بەمەبەستی پیشاندانی مێژووی پڕ شانازی گەلەکەمان لە شوێن پێی ژنێکی سەرکردەوە، رۆژی یەکشەمە ٢٠٢٦/٨/٩ ناوەندی دەرەوەی یەکێتی نیشتمانی کوردستان، کۆبونەوەیەکی فراوانی بۆ رەوەندی کوردی لە ڤییەنای پایتەختی نەمسا رێکخست. 
کۆبوونەوەکە بە وتەی بەخێرهاتن لەلایەن عەبدوڵا پۆڵا دەستیپێکرد. 
پاشان وتاری ناوەندی دەرەوە لەلایەن ئامینە محەمەدەوە پێشکەش کراو، لە وتەکەیدا رایگەیاند: کۆبوونەوەمان لە دەوری نمایشکردنی فیلمی دادە ، بۆنەو هەوڵێکە بۆ بەبیر هێنانەوەی  مێژوویەکی پڕشنگدار و گەیاندنی پەیامی مرۆڤایەتی و کوردایەتی راستەقینەیە.
ئەم فیلمە داستانی ژنێکی سەرکردەی کورد دەگێڕێتەوەو، باس لە سەردەمێکی سەختی خەباتی گەلی کورد دەکات لە رووبەڕوو بونەوەی دیکتاتۆریەت و زوڵم.
بەرخودانی ژنانی کورد پیشان دەدات هاوشانی پیاوان بۆ بەدیهێنانی ئازادی…
ئامینە محەمەد دوپاتی کردەوە کە، دادە هێرۆ هێمایەکی درەوشاوەی ژنانی شاخ و ژنانی ئازای گەلەکەمانە، کە هاوشانی پیاوانی کورد لە مێژوودا خەباتیان کردوە بۆ ئازادی ئینسان و مرۆڤایەتی..
دڵنیاین لەناو ئەم فیلمەدا بەشی هەرە زۆری ئێوەی ئامادەبووی بەڕێز،  ژیان و مێژووی خۆتان و خێزان و کەسوکارتانی تیا دەبیننەوە، چونکە هەموومان بە فۆرمی جیاواز لەناو ئازاری گەلەکەمان و خەباتی گەلەکەماندا پشکمان هەیە…
پاش تەواو بوونی فیلمەکە نوێنەری لایەنەکان و بەشێک لە ئامادەبوان و میوانان لەدەفتەری بیرەوەریدا نامەی دەستخۆشی و هەڵسەنگاندنی خۆیان تۆمارکرد.