مەكتەبی رێكخراوە دیموكراتییەكان لەگەڵ میدیاكارانی یەكێتی كۆبووەوە مەكتەبی رێكخراوە دیموكراتییەكانی یەكێتیی نیشتمانیی كوردستان، لەگەڵ ژمارەیەك لە رۆژنامەنووسانی سەربە كەناڵ و دامەزراوە میدیاییەكانی یەكێتی ئەندامانی سەندیكای رۆژنامەنووسانی كوردستان كۆبوونەوە.لە كۆبوونەوەكەدا جوتیار نوری لێپرسراوی مەكتەبی رێكخراوە دیموكراتییەكان بایەخی هەماهەنەنگی نێوان رۆژنامەنوسانی یەكێتیی و خەباتی پیشەیی و ئازادی رادەربڕینی و ئازادی كاری میدیایی كردەوە و پشتیوانی یەكێتیی بۆیان دووپاتكردەوە، لەكۆبوونەوەكەدا كە ستران عەبدوڵا لێپرسراوی مەكتەبی راگەیاندن و فریال عەبدوڵلا لێپرسراوی بۆردی رێكخراوە پیشەییەكان و بژار حەكیم جێگری نەقیبی سەندیكای رۆژنامەنووسانی كوردستان ئامادەیبوون بەشداران تیشكیان خستەسەر كێشە و گرفت و بەربەستەكانی ئازادی وتن و بڵاوكردنەوە و كێشەكانی بەردەم لقەكانی سەندیكا و ئەندامانی ئەو سەندیكایە.دواتر دەرگای گفتوگۆ بۆ ئامادەبوان كرایەوە و قسەوباس لەسەر تەواوی تەوەرە گرنگەكان كرا، كۆبوونەوە رەخنەی لە فشارخستنە سەر سكرتێری لقی سلێمانی سەندیكای رۆژنامەنووسانی كوردستان و بەربەستكردنی خەباتی سەندیكایی گرت هەروەك ئیدانەی فەرامۆشكردنی كەناڵەكانی راگەیاندنی یەكێتی و بەگشتی كەناڵەكانی سنووری سلێمانی لە كۆنگرە رۆژنامەنووسییەكەی سەرۆكی حكومەتی هەرێم كرا كە درێژەی هەمان نەریتی فەرامۆشكردنی سلێمانی و زۆنی سەوزە.كۆبوونەوە هەروەها بایەخی پەرەپێدانی ئازادی رۆژنامەنووسی و ماف و ئازادییە گشتییەكانی دووپاتمردەوە و ئیدانەی فشار و سزادانی رۆژنامەنووسانی دەڤەری بادینانی كرد كە ئەم دیاردە نەخوازراوە هەم ناوبانگی دیموكراتی هەرێم و هەمیش پاشەكشێی خەباتی میدیایی بەدواوە دەبێت.
