سیستمی پەیڕۆڵ لەلایەن وەزارەتی دارایی و ئابووریی حكومەتی هەرێمی كوردستانەوە كارا كرا ،بۆ ئەوەی یەكە ژمێریارییەكان دەست بە داخڵكردنی مووچەی مووچەخۆران بكەن.

یادگار جەبار، سەرپەرشتیاری بایۆمەتریی سلێمانی لەبارەی كاتی كارابوونی سیستمەكە و ڕێنماییەكانەوە ڕاگەیاند،  سەعات 11 و 45 دەقیقەی ئەمڕۆ سیستمەكە كارا كرا و ئەو فەرمانبەرانی یەكە ژمێریارییەكان كە  لە دەوامی رەسمیدان دەتوانن دەست بە داخڵكردنی ناو و بڕی مووچەی مووچەخۆران بكەن.

ئەمە لەكاتێكدایە، تا ئێستا مووچەی مانگی حوزەیران لەلایەن بەغدادەوە ڕەوانە نەكراوە و نزیكەی 40 رۆژ بەسەر وەرگرتنی مووچەی مانگی ئایار تێپەڕیوەو لە كۆبوونەوەی ئەنجوومەنی وەزیرانی عیراقیش  هیچ گفتوگۆیەك لەبارەی داهاتی نانەوتی و مووچەی مووچەخۆرانی هەرێمی كوردستان نەكراوە.

وەزارەتی دارایی و ئابووری هەرێمی كوردستانیش لەراگەیێندراوێكدا رەتیكردەوە وەفدی هەرێمی كوردستان لە بەغدا داوای دواخستنی ناردنی مووچەی مانگی شەشی كردبێت، ئاماژەی بەوەش كردوە هەمیشە داهاتی نێوخۆ تاوەكو كۆتایی مانگ كۆنابێتەوە.