ستران عەبدوڵڵا 10:28 PM - 2026/09/16

ستران عەبدوڵلا

لەم رۆژانە چەند پڕوپاگەندەیەکی گەشبین دەرخواردی خەڵک درا کە خاوەنەکانیان گلییانە بۆ راست نەبوو. وتارێکی قەدیمم هەبوو کە لە ٢٧ی ئابی ساڵی ٢٠٢٢ بڵاوم کردەوە لەسەر پڕوپاگەندەیەکی تر ، دیتم بۆ ئەمرۆ کە ئەیلولی ٢٠٢٦ هیچ عەیبی نییە و دەست دەدات. بۆیە وا دامنایەوە.  هەر سەکۆیەک بردی گەردنی ئازاد بێت:

خەبەرون خەتەرون

دەڵێ جارێكیان  مەلا نەسرەدین  کە تورک و عەجەم خەواجەی پێدەڵێن و عەرەبیش بە ناوی جوحا تەعریبیان کردووە لەناو بازاڕ پروپاگەندەیەك بڵاودەکاتەوە گوایە لەو ماڵەی ئەوسەری ئاوایی  دەعوەتێکی گەورە سازە و سفرەیەکی گەورەی میوانداری ریزکراوە .جا بەلاش و حەلاش و بێ حیساب و کیتاب خەڵك دەچنە داوەت و سفرەی رازاوە  قەرەباڵەغە. ھەروا خەڵك و عەوامە فڕکان فڕکانی ماڵی ئەوپەڕی ئاواییەتی بەڵکو بەشی چەوری بەربکەوێت. پروپاگەندە وا تیژڕەو دەبێت مەلای خۆشمەشرەب لەتاو سەداو سەودای قسەی دەڵێ با خۆشم بچم نەکا درۆ نەبێ و بەڕاست ھەڵگەرێ.
رۆژانە مەلا مەزبورەکانی چەرخی سۆشیال میدیا درۆی قەبە و دەلەسەی بێ بەلەسە بڵاودەکەنەوە  کە گڕ لە خەرمانی قەناعەتی لەرزۆکی خۆشیان بەردەدا. دوایی کە درۆ بەراست وەرناگەرێ لە جێی ئەوەی  خەم لە ھەواڵی فەیك و پشت پەردەی فیکوفاکی زانیاری ھەڵە بخۆن  دێن گلەیی دەکەن گوایە «راستی» درۆی ئەوان لەگەڵ راستی رووداوەکان یەکی نەگرتۆتەوە.

خۆ ئەگەر چیرۆکە خۆشەکانی  خەواجە نەسرەدین پەند و حیکمەتی تێکەڵی گونجی قسەی خۆش کردووە و بۆ ئەمرۆ تا سەر بۆتە میراتێکی کەلتوری کە چەندین میللەت شەڕی خاوەندارێتی لەسەر دەکەن  . بەداخەوە پڵاوی سۆشیال میدیا تەنھا دەرخواردی خاوەنەکانیان نادرێت ، بەڵکو میزاجی میللی  پێ ئالودە دەکرێ و  ژینگەی گشتی وڵاتی پێ  پیس دەبێت.
ھەقە ئەوانەی دەلەسەیان کردۆتە سەرمایەی  کار و پیشەی میدیایی گلەیی لەوە نەکەن دەخیلەی سەرمایەکەیان زوو بەتاڵ بێت. 
خەبەری درۆی شەو لەبەر ھەتاوی سبەی دەتوێتەوە.