.

05:41 PM - 08/12/2025

وەفدی باڵای یەکێتیی نیشتمانیی کوردستان بە سەرۆکایەتیی قوباد تاڵەبانی لە بەغدا لەگەڵ بەڕێز عەمار حەکیم، سەرۆکی ڕەوتی حیکمە کۆبووەوە.

لە کۆبوونەوەکەدا کە رۆژی دووشەمە(8/12/2025) بەڕێوەچوو، ئاڵوگۆڕی بیروڕاکرا لەبارەی هەنگاوەکانی پێکهێنانی حکومەتی داهاتووی عێراق. هەردوولا هاوڕابوون پێویستە هەموو لایەنە عێراقییەکان لە پێکهاتە جیاوازەکان پێکەوە کار بکەن بۆ پێکهێنانی حکومەت لەسەر بنەمای دەرەنجامەکانی هەڵبژاردن و بە لەبەرچاوگرتنی بەرژەوەندییە باڵاکانی عێراق، بە جۆرێک کە جێی رەزامەندیی هەموو پێکهاتەکانی عێراق بێت.

قوباد تاڵەبانی ئاماژەی بەوەدا کە یەکێتی پێیوایە چارەسەری زۆربەی کێشەکانی عێراق، لەناویشیاندا کێشەکانی نێوان هەرێم و بەغدا لە پابەندبوون بە دەستوور و جێبەجێکردنی هەموو مادەکانی دەستووردایە.

جەختیشی کردەوە لەسەر پێویستیی رێککەوتنێکی تۆکمەی نێوان لایەنە عێراقییەکان، بە جۆرێک کە لە ئەگەری جێبەجێنەکردنیدا، لەسەر بنەمای ئەو رێککەوتنە لێپرسینەوە لە حکومەتی داهاتوو بکرێت.