.
07:33 PM - 14/03/2023
سیهـ و پێنج ساڵان ل پێشی نوكە، دگەل بەڕژەنگێن بوهارێ و بشكڤینا سیسن و بیتانۆكان، ل سپێدەیەكێ كو خەملا سرۆشتی و بێگوننەهیا زارۆكان هەڤدوو هەمبێز دكر، رژێما بەعسا گۆڕ بگۆڕ ب مەبەستا قڕكرنا ژیانێ، باژاڕێ هەڵەبجە و خەلكێ ب چەندین جورێن چەكێ قەدەغەكری لسەر ئاستێ نێڤدەولەتی (چەكێ كیمیاوی) بۆردوومانكرن، دئنجامدا زێدەتر ژ پێنج هزار كەسێن سڤیل ژ (ژن، زارۆك، گەنج، دانعەمر) شەهید بوون و بهزاران وەڵاتیێن دی برینداربوون كو هژماركا زۆر ژوان پشتی دەمێن درێژ دگەل برینێن كوور دەربازكرین، گیانێ خۆ ژدەستدا و هەتا نوكە ژی هژمارەكا زۆر ماییە دگەل وان برینان دناڵن، ئەڤە ژبلی وێرانكاریا بسەر هەڵەبجەدا هاتی، تەڕ و هشك و هەتا گیانەوەر ژ وێ تاوانا دژی مرۆڤاتیێ قورتال نەبوون.
برینێن خەلكێ هەڵەبجە نە تنێ ئەو برینن یێن دجەستەیێ واندا ماین، بەلكو برینا هەرە مەزن و تیمار نەبیت، شینوارێن وێ كریارا هۆڤایەتی نە كو ماینە د دەروونێ خەلكێ وی باژاڕی و هەر تاكەكێ كورد و هەر كەسەكێ مرۆڤ دوست لسەر روویێ ئەردی كو ئاگەهداری وێ تاوانێ ببیت.
تاوانا كیمیابارانا هەڵەبجە و كۆمكوژیا خەلكێ وێ د دیروكا مرۆڤاتیێدا نە كێمترە ژ تاوانێن هۆڵۆكۆست و هێڕۆشیما و ناكازاكی و كۆمەڵكوژیا گەلێ كەمبۆدیا و جینۆسایدكرنا گەلێ ئەرمەن و گەلەك تاوانێن دی یێن مرۆڤاتی، كو لهەمبەر خەلكەكێ ئازادیخواز و ستەمدیتی هاتینە ئەنجامدان، بەلكو كیمیا بارانكرنا هەڵەبجە مەزنترین و دیارترین تاوانە ل دژی مرۆڤاتیێ ل پاش شەڕێ جیهانیێ دوویێ هاتییەكرن.
• هەرچەند بۆ یادا كیمیابارنكرنا هەڵەبجە یا ئەڤ ساڵە جڤاتا وەزیرێن عیراقێ بڕیارا دووماهیێ دا دەربارە پارێزگەهبوونا هەڵەبجە، بەلێ گرنگە پشتی وێ بڕیارێ هەوڵێن مەزنتر ژلایێ هەردوو حكومەتێن بەغدا و هەولێر ڤە بهێنە دان بۆ زێدەتر خزمەتكرنا وی باژاڕی و خەلكێ وی.
• وەكو هەرساڵ دهێتە گوتن و ڤەگێڕان، هەوڵێن رژد لسەر ئاستێ نێڤدەولەتی بهێنە دان بۆ بجینۆساید ناساندنا كیمیابارانكرنا هەڵەبجە كو تاوانەكە ل دژی مرۆڤاتیێ هاتییە ئەنجامدان.
• نە بتنێ حكومەت و دەستهەڵاتدارێن هەرێما كوردستانێ ل (16) ئادارێ ب پێنج دەقیقێن راوستانێ بیرەوەریا كیمیابارانكرنا هەڵەبجە ساخ بكەن، بەلكو بەردەوام ئەو كریارا هۆڤانە و قوربانیێن وێ دهزر و بەرنامێ كارێ حكومەت و حزب و لایەنێن سیاسی دابن.
• لایەنێن سیاسی و فڕاكسیۆنێن كوردی دجڤاتا نوونەراندا پڕۆژێن قەرەبووكرنا خەلكێ زیانڤێكەتی و بلندكرنا ئاستێ مەعنەویێ وی باژاڕی بۆ جڤاتا نوونەرێن عیراقێ ئاراستە بكەن و هەموو پێكڤە لسەر كاربكەن.
د (35) مین ساڵرۆژا كیمیابارنكرنا هەڵەبجەدا، خەم و هەڤخەمیا مە یا رۆژانە و بەردەوامە بۆ قوربانیان و كەسوكارێن وان.
پەڕلەمانتار/ ئیمان عەبدولرەزاق ئامێدی
ئەنداما جڤاتا سەركردایەتییا (ی.ن.ك)
لە تۆڕە کۆمەڵایەتیەکان شەیری بکە
