ژمارەیەك لێكۆڵەر‌و نووسەر‌و پسپۆڕی شوێنەوار، بە یاوەری ئاكۆ غەریب بەڕێوەبەری مۆزەخانەی ئەمنە سوورەكەی سلێمانی و بە سەرپەرشتی ڕێكخراوی سی دی ئۆ، سەردانی كفرییان كرد‌و كار بۆ ئەوە دەكەن ئەو ناوچەیە گرنگی زیاتری پێبدرێت و بكرێتە ناوچەیەكی گەشتیاریی.

ئاكۆ غەریب، بەڕێوەبەری مۆزەخانەی نیشتمانیی ئەمنە سوورەكە، لە كۆنگرەیەكی ڕۆژنامەوانیدا ڕایگەیاند: هاتووین تاوەكو گرنگی زیاتر بەم پیرەشارەی كوردستان بدرێت لەووی گەشتیاری و شوێنەوارییەوە، چونكە كفری هیچ كات لە سلێمانی جیانەكراوەتەوە‌و مێژووی كفری كاریگەرییەكی زۆری لەڕووی سیاسی و كۆمەڵایەتییەوە هەبووە.
ڕاشیگەیاند، كفری یەكێك بووە لەو شوێنانەی كە بەلای شێخ مەحموودی نەمرەوە گرنگ بووەو خەڵكەكەی پشتیوانییان كردووە، بۆیە دەمانەوێ كار لەسەر بوژانەوەی كفری بكەین لەڕووی گەشتیارییەوە.