روانگەی سەوزی عیراق، هۆشداری دەدات لەو تێكچوونە مەترسیدارەی كە رووباری فورات بەخۆوە دەیبینێت ، روانگەكە دەڵێت، ئاوی رووبارەكە چیتر بۆ بەكارهێنانی مرۆیی ناشێت و زیندەوەرە ئاوییەكانی ناویشی (وەك ماسی) شیاوی خواردن نین.

روانگەكە لە راگەیەندراوێكدا ئاماژەی بەوەكردووە، ئاوی رووباری فورات گەیشتووەتە نزمترین ئاستی خۆی لەدەیان ساڵی رابردوودا، بەتایبەتی لە پارێزگاكانی ناوەڕاست و باشووری عیراق، ئەمەش قەیرانی پیسبوون زیاتر دەكات، كە هەڕەشە لە تەواوی هاوسەنگی سیستمی ئاوی دەكات.

روانگەكە باسیلەوە كردووە، دابەزینێكی پێوانەیی لە ئاستی ئاوی رووبارەكە هەیە، ئەمەش بووەتە هۆی زیادبوونی چڕی ماددە پیسكەرەكان و وەستانی ئاو لە هەندێك ناوچەدا، باسیلەوەشكردووە، پاشماوەی نەخۆشخانەكان راستەوخۆ فڕێدەدرێتە ناو رووبارەكە، بەو هۆیەوە رێژەی پاكی ئاوەكە كەمبووەتەوە، ئەمە جگە لە بڵاوبوونەوەی گوڵی نیل كە لێشاو و ئۆكسجینی  ئاوەكەی كەمكردووەتەوە، هەروەها فورات بڕێكی زۆر لە ئاوەڕۆی كشتوكاڵی وەردەگرێت، كە ماددەی كیمیایی تێدایە، زۆرجار ئاستی ماددە كیمیاییەكان لە سنوورە رێگەپێدراوەكان تێدەپەڕێنن.

باس لەوەشكراوە، ئەگەر ئەو دۆخەی ئێستا بەردەوام بێت، رووبارەكە دەگۆڕێت بۆ ژینگەیەكی نەشیاو بۆ زیندەوەرە ئاوییەكان و بەكارهێنانی مرۆیی،  ئەمەش دەبێتە هۆی زیادبوونی كۆچی ناوخۆیی لە زۆنگاو و ناوچە گوندنشینەكانەوە، بەهۆی كەمبوونەوەی حەوزی ماسی و مردنی گامێشەكان، چونكە عیراق لەم ساڵانەی دواییدا زیاتر لە 500 گامێشی لەدەستداوە، لەكاتێكدا 70٪ـی زەوییە كشتوكاڵییەكان بەهۆی كەمیی ئاوەوە بوونەتە بێ بەرهەم.

روانگەكە داوا لە حكومەت دەكات، بەپەلە لەگەڵ وڵاتانی دراوسێ دەست بكات بە گفتووگۆ بۆ دەستەبەركردنی پشكی ئاوی دادپەروەرانە و بەردەوام، داواش دەكات وێستگەی پاككردنەوەی ئاوەڕۆ و پاككردنەوەی ئاوی پیسی كشتوكاڵی پێش ئەوەی بڕژێتە ناو رووبارەكە كارا بكرێت، هەروەها داواشدەكات هەڵمەتێكی نیشتمانی بۆ بەرەنگاربوونەوەی ماددە زیانبەخشەكان بۆ ناو ئاوەكە دەستپێبكات.