.
04:45 PM - 30/11/2025
دەستەی سەربەخۆی مافی مرۆڤ لە هەرێمی كوردستان، لەراگەیەندراوێكدا ئیدانەی رووداوەكانی 29ی نۆڤەمبەری كرد و داوایكرد، بەزووترین كات ئەنجامدەرانی رووداوەكە بدۆزرێنەوە و تەسلیمی دادگا بكرێن.
دەستەی مافی مرۆڤ لەراگەیەندراوەكەدا بڵاویكردەوە، رۆژی شەممە 29 ی نۆڤەمبەر دوای كۆبوونەوەی ژمارەیەك لەدانیشتووانی گوندی لاجان، لەبەردەم كۆمپانیای لاناز بۆ گەیاندنی داواكارییەكانیان، بەداخەوە توندوتیژی و تەقەی لێكەوتەوە و بووە هۆی كوژرانی گەنجێك و برینداربوونی چەند كەسێكی تر.
ئاماژە بەوەشكراوە كە دەستەكە ئیدانەی هەر جۆرە توندوتیژییەك دەكات كە ببێتە هۆی بەكارهێنانی چەك و كوشتنی لێ بكەوێتەوە. لەراگەیەندراوەكەدا هاتووە، بەفەرمانی سەرۆكی دەستەكە، تیمێكی تایبەت بەسەرۆكایەتی تاڤگە عومەر بەڕێوەبەری گشتیی یاسا، سەردانی شوێنی ڕووداوەكەیان كردووە و لەگەڵ هاووڵاتیان و لێپرسراوانی ئەمنی (پارێزگار و بەڕێوەبەری ئاسایشی هەولێر) گفتوگۆیان كردووە.
دەستەكە ئاشكرایكردووە كە پێیان راگەیەندراوە لێكۆڵینەوەكان بەردەوامن و هەركەسێك تەقەی كردبێت، ڕێكاری یاسایی بەرامبەر دەگیرێتەبەر، هاوكات لە كۆتایی راگەیەندراوەكەدا، دەستەی مافی مرۆڤ تەئكیدی لەسەر پشتیوانیكردنی داواكاریی هاووڵاتیان و مافی كۆبوونەوەی مەدەنی و ئاشتییانە كردەوە و رایگەیاند: بەردەوام دەبن لەچاودێریكردنی ئەم كەیسە و دەرەنجامی لێكۆڵینەوەكان و پێویستە تەقەكەران و تۆمەتباران بەزوویی بدۆزرێنەوە و بدرێنە دادگا.
لە تۆڕە کۆمەڵایەتیەکان شەیری بکە
