ئەسعەد شەیبانی وەزیری دەرەوەی سوریا، پێشبینیەكانی خۆی بۆ دەستپێكردنەوەی دانوستان لەنێوان دیمەشت و تەلئەبیب راگەیاندو وتی،پێشبینی دەكەم بەم زووانە دانوستانەكان لەگەڵ ئیسرائیل سەبارەت بەرێككەوتنێكی ئەمنی دەستپێبكەنەوە.

شیبانی ئاماژەی بەوەشكرد: پەیوەندییەكان لەگەڵ ئیسرائیل پچڕابوون دوای ئەوەی لە 18ی ئابدا هێرشی كردە سەر بنكەی ئاسمانیی ئەبو زهور.  شەیبانی تەئكیدیی لەوەش  كردەوە ئێستا سوریا متمانەی بە ئیسرائیل نییە و لە پێشینەی كارەكانیان راگرتنی هێرشەكانیەتی بۆ سەر خاكی وڵاتەكەی.

وەزیری دەرەوەی سوریا باسی لەوەشكرد: دیمەشق دەستی ئاشتی و دیبلۆماسی درێژ دەكات و پێویستە ئیسرائیل ئەم دەرفەتە مێژووییە بقۆزێتەوە، چونكە ئیسرائیل هەوڵیدا لەڕێگەی هێزی سەربازییەوە ئاسایشی خۆی بپارێزێت، بەڵام لەهیچ شوێنێكدا سەركەوتوو نەبوو.

واشنتۆن زیاتر لەساڵێكە هەوڵدەدات نێوەندگری رێككەوتنێكی ئەمنی نێوان ئیسرائیل و حكومەتی ئەحمەد شەرع بكات كە هاوپەیمانێكی نوێی ئەمریكایە لەڕۆژهەڵاتی ناوەڕاست.