بەهۆی هاتنی بارستە هەوایەكی ساردی جەمسەرییەوە، پلەكانی گەرما لە ناوچە جیاوازەكانی هەرێمی كوردستان و عیراق بە شێوەیەكی بەرچاو دادەبەزن و كەشوهەوایەكی فێنك ناوچەكە دەگرێتەوە.

بەپێی پێشبینییەكانی كەشناسی، لە ڕۆژانی داهاتوودا كاریگەریی ئەم شەپۆلە زیاتر دەبێت، بە جۆرێك لە ڕۆژدا كەشێكی مامناوەند و لە شەوانیشدا كەشێكی تەواو فێنك باڵ بەسەر ناوچەكاندا دەكێشێت.

هاوكات پێشبینیش دەكرێت، لە درەنگانی شەو و كاتی بەرەبەیاندا، بەتایبەتی لە ناوچە شاخاوییەكانی هەرێمی كوردستان زیاتر هەست بە فێنكبوون بكرێت، پێشبینیش دەكرێت كاریگەریی ئەم بارستە هەوایە بۆ ماوەی چەند ڕۆژێكی دیاریكراو لە ناوچەكەدا بمێنێتەوە.