سەركۆ یونس 11:04 AM - 2026/07/27

سەرکۆ یونس
پرسی خزمەتکردنی هەڵەبجە و ئاوەدانکردنەوەی ئەم پارێزگا تازەیەی هەرێمی کوردستان و عێراق، هەمیشە لە پێشینەی کار و خەمە نیشتمانییەکانی بافڵ جەلال تاڵەبانی، سەرۆکی یەکێتیی نیشتمانیی کوردستاندا بووە. کۆبوونەوەی ئەم دواییەی سەرۆک بافڵ لە دەباشان لەگەڵ خاتوو نوخشە ناسیح، پارێزگاری هەڵەبجە، جارێکی دیکە ئەو ڕاستییەی سەلماندەوە کە خەمخۆریی بۆ هەڵەبجە لای سەرۆکی یەکێتی، ستراتیژێکی نەگۆڕە و بەردەوام لە هەوڵی چڕدایە بۆ سەرپێخستنی تەواوەتیی ئەم پارێزگایە.
ئەم دیدارە تەنها کۆبوونەوەیەکی پرۆتۆکۆڵی ئاسایی نەبوو، بەڵکو دەربڕینی پێزانینێکی قووڵ بوو بۆ پێگەی ژن لە بەڕێوەبردندا، کاتێک سەرۆک بافڵ ستایشی ڕۆڵ و خزمەتەکانی یەکەم پارێزگاری ژنی لەسەر ئاستی هەرێم و عێراق کرد، کە توانیویەتی نموونەیەکی سەرکەوتوو و دڵسۆز لە بەڕێوەبردن و خزمەتکردنی شارەکە و کەسوکاری سەربەرزی شەهیدان پێشکەش بکات.
سەرۆک بافڵ هەمیشە و بەردەوام جەخت لەوە دەکاتەوە کە هەڵەبجە بەهۆی ئەو قوربانییە گەورەیەی لە پێناو ئازادیدا داویەتی، شایستەی باشترین و زیاترین خزمەتگوزارییە. لەم سۆنگەیەشەوە، پشتگیریی تەواوی خۆی و یەکێتیی نیشتمانیی کوردستانی بۆ ڕاپۆرت و داواکارییەکانی پارێزگاری هەڵەبجە دووپاتکردەوە، بە ئامانجی ڕەخساندنی دەرفەتی نوێ، جێبەجێکردنی پرۆژەی خزمەتگوزاریی شایستە و گۆڕینی سیمای شارەکە بەرەو ئاوەدانیی زیاتر.
لەلایەکی دیکەوە، خەمی گەورەی سەرۆک بافڵ خزمەتکردنی زیاتری کەسوکاری شەهیدان و بەرکەوتووانی چەکی کیمیاییە؛ ئەو چینە تێکۆشەر و مەزڵوومەی کە پێویستیان بە چاوپۆشینی بەردەوام و دابینکردنی پێداویستییە تەندروستی و مرۆییەکانە. ئەم پشتیوانییە بەردەوامانە نیشانەی ئەوەن کە سەرۆک بافڵ دەیەوێت بە کردار کار بۆ قەرەبووکردنەوەی مەعنەوی و ماددیی شارەکە بکات و هەڵەبجە لە شارێکی خەمبارەوە بپەڕێنێتەوە بۆ قۆناغی گەشەسەندن و بوژانەوەی ئابووری و گەشتیاری.
کۆبوونەوەی دەباشان پەیامێکی ڕوون بوو بۆ هەمووان: هەڵەبجە بە تەنها نییە و سەرۆک بافڵ لە سەنگەری پێشەوەی داکۆکیکردنە لە ماف و شایستە دارایی و کارگێڕییەکانی ئەم پارێزگایە، تاوەکو بە شێوازێک سەرپێ بخرێت کە لە ئاستی ناو و مێژووی مەزنی هەڵەبجە و خەڵکە تێکۆشەرەکەیدا بێت.