.
09:38 AM - 01/06/2020
بەیانناما سەرۆكایەتیێ بهەلكەفتا 45 ساڵڕۆژا دامەزراندنا ئێكەتی نیشتیمانی كوردستان
بۆ هەمی خەلكێ كوردستانێ
دچل و پێنجەمین ساڵیادا دامەزراندنا (ی.ن.ك) و چل و چوار سالیا هەلكرنا شورەشا نویا گەلێ مە، گەرمترین پیرۆزباهیان ل هەوە دكەیین، دڤێ یادێ دا هەوە گازی دكەین پێكڤە تەماشەیی بەشەك ژ كاروانێ خاباتا بێ ڤەقەتیانا پرشەهید و پڕ دەستكەفتێن شورەشا نویا گەلێ مە بكەین، پێكڤە سەرێ رێز و وەفایێ بۆ شەهیدێن خۆ بچەمینین، كو ژ پێخەمەت سەرئێخستنا باوەریێن نەگوهرێن ئێكەتیێ بۆ ئاشتیی و ئازادی، مافێ چارەنڤیس، دیموكراسی،مافێ مروڤی، دادپەروەریا كومەلایەتی و دابینكرنا ژیانەكا باشتر بۆ خەلكێ كوردستانێ گیانێ خۆ كرینە قوربانی، پێكڤە سوزێ بدەین ب كەس وكارێن سەربەرزێن شەهیدان، ب پێشمەرگێن مەفرەزێن دەسپێكی، ب رێكخستنێن نهێنیی و سەركردایەتیا ناڤخۆ و دەرڤەیی وەلاتی. ب پارتیزانێن پشتی ئەنفالێ، ب خەباتگێرێن قوناغێن دژوارێن خەباتا چیا و باژێران، ب دەستەیا دامەزرێنەرا (ی.ن.ك) ب روحا بلندا سەرۆك مامجەلال، كو پابەندبین ب وی ئێمانەتا گرنگ و ئەركێ مێژووی یێ پشتی سەركەفتنا كونگرەیێ چوارێ ئێخستیە سەر ملێن مە. ئەم ل سەرۆكایەتیا (ی.ن.ك) سوزێ ددەین دێژە پێدەرێن ڤی كاروانی بین، دەسكەفتێن وێ بپارێزین و دەسكەفتێن زێدەتر بێخینەسەر دڤێ ساڵیادێ دا، ب ڤەكرنا بەرپەرەكێ نویێ، رژدتر بۆ دابینكرن و پاراستنا بەرژەوەندیێن بلندێن گەلێ كوردستانێ، خەباتێ بكەین.
كەس و كارێن سەر بلندێن شەهیدان
ئێكەتیا نشتیمانیا كوردستانێ، هەر ب سرۆشتێ خۆ پێشەنگە. پشتی شكەستن و بێئومێدیێ، هیڤی ڤەگەراندەڤە و شورەشا كوردایەتیێ هەلكرەڤە، ب باوەریەكا نەگوهر، ژ پێخەمەت مافێ چارەنڤیسی خەبات كریە و هەتا گەهشتنێ ب دوماهیك ئارمانجان بۆ هەمی قوربانیدانەكێ یا ئامادەیە، هەر وەكو چاوا د روویبروونا رژێما بەعسا دكتاتور دا پێشەنگ بوویە، ل شەرێ دژی تیرۆرێ ژی دا، ئێكەتی بۆ شیایی ژ كوردستانا باشور هەتارۆژئاڤا شكەستنێ ب تیرۆرێ بینیت و پێكولا داگیركاری و ئەفسانەیا وان ژناڤ ببەت، ژ پێخەمەتا پاشەرۆژا كوردستانێ ئێكەتیێ ب هزاران پێشمەرگە و ب سەدان فەرماندە و سەركردێن قارەمان كرینە قوربانی، لەورا ژی ژلایێ خەلكێ ڤە ناسناڤێ حزبا شەهیدان پێ هاتیە دان. هەبوونا شەهیدێن سەربلندێن ئێكەتیێ ژ هەمی پێكهاتەیێن جودا جودایێن كوردستانێ باوەریا وان تێكوشەران دسەلمینیت ب بەرەڤانیكرنا هەردەمی یا ئێكەتیێ ژ مافو ئازادیێن وان و نیشانا باوەریا كەس و كارێن وانایە ب ئارمانجا رەوا و خەباتا روونا ئێكەتیا هەوە.
ئەم د ئێكەتیا نوی دا ب هیڤی و ئومێد ڤە دگەل هەوەیینە، مە باوەری ب شیانێن ژنان و ماموستایان و پیشەكار و فەرمانبەر و سەرمایەدار وبازرگان و كاسبكارێن بازاری و رێنجبەرێن كوردەواریێ، لاو و گەنج و پێگەهشتیێن ڤی مللەتی هەیە كو بارێ خوارێ سەرملێن كوردستانێ راست بكەیین و بێی دوو دلی پێنگاڤێ بەرەڤ سەركەفتنێ پاڤێژین.
دڤێ رێبازا چەپكە گولێ ژی دا و هەڤالێ وەغەركری مام جەلال بۆمە ب جه هێلایە دەرگەهێ مە ڤەكریە بۆ هەر دوست و دلسوزەكێ كو بخازیت برێكا ئێكەتیێ خزمەتا نیشتمانێ مە بكەت، ئەم دخازین جهێن ژ هەژی ب كەسێن ژ هەژی پڕ بكەین و ژینگەهەكا وەسا یا كارێ حزبی و حوكمرانیێ پەیدا بكەیین كوتێدا گەنج و خۆدان باوەرنامە یێن پسپور، خەلكێ ئاسایی و دلسوز، هەمی تەخو چینێن
هەڤوەڵاتیێن بەرێز..
دڤێ ساڵڤەگەرێدا ڕادگەهینین، پشتی كۆنگرێ ئێكەتییا نوی، (خەباتا مافان) بەرەڤ پێشڤە چوویە،و ئەم ل سەرۆكاتییا ئێكەتیێ دخوازین بمفا وەرگرتنا تمام ژ بنەمایێن هزری و دامەزراویێن سۆشیال دیموكرات و بەرپاكرنا وان بنەما دگشت سیستەمێ حوكمڕانیێ دا، دێ كێشەیێن بنگەهین و هەنوكەیێن كوردستانێ چارەسەر كەین، و وی كەتواری ب ئاڤرینین كو گیانێ شەهیدان و وژدانا خۆ ئارام ببیت، كوردستانەكێ ئاڤا بكەین، كو ماف و ئەرك ب دادپەروەری و هەڤسەنگی تێدا بهێنە دابەشكرن، قۆرخكرنا سیاسی و ئابووری نەهێلین و حوكمڕانیەكا بەرپسیارانە و پارێزەرا مافێن وەڵاتیان دورست بكەین. بشێوەیەكی ژیانا هەوە بساناهی و خۆشگوزەران بیت، و نەهێلین تەماعكارییا سیاسی قەیران ل دوویف قەیرانێ پەیدا بكەت، مە باوەریەكا تمام هەیە كو رێیا سەرەكی بۆ گەهشتنا ڤان ئارمانجان، ڕاگرتنا بەڵانسێ هێزێ یە، ڕێزگرتنە ل پێگەهێ وەڵاتی و ماف و ئازادیێن وی، و پێگیرییە ب سیستەمكرنا دەستهەڵاتێ و ملكەچكرنە بۆ سەروەریا یاسایێ دهەموو ئاستەكیدا.
هەتا داڕشتنا دەستورەكێ گەلپەسەند بۆ هەرێما كوردستانێ، هەمواركرنا یاسا هەلبژاردنان و ڤەگەڕاندنا روومەتێ بۆ پەڕلەمانی، كارایی بۆ حكومەتێ و ب نیشتیمانكرنا هێزێن چەكدار، دڤێ قۆناغێدا جێبەجێكرنا پڕۆژێ (لامەركەزیەتا ئیداری و دارایی بۆ كوردستانێ) ئەم ب پێدڤی دزانین، وەكو ڕێككەفتنا سیاسییا ئێكەتی و پارتی بۆ پێك ئینانا كابینا نەهێ و د كارناما حكومەتا هەرێمێدا هاتی، دەستوور، یاسا، جەماوەر و حەزا پڕانییا حزب و لایەنێن سیاسی ژی، پشتەڤانیێ ل ڤی پڕۆژەی دكەن.
لەوڕا دێ هەموو ڕێكارێن سیاسی، یاسایی، ئیداری و مەدەنی گرینە بەر بۆ پشتەڤانیكرن و جێبەجێكرنا (لامەركەزیەتێ)، كو بێگومان ئەڤ سیستەمە دێ فاكتەرێ بهێزبوونا حكومەتێ و گەشەكرنا هەرێما كوردستانێ. ئەم ب كریار سوزێ ددەینە هەوە و دێ بۆ هەوە سەلمینین كۆ ئێكەتی حزبا خەلكی یە، و بێی گەف و ب بەرچاڤ وەرگرتنا بەڕژەوەندیێن تایبەت، بەڕەڤانیێ ژ خواست و مافێن هەوە بكەین و بەڕژەوەندیێن هەوە بكەینە مەزنترین ئارمانجێن خۆ.
دەرگەهێن ئێكەتی نیشتیمانی كوردستان دڤەكرینە بۆ هەموو كەس و حزب و لایەن و ڤەلڤینەكێ، دا مل ب مل پێخەمەت بەڕژەوەندیێن گشتیێن خەلكێ كوردستانێ و ئایندەكێ باشتر خەباتێ بكەین. ئەم دخوازین دناڤخۆیا هەرێمێدا دگەل سەرجەم لایەنان دهەڤ دەنگ و هەڤ هەڵویست بین، هەر هێزەكا سیاسی ژبۆ ئاڤەدانكرنا كوردستانێ دگەل مە بیت، دێ دەستێ هەڤكاریێ بۆ درێژ كەین.
دێ لسەر بنەمایێ بەڕژەوەندیێن هەڤپشك، گەشێ ب پەیوەندیێن خۆ دەین دگەل وەڵاتێن هەڤسنورێن هەرێما كوردستانێ و سەرجەم وەڵاتێن جیهانێ، پێخەمەت پاراستنا مافێن گەلێ مە دێ دگەل هێز و لایەنێن عیراقێ كاركەین و پڕۆسا سیاسییا وەڵاتی پێش ئێخین، بەلێ دهەمان دەمدا چاڤپۆشیێ ل ماف و دەستكەفتێن گەلێ كوردستانێ ناكەین، كۆ ب خوینا بدەهان هزار قوربانییان بدەستڤەهاتینە.
ئێكەتی دێ بەردەوام بیت لسەر پاراستنا قەوارێ هەرێما كوردستانێ، و پاراستنا مافێن دەستوریێن گەلێ مە، و خۆ ب خودانا كەركوك و دەڤەرێن ڤەقەتیای دزانیت و دێ پێداگیریێ كەت ل گورەی ماددا 140 ژ دەستوورێ عیراقێ كوردستانیبوونا كەركوك و وان دەڤەران بهێتە ئێكلاكرن، و ئەم دوێ باوەرێداینە هندی كوردەك ل كەركوك مابیت، ئێكەتی دێ مینیت و هندی ئێكەتی هەبیت، دێ بەڕەڤانیێ ژ كەركوك و سەرانسەری ئاخا كوردستانێ كەت.
بڤێ هەلكەفتێ دووپات دكەین، كو ئێكەتی پێداگیریێ دكەت بۆ بسەرخستنا دانوستاندنێن دناڤبەرا هەرێمێ و حكومەتا عیراقێدا، بتایبەتی دبوارێ مسوگەركرنا مووچێ فەرمانبەر و بۆدجێ هەرێمێدا.
ئەندامێن دلسوزێن ئێكەتی نیشتیمانی
د 45 مین ساڵڕۆژا دامەزراندنا ئێكەتییا هەوەدا، یاد و تێكۆشانا سەرۆك مام جەلال و سەركردێن نەمر و سەرجەم شەهیدێن خۆ بلند دنرخینین، و پێداگیریێ لسەر گرنگیا ئێكەتییا ناڤ ئێكەتیێ دكەین، ژبەركۆ ئێكەتی بهەوە هەموویان یا خورستی و ئێكگرتییە.
ئەڤ رێیا سەركردایەتییا نووی گرتییە بەر، هەر چەند یا پڕی ئەڤرازی و نشیڤی یە، بەلێ هیچ جارەكێ كۆڵ نادەین و دێ دبەردەوام بین. جهێ شانازیێ یە، كو ئەم دڤی كاروانیدا بتنێ نینین، و دیارە ئەندامێن دلسوزێن ئێكەتیێ ب حەزا خۆ بۆ چاكسازیێ و بدەستڤە ئینانا مافان دگەل مەنە، و بۆ پاراستنا مافێن خەلكی و دەستكەفتێن كوردستانێ خەباتێ دكەن.
لەوڕا ئەم دپشت ڕاستین ب پشتەڤانییا هەوە، و دورستبوونا كۆدەنگیێ دناڤبەرا هێزێن سیاسیدا، و ب ئێك دلی و ئێك ڕێزیا خەلكێ كوردستانێ، دێ ئەڤ كاروانە گەهیتە ئارمانج و ئەنجامێن خۆ، و وەكو هەموو جارەكێ ئێكەتی نیشتیمانی كوردستان دێ ڕۆلێ خۆ یێ پێشەنگ و مێژوویی گێریت.
ل دووماهیێ ژی تەكەزێ ل هەڤالێن ئێكەتیێ دكەین كو ژبەر خۆپاراستن و پاپەند بوون ب رێنمایێن ساخلەمیێ چ خرڤەبوون و هەلكەفتێن جەماوەری هەتا سەرەدانا مەزارێ مامێ مەزن ژی ناهێنە ئەنجام دان، هەڤالێن ئێكەتی دێ هەڤكار و پێشەنگ بن ب تایبەتی د ڤێ شەپولا دووێ یا نەبەچاڤا كورونایێ دا بۆ جێ بەجێكرنا رێنماییان بۆ بەرژەوەندیا گشتی و پاراستنا گەلێ مە.
هیڤیا داهاتەكێ گەش بۆ هەموویان دخوازین و هەوە پشت راست دكەین ل داهاتیەكێ نێزیك دا هەلكەفتەكا ژهەژی یا جەماوەری د حزورا مەزارێ سەرۆك مام جەلال دا دێ ساز كەین.
بەرز و بلند بیت 45مین سالیادا دامەزراندنا ئێكەتی نشتیمانی كوردستان.
سەرۆكایەتییا ئێكەتی نشتیمانی كوردستان
لە تۆڕە کۆمەڵایەتیەکان شەیری بکە