رەدوان گولی 01:17 PM - 2026/08/16

 رەدوان گولی

هەبوونا کەسایەتیی ێن سیاسی دناڤ جڤاکێ کوردیدا، گرنگییەکا ستراتیژی و دیرۆکییا مەزن هەیە، چونکی گەلێ کورد ژبەر بارودۆخێ خوە یێ جیوپۆلۆتیکی و لایەنێ نەتەوەی، بەردەوام د خەبات و تێکۆشینێدا بوویە  و ژبو پاراستنا ناسنامە و بەرەڤانیکرنا مافێن رەوایێن نەتەوەی و کەسایەتیی ێن سیاسی، رۆڵەکێ هەرە مەزن و بەرچاڤ دبینن و ئەز دێ ژ چوار لایەنانڤە ڤان رۆلان بەرچاڤ كەم:
ئاراستەکرن و رێبەرایەتیکرنا
بزاڤا رزگاریخوازییا کوردی
 کەسایەتیی ێن سیاسی یێن خودان شیان و کاریزما مینا مام جەلال تاڵەبانی، دشیان جەماوەری ل دۆڕ ئارمانجەکا نەتەوەیی کۆم بکەن و بزاڤێن جودا یێن جڤاکی و سەربازی و سیاسی رێکبێخن. نموونە سەرۆک مام جەلال وەکی سەرکردەکێ ژێهاتی و بیرتیژ د هەمی قۆناغێن خەباتا شۆڕشگێڕی دا ل کوردستانێ، شیا بزاڤا چەکداری و سیاسییا گەلێ کورد بڕێڤەببەت و د دەمیێن سەخت و دژواردا هێڤی و ئۆمێدێ بۆ خەلکی بزڤرینت.
دروستکرنا هەڤسەنگیێ و
کۆمکرنا لایەنێن جودا
 ئانکۆ کارێ دبلۆماسی و چارەسەرکرنا ئاریشە و گرفتان. وەکی یا خۆیایە مللەتێ کورد گەلەک جاران تووشی ناکۆکیی ێن ناڤخۆیی و شەڕێن براکوژیێ بوویە، هەبوونا سەرکردێن کۆ زمانێ دیالۆگێ دزانن، ژبۆ ئاشتییا ناڤخۆیی و یەکڕێزیێ زۆر گرنگ و پێدڤینە. ل سەر ئاستێ ناڤخۆیی مام جەلال ب خودانێ سیاسەتا چەترێ هەمیا دهاتە نیاسین و ئەوی دشیا دوژمن و نەیارێن دوهی ل سەر ئێکێ مێزێ کۆمڤە کەت. ل سەر ئاستێ عیراقێ و دەڤەرێ، شیانێن وی یا دبلۆماسی د دروستکرنا تەباییێ دا دناڤبەرا پێکهاتەیێن جودا یێن عیراقێ (کورد، عەرەب، شیعە، سوننە) و لایەنێن ئیقلیمیی دا و ناڤبری ب کاریزما و پێگەهێ خوە یێ تایبەت شیا پێگەهێ کوردان ب هێزتر لێ بکەت.
ناڤدەوڵەتیکرنا دۆزا کوردی
 بێ گومان کەسایەتیی ێن سیاسیی ێن خودان پەیوەندییێن بەرفڕەه دبنە دەنگێ جڤاکێ خوە ل ناڤەندێن بڕیاردانێ ل جیهانێ. مام جەلال ژبەر کۆ چەندین زمان دزانین و شارەزایی هەبوو د هاوکێشە و پەیوەندییێن جیهانیدا و زێدەباری تێکەلییا وی دگەل سەرکردێن جیهانێ و رێکخراوێن نێڤدەوڵەتی وەکی سۆسیال ئینتەرناشنال، شیا دۆزا رەوایا گەلێ کورد ژ چارچۆڤێ خۆجێهی ڤەگوهێزیت و بگەهینت ئاستێ نێڤدەوڵەتی.
چەسپاندنا مافان
د دەستوور و یاسایاندا 
مام جەلال نەبتنێ سەرکردەکێ ژێهاتی بوو د بیاڤێ خەباتا چەکداری و پارتیزانیدا، بەڵکو ئەوی دزانی چەوا سەرکەفتنا سەربازی و لەشکەری بکەت دەستکەفتەکێ یاسایی. ل سالا (2003) و پشتی نەمانا رژێما سەدامێ گۆڕبەگۆڕ، رۆڵێ سەرکردایەتیا کوردی ب گشتی و تایبەتی مام جەلال یێ بەرچاڤ و سەرەکی بوو د چەسپاندنا سیستمێ فیدراڵیزمێ و مافێن گەلێ کورد، د دەستوورێ نوێ یێ عیراقێدا و هەروەسا دەمێ پۆستێ سەرۆک کۆمارێ عیراقێ وەرگرتی، ئەڤە بخۆ پشکدارییەکا کوردا یا ئێکجار مەزن بوو د رێڤەبرنا عیراقێدا، نەک وەکی کەمینەکا پاشگوھخستی.