‎
کۆبوونەوەیەکی رەسمی و گرنگ لە نێوان نوێنەرانی «ماڵی کوردی لە پۆرتسمۆس
» و نوێنەری ئەنجومەنی پارێزگای پۆرتسمۆس (Portsmouth City Council) بەڕێوەچوو، بە مەبەستی تاوتوێکردنی پڕۆژەی ستراتیژیی ڕاگەیاندنی ڕێککەوتنی دەستەخوشکی (Sister City Agreement) لە نێوان هەردوو شاری پۆرتسمۆسی بەریتانیا و هەڵەبجەی پایتەختی ئاشتی لە هەرێمی کوردستان.
‎ئەم کۆبوونەوەیە کە ئەمڕۆ چوارشەممە (١٠ی حوزەیرانی ٢٠٢٦) بەڕێوەچوو، دەرەنجامی هەوڵە بەردەوام و چڕەکانی ماڵی کوردی بوو لە شاری پۆرتسمۆس بۆ دروستکردنی پردێکی مێژوویی و کولتووری لە نێوان هەردوو شارەکەدا.
‎تەوەرە سەرەکییەکانی کۆبوونەوەکە:
‎مێژووی هاوبەش و فریاکەوتن لە خۆڵەمێشەوە: لە کۆبوونەوەکەدا تیشکخرایە سەر مێژووی هاوبەشی هەردوو شار وەک دوو سیمبولی قوربانیی جەنگ کە توانیویانە لە سەرلەنوێ ژیانەوە بنەخشێنن؛ شاری پۆرتسمۆس کە لە جەنگی جیهانیی دووەمدا ڕووبەڕووی وێرانکاری بووەوە، لەگەڵ شاری هەڵەبجە کە دوای کارەساتی کیمیاباران وەک ناسنامەی خۆڕاگری سەریهەڵدایەوە.
‎هەماهەنگیی زانستی و ئەکادیمی: گفتوگۆ لەسەر دروستکردنی پردی پەیوەندی لە نێوان زانکۆی پۆرتسمۆس و زانکۆی هەڵەبجە کرا، بەتایبەتی لە بوارەکانی توێژینەوەی ژینگەیی، ئاڵوگۆڕی خوێندکاران و پەرەپێدانی توانای ئەکادیمی.
‎پەیوەندیی کولتووری و مۆزەخانەکان: پێشنیاری پڕۆژەی هاوبەش لە نێوان مۆزەخانەکانی پۆرتسمۆس و مۆنۆمێنتی هەڵەبجە کرا، بە ئامانجی گەیاندنی پەیامی ئاشتی بە جیهان و ئەرشیفکردنی مێژوویی هاوبەش.
‎
‎لایەنی بەریتانی و نوێنەری ئەنجومەنی پارێزگای پۆرتسمۆس پێشوازییەکی گەرمیان لە پڕۆژەکە کرد و بایەخێکی زۆریان بە ڕەهەندە جیاوازەکانی دا. پشتیوانی بێفەرمانی خۆیان بۆ ئەم هەنگاوە مرۆیی، زانستی و کولتوورییە دەربڕی کە دەبێتە هۆی قووڵکردنەوەی پەیوەندیی نێوان گەلی کورد و بەریتانیا.
‎لە کۆتاییدا، «ماڵی کوردی پۆرتسمۆس» دووپاتی کردەوە کە بەردەوام دەبێت لە هەماهەنگیی چڕ و ڕاستەوخۆ لەگەڵ پارێزگای هەڵەبجە و ئەنجومەنی پۆرتسمۆس، تاوەکو ئەم پڕۆژە نیشتمانی و گەورەیە دەگاتە قۆناغی کۆتایی و ئیمزاکردنی رەسمی لە نێوان سەرۆکایەتیی شارەوانیی هەردوو شاردا.