وەزارەتی نەوتی عیراق دڵنیایی دەداتە هاووڵاتیان کە سەرەڕای داخستنی گەرووی هورمز و راگرتنی هەناردەی نەوت، سەرجەم پاڵاوگەکان و وێستگەکانی دابەشکردنی سووتەمەنی بەردەوامن لە کارکردن.

لە روونکردنەوەیەکی رەسمیدا، وەزارەتی نەوتی عیراق جەختی لەوە کردەوە کە سەرجەم پاڵاوگەکانی باشوور، ناوەڕاست و باکووری وڵاتەکە بەردەوامن لە کارکردن بە توانای تەواوی خۆیانەوە بۆ بەرهەمهێنانی جۆرە جیاوازەکانی سووتەمەنی وەک گازۆیل، نەوتی سپی و بەنزین. وەزارەتەکە ئاماژەی بەوەشکردووە کە لە رێگەی ئەم بەرهەمهێنانەوە پێداویستییە ناوخۆییەکانی رۆژانە پڕدەکرێنەوە و بڕی زیادەش لە کۆگاکاندا هەڵدەگیرێت. هاوکات، دڵنیایی داوە کە وێستگەکانی دابەشکردنی سووتەمەنی لە سەرجەم پارێزگاکانی عیراق و رێگە دەرەکییەکان لەسەرانسەری وڵاتدا ٢٤ سەعات کار دەکەن بۆ پڕکردنەوەی پێداویستییەکانی هاووڵاتیان.

لە بەشێکی تری راگەیەندراوەکەدا، وەزارەتی نەوت روونی کردووەتەوە کە کەمکردنەوەی بەرهەمهێنانی نەوتی خاو بەهۆی کەمبوونەوە و راگرتنی هەناردەکردنەوە کە دەرئەنجامی داخستنی گەرووی هورمزە، هیچ کاریگەرییەکی نابێت لەسەر بەردەوامیی کاری پاڵاوگەکان و بەرهەمهێنانی جۆرەکانی سووتەمەنی و غازی شل. وەزارەتەکە دووپاتی کردووەتەوە کە پرۆسەی دەرهێنانی نەوتی خاو و وەبەرهێنانی غازی هاوەڵ بەردەوام دەبێت تەنیا بۆ پڕکردنەوەی پێداویستییە ناوخۆییەکانی وڵاتەکە.