.
10:39 AM - 28/11/2025
نێردەی نەتەوە یەكگرتووەكان بۆ عیراق (یۆنامی)، وێڕای ئیدانەی توندی هێرشەكەی سەر كێڵگەی كۆرمۆر، رایدەگەیەنێت، ئەو كردەوەیە تەنها بەئامانجگرتنی ژێرخانی ئابووری نییە، بەڵكو لێدانە لە بنەماكانی سیستەمی فیدڕاڵی لە عیراق .
یۆنامی لە راگەیەندراوێكدا هەڵوێستی خۆی لەبارەی پەرەسەندنە ئەمنییەكان خستووەتەڕوو و ئاماژەی بەوەكردووە، ئەو هێرشە جگە لەوەی زیان بە بەرژەوەندییەكانی هەرێمی كوردستان و تەواوی عیراق دەگەیەنێت، هاوكات هەڵگری پەیامێكی نەرێنی و مەترسیدارە كە راستەوخۆ دژایەتیی چەمكی فیدڕاڵیزم لە وڵاتەكەدا دەكات.
لە بەشیكی تری راگەیەندراوەكەدا، نەتەوە یەكگرتووەكان داوا لە دەسەڵاتە پەیوەندیدارەكان دەكات، رێوشوێنی پێویست و گونجاو بگرنەبەر بۆ ئەوەی رێگری لە دووبارەبوونەوەی ئەو جۆرە پێشێلكارییانە بكرێت، چونكە بە بڕوای ئەوان هێرشكردنە سەر ژێرخانی مەدەنی بە هیچ شێوەیەك پاساو هەڵناگرێت. هاوكات یۆنامی پشتیوانی و دەستخۆشیی خۆی، بۆ هەنگاوی پێكهێنانی لیژنەی لێكۆڵینەوەی هاوبەش لە نێوان حكومەتی فیدڕاڵ و حكومەتی هەرێمی كوردستان دەربڕیوە، بە ئامانجی ئاشكراكردنی ناسنامەی ئەنجامدەرانی هێرشەكە و تەسلیمكردنیان بە دادگا بۆ وەرگرتنی سزای یاسایی.
لە تۆڕە کۆمەڵایەتیەکان شەیری بکە
