.
04:11 PM - 14/08/2025
ساڵێك بەسەر دەستبەكاربوونی پارێزگاری كەركوكدا تێپەڕی، بەڵام سێ ساڵ بەسەر بەڵێنێكی سەرۆك بافڵدا تێدەپەڕێت، كە سەرەڕای ئاستەنگە ناوخۆیی و هەرێمییەكان بەڵێنی دابوو كەركوك سەوزپۆش بكاتەوە و پارێزگاری زەوتكراویش لە بەرژەوەندی كورد و كەركوك و یەكێتییەكان وەربگرێتەوە، كەسیش پەیامەكەی سەرۆك بافڵ تاڵەبانی بیرناچێتەوە كە لە لە هۆڵێكی داخراوی بەغدا هێشتا كەس نەیدەزانی ئاڕاستەی رووداوەكان بەكوێدا دەڕۆن، دەست لە ناو دەست بە (رێبوار تەها) دەڵێت: "مەرحەبا جەنابی موحافیز".
سیاسەتمەداری گەورە و دووربین، كە ئامانجییەتی نەخشەڕێگا تەواونەكراوەكانی سەرۆك مام جەلال تەواو بكات، هەر ئەوەی لێ چاوەڕێدەكرێت بە خوێندنەوەی واقیعی سیاسی و باڵانس و دابەشبوونی هێزەكان، پێگەی یەكێتی لەناو پڕۆسەی سیاسی داهاتوو بخوێنێتەوە، لەمەشدا سەرۆكی یەكێتی هەروایكرد، بە زمانی داتا و ژمارەكان، بە بەڵێنی سەرڕاستانەی لەگەڵ هێزە عیراقییەكان بوونیادی بناغەی تەلارە نوێیەكەی كەركوكی دانابوو، دەیزانی ئاستەنگی درۆن و زمانی هەڕەشە و دەستوەردانی هەرێمی هەیە بۆ ئەوەی كەركوك بۆ یەكێتی و كورد یەكلایی نەبێتەوە، بەڵام سوربوون لەسەر ستراتیژە نیشتمانییەكەی دواجار كەركوكی لەسەر دەفرێكی ئاڵتونی هێنایەوە و پێشكەشی كەركوكییەكانی كردەوە.
ساڵێك تێپەڕیووە و لەكەركوك زۆرشت گۆڕا، پارێزگارێكی كورد و یەكێتی، لەو ماوە كەمەدا دەستی خزمەتی لە جاران درێژتر گەیاندە هەموو شوێنێكی ئەم شارە، جیاوازیی و جیاكاریی لە نێوان پێكهاتەكان نەهێشت و بە هاوبەشی و هەرەوەزی شارەكە بەڕێوەدەبەن، دەستكاری ژێرخانی شارەكە دەكات و پڕۆژەی گەورەی نەوت بۆ قازانجی نەوەكانی داهاتووی ئەم شارە بونیاد دەنێت و سەری بڵندی یەكێتیشی بڵندتر كرد، هەموو ئەو مەترسیانەی تەعریبی رەواندەوە، كە پێشتر دیسانەوە خەریكی بەرهەمهێنانەوەی بوون.
ئەم دەستكەوتە یەك ساڵیەی پارێزگارە نوێیەكەی كەركوك، شایستە بە ستایش و خوێندنەوە و پشتگیرییە، ئەمە یەكەمجارە پارێزگارێك تا سەر پابەندی سوێندی خزمەت و خاكییبوون بێت لەبەرامبەر كورد و كەركوك و یەكێتی و دیدگا نیشتمانییەكەی یەكێتی لەسەر جوگرافیایەكی ئاڵۆز و پڕ كێشە بەسەركەوتوویی تاقی بكاتەوە.
لە تۆڕە کۆمەڵایەتیەکان شەیری بکە
