.
11:47 AM - 12/01/2018
لەشاری سلێمانی، هێرۆ ئیبراهیم ئەحمەد ئەندامی مەكتەبی سیاسی یەكێتیی نیشتمانیی كوردستان، پێشوازیكرد هەڤاڵانی مەڵبەندی رێكخستنی خانەقینی یەكێتی و ژمارەیەك لە لێپرسراوانی ئیداری شارەكە، لەدیدارێكدا بارودۆخی سیاسیی و ئەمنییی و ئیداری خانەقین لەگەڵ رۆڵ و سیاسەتی یەكێتیی نیشتمانی بۆ دەربازبوون لەكێشە و قەیرانەكان و هەنگاونان بۆ كۆنگرەی چوارەمی یەكێتی تاوێكرا.
لە دیدارەكەدا كە دكتۆر خەسرەو گوڵ محەمەد و قوباد تاڵەبانی ئامادەی بوون، شێركۆ میروەیس لێپرسراوی مەڵبەندی خانەقینی یەكێتی بەناوی ئامادەبوان و ئەندام و لایەنگرانی سنوری مەڵبەندەكەوە خۆشحاڵیی نیشاندا بەو دیدارە، ئاماژەیكرد بۆ رۆڵی كادیرانی یەكێتیی نیشتمانیی لەو سنورە بۆ پێكەوەژیان و تەبایی و رێكخستنی جەماوەر و تەیاركردنیان بەچەكی ورەبەرزیی و نوچنەدان لەبەردەم هەڕەشەكان.
لێپرسراوی مەڵبەندی خانەقینی یەكێتی راشیگەیاند: لە راپەڕاندنی ئەركەكانماندا لەهەردوو ئاستی حزبیی و كۆمەڵایەتیش هەمیشە رێنمایی و روانینی حەكیمانەی سەرۆك مام جەلال دەكەینە ئیلهامی كارەكانمان، بەردەوامیش گرنگی پاراستنی یەكریزیی نێو یەكێتیی و كاری پێكەوەیی رەچاو دەكەین و سیاسەتی چەپكە گوڵەكەش رێنمای كارەكانمانە كە دەتوانین لێوەی خزمەت بەكۆمەڵانی خەڵك بكەین و گەشەش بەحزبەكەمان بدەین.
لەو دیدارەدا، هێرۆ ئیبراهیم ئەحمەد ئاڕاستەی سیاسەت و ستراتیژی یەكێتیی نیشتمانیی كوردستانی بۆ دەربازبوون لە قەیران و كێشەكان روونكردەوە و پێویستی بەستنی كۆنگرەی بۆ نوێبوونەوە و یەكخستنەوەی زیاتری ریزەكانی یەكێتی دووپاتكردەوە.
لەبەشێكی دیكەی دیدارەكەدا، بیروڕا سەبارەت بە دۆخی یەكێتی و چۆنیەتی زەمینەسازی و هەنگاونان بۆ ئەنجامدانی كۆنگرەی چوارەمی یەكێتیی نیشتمانی ئاڵوگۆڕكرا.
هەر لەمیانەی دیدارەكەدا، كادیرانی بەشداربووی كۆبوونەكەوە لەگەڵ خستنەڕووی پێشنیاز و تێبینیەكانیان بۆ باشتر ئەنجامدانی كار و چالاكییەكانیان لەپێناو خزمەتكردنی كۆمەڵانی خەڵك، دووپاتیشیانكردەوە: هەردەم درێژە بە رێباز و روانینە واقیعیەكانی سەرۆك مام جەلال دەدەن بۆ یەكڕیزی نیشتمانیی و یەكێتیی ناو ریزەكانی یەكێتیی نیشتمانیی.
كادیرانی سنوری مەڵبەندی خانەقینی یەكێتی، باسیان لەوەشكرد: هەوڵەكانی سەرۆك مام جەلال بۆ بەدیهێنانی ئاشتەوایی و پێكەوەژیانی پێكهاتەكانی خانەقین و پارێزگاریكردن لەمافەكانیان هەرگیز لەبیرناكرێت.
لای خۆشیەوە، هێرۆ ئیبراهیم ئەحمەد ستایشی كار و چالاكییەكانیانی كادیرانی سنوری مەڵبەندی خانەقینی كردو رۆڵ و خۆراگری كادیرانیشی لەم دۆخەی ئێستادا بەرزنرخاند.
لە تۆڕە کۆمەڵایەتیەکان شەیری بکە
