میدیاکانی یەکێتی، ئێمەش لە دیموکراسی تێدەگەین

01:51 PM - 26/04/2021

ئازاد ئیبراهیم ئەحمەد

لە رۆژانی رابردوودا نووسینێكی بە ئینسافم بەرچاوكەوت لە تۆڕە كۆمەڵایەتییەكان، كە باسی لە میدیای یەكێتیی نیشتمانیی كوردستان دەكرد، بۆچی زۆر سەرۆكاریی نییە لەگەڵ كچانی بەناو مۆدێل و فاشیۆن و ...هتد؟
هەر لە ماوەكانی رابردوودا وەزارەتی رۆشنبیری چەند بەرنامەیەكی راگرت بە بیانووی كاریگەریی نەرێنی ئەم بەرنامانە لەسەر خێزانی كوردی بەتایبەتی و كۆمەڵگە بە گشتی.

لە هەردوو پرسەكەدا میدیای یەكێتی بە دوورە لەم شێوە بەرنامانە و بە لای پرسی لەم شێوەیەدا نەچووە و ناچێت، میدیای یەكێتی نە گرنگی بە كچانی مۆدێل دەدات و نە وەك كاڵایەك و بۆ زیاتركردنی بینەرانی ئەم كچە مۆدێلانە دێنێتە سەر شاشە و پرسیاری نامۆ بە كەلتووری كوردییان لێ دەكات، چونكە خەمی یەكێتی و میدیاكانی، شێواندنی شیرازەی خێزانی كورد نییە، بەڵكو خەمە گەورەكەی سەركردایەتیی یەكێتی و یەكێتی و میدیاكانی یەكێتی خەمە نەتەوەیی و نیشتمانییەكەی كوردە و ئێستا میدیای یەكێتی بە گرنگی نازانێت تەواوی فۆكسی لەسەر كچە مۆدێلێك و درامایەكی بیانی بێت.

ئەگەر بوونی بەرنامە گەلێكی نامۆ بە كۆمەڵگەی كوردی و هێنانی چەندان كچە مۆدێل بۆ سەر شاشە و پەخشكردنی فیلم و درامای بیانی هێما بێت بۆ دیموكراسی و لیبرالیزم، ئەوا ئێمە باش لە دیموكراسی تێدەگەین و هیچ هێزێكی سیاسی نییە لە باشووری كوردستان هێندەی یەكێتیی نیشتمانیی كوردستان قوربانیی دابێت لەپێناوی ئازادیی و دیموكراسی، دەتوانین بڵێین یەكێتی وەك چۆن لەلایەك دایكی دیموكراسییە لە باشووری كوردستان، بەوجۆرەش بەرهەمهێنەری میدیای دایكە و دەیتوانی پێش زۆرێك لە كەناڵەكانی دیكە ئەكتەرە بیانی و بەناو كچە مۆدێلەكان بێنێتە سەر شاشە و دراما بیانییەكان بخزێنێتە ناو چوارچێوەی خێزانی كوردییەوە و شیرازەی خێزانی كوردی بەرەو لایەكی دیكە بەرێت. میدیای یەكێتی نەك ئەوە ناكات، بەڵكو میدیای یەكێتی خۆی بە بەرپرسیار دەزانێت لە بەرامبەر تەواوی تاك و كۆمەڵگەی كوردیدا و بەدرێژایی مێژووی میدیای یەكێتی دوور بووە لە هەر بەرنامە و درامایەكی بیانی كە كاریگەریی نەرێنی هەبووبێت.

یەكێك لە تایبەتمەندیی و جوانییەكانی میدیای یەكێتی بە ئێستاشەوە ئەوەیە كە هەمیشە لە هەوڵی بەرگریی و پاراستنی جوانییەكانی كۆمەڵگەی كوردی و كەڵچەر و فەرهەنگی كوردیدایە، هەر تایبەت بەم بابەتە ئەگەر بگەڕێینەوە بۆ ساڵانی رابردوو، كاتێك میدیایەكی یەكێتی بڕیاریدا تەواوی دراما توركییەكان لەسەر شاشەكەی بووەستێنێت، دەوترا كە كۆمپانیا توركییەكان مافی پەخشیان لە كەناڵەكەی یەكێتی وەرگرتۆتەوە، بەڵام هەرزوو دەركەوت ئەوەی لەپشت وەستانی دراماكانەوە بووە، سیاسەتی میدیاكانی یەكێتی بووە وەك بەرپرس و خەمخۆری كۆمەڵگەی كوردی نەك وەرگرتنەوەی مافی پەخشكردنی ئەو درامایانە لە كەناڵێكی یەكێتی.

میدیاكانی یەكێتی یەكەم و دوایین میدیای كوردی دەبن كە تاكی كورد ئاراستە بكات بەرەو تێگەشتن لە چەمكەكانی دیموكراسی و ئازادیی نۆشین و پۆشین و یەكەم میدیای كوردیشە كە داكۆكیكارێكی تەواوەتی مافەكانی هاووڵاتیان و پاراستنی بەها مرۆییەکانی تاكی كوردە، بەڵام هەرگیز ئەم داكۆكیكردنە لە رێگەی دراما و گۆرانی و مۆدێلیست و چەندان پرسیاری نامۆوە ناكات تەنها بۆئەوەی بینەری خۆی پێ زیاد بكات.

ئەگەر درەنگیش بێت، دواجار بینەری هۆشیار و تێگەشتوو لەو واقیعە تێدەگات كە میدیای یەكێتی ئەو میدیا پرۆفیشناڵ و پڕ ئەتەكێتەیە كە بینەری كورد بە گێل و نەزان نازانێت و لە رێگەی بەرنامە و ئامانجە نەتەوەیی و نیشتمانییەكەیەوە بەها بۆ تەواوی تاكی كورد و بینەری كورد دەگێڕێتەوە.