.

11:48 AM - 14/01/2021

  لەیاریەكی دواخراوی هەفتەی 16ی پریمەرلیگ یانەی تۆتنهام هۆتسبێر لەیاریگای خۆی دوو خاڵی گرنگی لەدەستدا و بە گۆڵێك لەگەڵ یانەی فولهامی میوانی یەكسان بوو.
لەسەرەتاوە یاریزانانی سپێز بەئاستێكی بەرزەوە دەركەوتن و لەگێمی یەكەمدا بەگۆڵێك پێشكەوتن، گۆڵەكەش هاری كەینی هێرشبەری ئینگلیزی لەدەقیقەی 25 تۆماری كرد.
بەڵام لەگێمی دووەمدا سیناریۆی یاریەكە گۆڕا و یاریزانانی فولهام ریزەكانیان رێكخستەوە و توانیان لەدەقیقەی 74 و لەرێگەی ئیڤان كاڤالیرۆ گۆڵی یەكسانكردنەوە تۆمار بكەنەوە.
ئەو ئەنجامە تا فیكەی كۆتایی ناوبژیوان بەردەوام بوو یاریەكە بە یەكسان بوون و بە گۆڵێك بۆ هەردوو یانە كۆتایی هات.
بەو ئەنجامە تۆتنهام بە 30 خاڵ لەپلەی شەشەم جێگیر بوو، لە بەرامبەردا فولهام بە 12 خاڵ لەپلەی 18یەم دەبینرێت.