لەدوای هەڵگیرسانی جەنگی ئەمریكا - ئیسرائیل لەگەڵ ئێران، عیراق رووبەڕووی چەندین هێرشی درۆنی و بۆردوومانی فڕۆكەی جەنگی بووەتەوە، دیارترینیان هێرش بۆسەر بارەگا و بنكەی هێزەكانی ئەمریكا و بنكە و بارەگاكانی حەشدی شەعبی هێرشەكانیش تاوەكو ئێستا بەدەوامن.

جارێكی تر و لەوچوارچێوەیەدا بارەگایەكی فەرماندەیی حەشدی شەعبی لە ئەنبار كرایە ئامانج و لە هێرشەدا فەرماندەی ئۆپراسیۆنەكانی ئەنباری حەشدی شەعبی لە پارێزگاكە و 10 چەكدار كوژران جگە لە برینداربوونی چەندین چەكداری تر.

سەرچاوە ئەمنی و تەندروستییەكان بە ئاژانسی رۆیتەرزیان راگەیاند، لە ئەنجامی بۆردوومانی بارەگایەكی هێزەكانی شەعبی لە پارێزگای ئەنبار لە رۆژئاوای عیراق، لانیكەم 10 چەكدار كوژراون و 30 چەكداری تریش برینداربوون.

لە راگەیەندراوێكدا هێزەكانی حەشدی شەعبی ئاشكرایدەكات، لە هێرشەكەدا سەعد ئەلبعێجی فەرماندەی ئۆپراسیۆنەكانی ئەنباری هێزەكانی حەشدی شەعبی و ژمارەیەك لە هاوەڵەكانی كوژراون.

حەشدی شەعبی ئەمریكا بە ئەنجامدەری هێرشەكە تۆمەتبار دەكات و دەڵێت، "هێرشێكی ئاسمانی ئەمریكا بارەگایەكی فەرماندەیی كردە ئامانج لە كاتێكدا كە ئەركی نیشتمانیی خۆی جێبەجێ دەكرد". سەرچاوەكان ئاماژە بەوەدەكەن، هێرشەكە لەكاتی كۆبوونەوەیەكی ئەمنیدا بووە كە ژمارەیەك فەرماندەی باڵا ئامادەی بوون.