ستران عەبدوڵڵا 02:02 PM - 2026/06/04

کوردایەتی واتا حزبایەتی
خەباتی هەمە لایەن بە گوێرەی قۆناغ
ستران عەبدوڵڵا
بەشی بیست و یەک
خەباتی هەڵبژاردن بەشێکە لە خەباتی دیموکراسی، نەک هەمووی، ئامرازێکە نەک تاکە ئامراز، بە راستیش لە هەندێک جاردا خەباتی هەڵبژاردن هێند ئاڵۆز و قورسە لە خەباتی ژێر زەمینی دژوارتر و ژیرتریشە.
لە هەلومەرجی رزگاری، دیموکراتی و دەستووریدا خەباتی هەڵبژاردن، دەبێتە بژاردەی هەرە سەرەکی خەباتی سیاسی بۆ ئاڵوگۆڕی حوکمڕانی و بۆ گەشەی دیموکراسی و گەشەپێدانی سیاسی.
بەڵام بەوحاڵەشەوە بژاردەی هەرە سەرەکی بۆ ئەوەی سەرکەوێ و بەسەرەکی بمێنێتەوە گرنگە لەگەڵ ئامرازەکانی تری خاباتدا ئاوێتە بێت و لێیان جیانەبێتەوە.
واتا ئەم خەباتی هەڵبژاردنە خۆشی بەشێک بێت لە خەباتی هەمەلایەنە کە ستراتیژیێکی راست و تاقیکراوەیە و لە تەنگانەدا هەمیشە پێویستمان پێی دەبێت، چونکە حزب بۆئەوەی لە کۆڕی خەباتی هەڵبژاردندا براوە بێت دەبێ:
1-رێکخستن هەبوو ئامادە بێت، پتەو بێت و پۆڵایین بێت و وەک کێو لەبەردەم نەیار و ناساز و ناجۆردا راوەستاو بێت. بتوانێ لەو سەنگەری قایم و پتەوەوە بژاردەی هەڵبژاردن بباتەوە.
2-نەزم و نیزام و ئەمنیەت و خاکی ئازاد دابینکراو بێت. واتا باسکی بەهێزی نیشتمان، کە بنچینەی لە هێزی پێشمەرگایەتی و خەباتی چەکدارییەوە هەڵقوڵاوە لە قۆناغی رزگاری و ئازادی وڵاتدا ئەرکەکەی گۆڕابێت بۆ پارێزگاری لە خاک و خەڵک، نەک لاواز و پەراوێزخراوبێت کە یان بەلاڕێدا ببرێ، یان بەرەو فەرامۆشی و دوورخستنەوە لەو ئەرکە نەتەوەیی و نیشتمانییە برابێت.
3-خەباتی تەبلیغاتی و میدیایی ئەرکی خۆی لە قۆناغی نوێدا لە هوشیاری سیاسی و تێگەیشتن لە بژاردەی دیموکراسی و هەڵبژاردن جێبەجێ کردبێت.
بۆ ئەوەی بژاردە راست و رەواکان و حزبە رەسەن و سەنگەر قایمەکان بیبەنەوە و رێگا بۆ گەشەی زیاتری دیموکراسی خۆش بکەن.
ئەم تاقیکردنەوەیە تاقیکرایەوە، ئەوەبوو کە رێکخستن پەرت کراو حزبی رەسەن و نیشتمانی لاواز کرا و لێکترازانی تووش هات، ئیتر چۆن بژاردەی ناوەختی هەڵبژاردن کارێکی وایکرد پڕۆژەی دیموکراسی پاشەکشێ بکا و هێزی رێکخستن و هەموو ئامرازەکانی خەباتی هەمەلایەنە بنکۆڵ بکرێت.
کەواتە لە سەردەمی دیموکراسی و هەڵبژاردندا پاراستنی بژاردەکانی خەباتی هەمەلایەنە گرنگ و پێویستە، وڵاتی ئێمە دوای چەند وێستگەی دیموکراسی و هەڵبژاردن کە گوایە هێزی نوێباوی هێنایە پێشەوە، بەڵام چونکە ئەزموونەکەمان دەڵەمە بوو، ئیتر ئەوەبوو داعش هات و لێکەوتەکانی ریفراندۆمی ناوەخت هات، کە پێویستی بووژاندنەوەی باسکی پێشمەرگایەتی و نوێکردنەوەی دامەزراوەکانی کردە واقیعی لە دواخستن نەهاتوو.
هەر ئەم ئەزموونی هەڵبژاردنە هێزی مۆدێل تازەی سەرخست و هێنایە پێشەوە، بەڵام چونکە رێکخستنی پتەویان نەبوو و پشتیان بە میزاجی کاتی دەنگدەر بەست، کە ئەو میزاجە لە گۆڕانی بەردەوامدایە، وابینیمان کەوتن و کەتنەکەیان هەر ئەوەبوو زیانیان لە هێزی پتەو داو هیچ قازانجێکیان بە دیموکراسی و ئەزموونی هەڵبژاردن نەگەیاند.
لە دەورانێکی نزیکیشدا بینیمان لاوازکەوتن و خاوبوونەوەی ئۆرگانەکانی رێکخستن، کارێکیان کرد دیموکراسی هەڵبژاردن لە چەند جومگەیەکدا تووشی خەوش و کەموکوڕی بێت، تا ئەو رادەیەی بایکۆتی ناڕەوا لەلای چەند هێزێکی کەم ئەزموون بووە بژاردەیەکی ناڕەوا و نادیموکراسی.
بێگومان لە جەدەلی ململانێ و هاوپەیمانێتی نێوان دامەزراوەکانی یەک حزبدا، وەک جەدەلی لایەنەکانی ژیان بە فراوانی، روودەدات کە جۆرێک راکێش راکێش لەنێوان دامەزراوەکان هەبێت. کە هەر لایە و بەلای خۆیدا رایبکێشێ و لە حزب و خەڵک و قۆناغەکەش وابێت گوایە ئەم ئامرازە هەتا سەر و سەرەکییە و ئەوانی تر باویان نەماوە، بەڵام هەر ئەزموونی بزووتنەوەی کوردایەتی خۆی، بە حزب و رێکخراوەکانییەوە، پێمان دەڵێت تا قۆناغی رزگاری بەتەواوی تەواو دەبێ و مانگی تابانی مافی چارەنووس دەردەکەوێت، هەموو شێوازەکانی خەبات پێویست و رەوان. پاشەکشێ پێکردن یان بلۆکردنی کاتی، بە زمانی هاوچەرخی ئەمڕۆمان، هەر شێوازێک لە شێوازەکانی خەبات، ژیری و پێویستییە، بەڵام کوژانەوەی یەکجاری لە تۆماری پێویستی هەمەلایەنی خەباتدا کارێکی کورتبینانە و کەم ئەزموونییە.
حزبی رەسەن کەمپین هەر بۆ هەڵبژاردن ناکات، بەڵکو کەمپین بۆ رای گشتی و بەها نەتەوەییە گەورەکانی وەک سەرژمێری و ریفراندۆم و بڵاوکردنەوەی هوشیاری نەتەوەیی و نیشتمانیش دەکات. بۆ ئەم کەمپینەش هەڵمەت و کەمپین و جۆشدانی رێکخستن و دامەزراوە و ئۆرگانەکانیش هەر زۆر پێویست و چارەنووسازن.
تێکۆشەرانی جاران بە ئەزموون بۆمان دەگێڕنەوە کە لە کۆڕی خەباتی هەمەلایەنەدا ململانێ لەنێوان رابەر و سەرتیپ. پێشمەرگە و رێکخستنی شار، ئەفەندی سەر چەور و تێکۆشەری جامانە بەسەر هەر هەبووە و هەر دەبێت، بەڵام هەمیشە پێکەوەییان بۆ خەبات پێویست بوون و پێویست دەبن و چیرۆکە خۆشەکانی نێوانیان، وەک ناکۆکی لاوەکی، بەشێکن لە زیندویەتی ئەزموونی مرۆیی خەباتگێڕان و لە کتێبی (رشتەی مرواری پێشمەرگانەدا) تۆمار دەکرێت.
لە هەموو ئەم بەسەرهات و تاقیکردنەوانەی کۆڕی خەباتی هەمەلایەنەدا بەرامبەر نەیارانی دوژمنی هەمەلایەنەدا، وانەی هەرە گەورە ئەوەیە: گشتمان دەوێ و هیچمان لێ زیاد نییە و دەستبەرداری هیچی نابین.
هەموویان پێکەوە دەگونجێنین و هەموویان بۆ رزگاری کوردستان باشن، کاروانی خەباتی دیموکراسی و هەڵبژاردن، لە وڵات زۆر گرنگە، بەڵام هەرگیز نابێ لە ئاوڕدانەوەی ژیرانە لەسەر دامەزراوەکانی حزب و چاکسازی ناوخۆیی دامان ببڕێ، بۆ بردنەوەی بەردەوام و سەرکەوتنی لەسەر یەک لە هەڵبژاردنەکاندا، حزبی بەردەوام و هەمیشە پتەومان دەوێت.
درێژەی هەیە