.
10:53 AM - 26/09/2022
هەڵزنان بە كێوی یەكێتیدا
ئازاد ئیبراهیم ئەحمەد
هەر مرۆڤێك بۆ جارێكیش لە نزیك كێوەكان هاواری كردبێت، چەندە قورسایی خستبێتەسەر قوڕگی، رەنگە تەنها بۆ چەندجارێك گوێی لە شەپۆلەكانی دەنگی خۆی بووبێت و بەس، ئیدی ئەو دەنگە لە قووڵایی كێوەكاندا بزر دەبێت و كێوەكان ئەو دەنگانە لە هەناوی خۆیاندا هەڵدەلوشن.
ئەم تەعبیرە بۆ خودی مرۆڤیش راستە، زۆرجار مرۆڤ بۆئەوەی بیەوێت دەنگ و قورسایی و مێژووی خۆی بزانێت، بە كێوی گەورە و دڕناڵی كەسێكی دیكەدا دەئاڵێت، ئەمەش بەو هیوایەی وێنەیەك بۆ خۆی دروست بكات هێندەی ئەو وێنەیە ببێت كە موڵكی ئەو نییە و هەر هاواركردنێكیش تێیدا هەر زوو ون دەبێت.
ماوەیەكە لێرە و لەوێ، هەندێك كەس و لایەن، لە پەتەكی و خۆشخوانی شارەوە بە مێژووی پڕ سەركەوتن و نەبەردییەكانی رابردووی یەكێتیی نیشتمانیی كوردستاندا دەئاڵێن و دەیانەوێت قەبارەی هاوار و وجودی خۆیان لەپاڵ كێوی گەورەی یەكێتیدا بزانن، هەوڵی ئەو كەس و لایەنانە کە لاپەڕەكانی مێژوویان بچووكە، نەك رەنگی دەریای پڕ خوێنی یەكێتی ناگۆڕێت و لێی كەم ناكاتەوە، بەڵكو دەیانەوێت بە خوێنی شەهیدانی یەكێتی و بە دزینی چەندان لاپەڕەی پڕ سەروەریی یەكێتی، سووكە مێژوویەك بۆ خۆیان پێكەوە بنێن و لانیكەم چەند تاتەیەك بە كێوی یەكێتیدا هەڵبزنێن، بەڵام چونكە ئەوان كوانوویان بە هەتاوی گەرمەسێر تاوی نەگرتووە و پەنجەكانیان بە بەفری كوێستانەكانی كوردایەتی نەتەزیوە، ئەوا ئەستەمیشە بتوانن بگەنە لووتكەی پڕ سپێتی و پاكێتی یەكێتی و ناشیرینی بكەن و لێی كەم بكەنەوە.
هەڵزنان بە كێوی مێژووی یەكێتیدا، تەنها پێنووسێك و دەفتەرێك و بیرێكی كولی ناوێت، بەڵكو دەشت و دۆڵ و شار و شاخی كوردستان و خوێنی شەهید و ئازاری نیشتمان و شاهیدی نەیارەكانی كوردیشی دەوێت، تاكو شاهیدیت بۆ بدەن و رێگەی نووسینەوەی مێژووت پێ نیشان بدەن، ئەمەش وەك چۆن هەموویان پێكەوە شاهیدی بۆ مێژووی گەورە و پڕ سەروەریی یەكێتی و شەهیدانی یەكێتی دەدەن و هەموان پێكەوە ئەو مێژووە دەنووسنەوە.
تۆ، كە وشكە كەڵەك و كڵۆسمت لەژێر پێیەكانت داناوە و دەتەوێت باڵای مێژووت هێندەی باڵای مێژووی یەكێتی كەڵەگەت بێت، ئەوا زەمانەتی هەرەس نەهێنان و مانەوەت نییە.
تۆ، كە فەقیانەی گەنجی و پیریت لە قوڕاوی هەموو كارەساتە دڵتەزێنەكانی كورد ناوە، ئەستەمە دامێنی كراسی كوردایەتی و خەباتی دیموكراسیانەت بەسەدان ئاوی تۆمەتهەڵبەستن و هەڵشاخان بە باڵای یەكێتیدا پاك بێتەوە و بە دوعاكانت دژی یەكێتی بگوترێت ئامین.
ئەی پێنووسی دادراو بە دەستی ئەوێكی نا كورد لەودیو دیوارەكانی كوردایەتییەوە، ئەم تیانووسی كوردایەتییە لە رابردوو، لە ئێستا و لە داهاتووشدا جێگەی دێڕێكی نەماوە یەكێتیی نیشتمانیی كوردستان بە بۆشایی جێیهێشتبێت، ئێوە نە دەتوانن ئەم سەروەرییانەی یەكێتی بسڕنەوە و نە دەشتوانن لە پەنا ئەم مێژووە گەورەیەی یەكێتییەوە مێژوویەكی دیكە دابتاشن و ئەم سوارچاكی كوردایەتییە بگلێنن.
لە تۆڕە کۆمەڵایەتیەکان شەیری بکە
