.
11:02 PM - 30/11/2025
پارتی چەكداری زیاتر رەوانەی گوندی لاجان-ی سنووری قەزای خەبات دەكات و بۆ دەستگیركردنی خۆپیشاندەران ماڵ بە ماڵی گوندەكە دەگەڕێن و لەتەواوی رێگە سەرەكیەكان بازگەیان داناوە.
لەئێوارەی ئەمڕۆوە پارتی ژمارەیەكی زیاتری چەكداری رەوانە كردووە بۆ ناو سەنتەری گوندی لاجان لەسەر رێگەی گوێری سنووری قەزای خەبات لەپارێزگای هەولێر ، بەپێی ئەو گرتە ڤیدیۆییانەی بۆ گەلی كوردستان نێردراون هێزە چەكدارەكانی پارتی باجەر و چەكی قورسیان لەدەوروبەری گوندەكە جێگیركردووە، هەروەها لەسەر رێگای سەرەكی گوێر و نزیك پاڵاوگەی لاناز و ناو سەنتەری گوندی لاجان چەندین بازگەی كاتیان داناوە، جگە لەو كەسانەی لەلایەن حزبەكەوە مۆڵەتی هاتووچۆیان پێدراوە، هیچ هاووڵاتیەك رێگەی پێ نادرێت گوندەكە جێبهێڵێت یاخود بەپێچەوانەوە بگەڕێتەوە.
شایەتحاڵێك كە لەناو گوندەكەوە قسەی بۆ گەلی كوردستان كردووە دەڵێت: هاوشێوەی شەوی رابردوو هێزە چەكدارەكانی پارتی هەڵمەتی گەڕانی ماڵ بەماڵیان دەستپێكردووە، ئەو بەڕوونی ئاماژەی بەوەكرد: هێزەكانی پارتی لیستێكیان پێیە و بەدوای ئەو ناوانەدا دەگەڕێن كەتۆمەتی بەشداریكردنیان لەخۆپیشاندا دراوەتە پاڵ.
وتیشی: گوندەكە بەتەواوەتی گەمارۆ دراوە، تەنانەت هێزە چەكدارەكانی پارتی بەئۆتومبێلەكانیان لەدەشتاییەكانی دەوروبەری لاجان و بەرزاییەكانیش بڵاوەیان پێكراوە و بازگەیان داناوە.
لە تۆڕە کۆمەڵایەتیەکان شەیری بکە
