ئەمڕۆ ٨/٢٦ لە شاری هەولێر وەفدێکی یەکێتیی نیشتمانیی کوردستان کە پێکهاتبوو لە هەڤاڵان د.سۆران جەمال تاهیر ئەندامی مەکتەبی سیاسی و هەڤاڵان د. رێبوار و سالار سەرحەد و فریاڵ عەبدوڵا ئەندامانی سەرکردایەتی، سەردانی حزبی زەحمەتکێشانیان کرد و لەلایەن سەعد خالید جێگری سکرتێر و ژمارەیەک لە ئەندامانی مەکتەبی سیاسی و سەرکردایەتی پێشوازییەکی گەرمیان لێکرا.لەو کۆبوونەوەیەدا دەوری مێژوویی یەکێتی لە قۆناغە جیاجیاکانی خەبات و پەیوەندی دۆستانە و هاوخەباتی مێژوویی نێوان هەردوولا بەشانازییەوە باسکرا.بەتایبەتی رۆڵی خەمخۆری دڵسۆزانەی هەڤاڵ سەرۆک مام جەلال لە دانانی بناغەی یەکڕیزی و هاوهەڵوێستی لەبارەی زۆربەی ئاڵەنگارییەکانی ناوخۆو جیهان.هەروەها باس لەوەکرا کە یەکێتی بەروونی هەڵوێستەکانی بەمەستی چارەسەری کێشەکان روونکردەوە بەتایبەت لە بارەی پتەوکردنی پایەکانی دیموکراسی و بەشداری راستەقینەی لایەنەکان و حکومڕانی شەفاف و تەندروست بە مەبەستی دابینکردنی بژێوی ژیان و خۆشگوزەرانی هاوڵاتیانی کوردستان بەجۆرێک کە هاوڵاتی هەستی نیشتمانی و نەتەوەیی و کورد پەروەری زیاتر بێت و بۆ پتەوکردنی ئەو هەوڵانە جێبەجێکردنی سیستمی لامەرکەزی رێکارێکە بۆ دابەشکردنی دەسەڵات و هەنگاوێکە بۆ بەهێزکردنی حکومەتی هەرێم و یەکگرتووی تەواوی کوردستان.
لەسەر بارودۆخی عیراق هەردوولا کۆک بوون کە کۆبوونەوەی لایەنەکانی کوردستان و بڕیاری هاوبەش بۆ هاوهەڵوێستی لەسەر یاسای هەڵبژاردن بە جۆرێک بێت کە زیان بەرێژەی کورد نەگەیەنێ بەتایبەتی لە ناوچە کێشە لەسەرەکان.لای خۆیەوە سەعد خالید پشتگیری خۆی و هاوڕایی دەربڕی بۆ هەنگاوەکانی کارکردن و پێکەوەیی و ئەو رێکارانەی کە خزمەت بە گەلەکەمان دەکات بەتایبەتی لەهەنگاوی پێویست لە چاکسازی داهات و خەرجی و شەفافیەت لەو رێککەوتنانەی کە کراون و وە روونکردنەوەی بۆ پەرلەمان و هاوڵاتیان.