە رێژەیەك ئەم پیشەیە برەوی سەندووە لە دوایین لێدوانیدا سەرۆكی لقەكە داوا دەكات كەناڵەكان میكانیزمێكی تر بدۆزنەوە لەبری دانانی مایك، چونكە بەهۆی زۆری مایكەكانەوە بواری دەركەوتن بۆ قسەكەر نەماوەتەوە.
لەوبارەیەشەوە كاروان ئەنوەر، سكرتێری لقی سلێمانی سەندیكای رۆژنامەنوسانی كوردستان، بە وێبسایتی رەسمیی یەكێتیی نیشتمانیی كوردستان PUKMEDIA ی راگەیاند: بوونی ئەو هەموو میدیایە لە سنووری پارێزگای سلێمانی، بە بینراو، بیستراو، نووسراو و میدیای نوێوە، بەڵگەی ژینگەیەكی گونجاوە بۆ كاری میدیایی و میدیاكاران ئازادانە و پیشەییانە دەتوانن كاری خۆیان بكەن، هەرچەندە ژینگەی میدیایی لە ئێستادا بە گشتی لە هەرێمی كوردستان بووە بە دوو بەشەوە كە بەشێكیان بە ئامانجێكی دیاریكراو كاردەكەن و بەشەكەی دیكەشیان ئەركیان گواستنەوەی زانیارییە..
راشیگەیاند: ئارامی و ئازادی، سلێمانی كردووەتە سیمبولی پارێزگاكانی هەرێم و عیراق و هەر ئەمەش وایكردووە هەر رووداوێك لە پارێزگاكە رووبدات ئەگەر بچوكیش بێت دەبێتە جێی سەرنجی میدیاكان و هەندێك میدیاش بە مەبەست و ناپیشەییانە كار لەسەر رووداوەكانی سلێمانی دەكەن و لە بەرگێكی گەورەتردا دەیگوازنەوە.
سلێمانی لەگەڵ ئارامی و ئاسایشەكەیدا لە زۆر بواری دیكەی وەك ژینگە، سەوزایی، تەندروستی، كشتوكاڵ و ریزبەندی زانكۆكانی عیراق بەپێی پێوەرە نێودەوڵەتییەكان یەكەمی پارێزگاكانی عیراقە.
لە تۆڕە کۆمەڵایەتیەکان شەیری بکە
