.

10:49 PM - 15/09/2025

 

كاروان گەزنەیی وتەبێژی یەکێتیی نیشتمانیی کوردستان ئەمڕۆ، لە شاری کەرکوک،  سەردانی ئاسۆ مامەند، ئەندامی مەکتەبی سیاسی و سەرپەرشتیاری کەرکوک -سەڵاحەدینی یەکێتیی نیشتمانیی کوردستانی  کرد. 

 

لەدیدارێکدا، کە ڕەوەند مەلا مەحمود، لێپرسراوی مەڵبەندی دووی ڕێکخستنی کەرکوک، ئامادەیبوو،  باسی ھەنگاو و بەرەوپێشچوونەکانی شاری کەرکوک و ئەو دەستکەوتانەی کە لەماوەی ساڵانی رابردوو ئیدارەی نوێی شارەکە، بەدەستیھێناوە کرد. 

 

سەرپەرشتیاری کەرکوک -سەڵاحەدینی یەکێتیی نیشتمانیی کوردستان لەو دیدارەدا، ئاماژەی بەوەکرد، کەرکوک لە پێشینەی کارەکانی یەکێتیی نیشتمانیی کوردستانە و ئەو دەستکەوتانەی، کە ئیدارەی نوێی شارەکە بەدەستیھێناوە بەھەوڵ و ھیمەتی ھەموو لایەک بووە، ھەموو جوھدێکیشیان بەو ئاراستەیە، دەبێت کە خزمەتی زیاتری کەرکوکییەکان بکەن. 

 

ھاوکات کاروان گەزنەیی، ستایشی  رۆڵ و کارەکانی ئاسۆ مامەندی کرد، کە لەماوەی رابردوودا، خەمخۆرانە و ئازایانە رۆڵی کاریگەری ھەبوو لەنزیککردنەوەی پێکھاتەکانی شارەکە و دروستبوونی ئیدارەی نوێی پارێزگاکە. 

 

وتەبێژی یەکێتیی نیشتمانیی کوردستان باسی لەوەشکرد، ئاشتی و پێکەوەیی و نزیکبوونەوەی زیاتری پێکھاتەکانی شارەکە لە یەکێتیی نیشتمانیی کوردستان و ئیدارەی پارێزگاکە، دەرخەریی سیاسەتیی چەپکە گوڵەکەی یەکێتی و ھیمەتەکانی سەرۆک بافڵن، لەماوەی چەند ساڵی رابردوو، کە سەردانی بەغدای کردووە، لە کۆبوونەوەشی لەگەڵ لایەنەکان پرسی کەرکوک یەکێک بووە لەئەولەویەتی کارەکانی.