.
05:17 PM - 25/09/2019
نیوەڕۆی ئەمڕۆ چوارشەممە ٢٥/٩/٢٠١٩ لەشاری سلێمانی كۆسرەت ڕەسوڵ عەلی جێگری سكرتێری گشتی یەكێتی نیشتمانی كوردستان پێشوازیكرد لە ئەمینداری گشتی و ئەندامانی دەستەی ئەمینداریەتی ڕێكخراوی ئاشتی جیهانی.
لە دیدارەكەدا كە هەر یەك لە عیماد ئەحمەد و ڕەفعەت عەبدوڵا ئەندامانی مەكتەبی سیاسی و بەرزان ئەحمەد كوردە ئەندامی سەركردایەتی ئامادەی بوون، گفتوگۆكرا لەبارەی كارەكانی ڕێكخراوەكەو هەوڵەكانی یەكێتی بۆ بەرقەراركردنی ئاشتی لە ناوچەكەدا.
كۆسرەت ڕەسوڵ عەلی بەوەفدی میوانی ڕاگەیاند كە یەكێتی نیشتمانی كوردستان هەڵگری مەشخەڵی ئاشتی و پێكەوەژیانەو لە سەرەتاوە هەوڵی بۆی داوەو لە داهاتووشدا هەوڵی جدی دەدا بۆ بەرقەراركردنی ئاشتی لە ناوچەكە.
لای خۆیانەوە وەفدی میوان ئامانجی سەردانەكەیان بۆ كوردستان خستەڕوو و ڕایانگەیاند: كە دەیانەوێ لەڕێگای پڕۆژەی گەورەی ئابوورییەوە ئاشتی بەرقەرار بكەین و دەرفەتی یەكسان بۆ هەمووان دابین بكەن و هەرێمی كوردستان وەك نموونەیەكی جوانی ئاشتی و پێكەوەژیان نیشانی وڵاتانی ناوچەكە بدەن.
جێگری سكرتێری گشتی وێڕای دەستخۆشی لە كارەكانی ڕێكخراوەكە داوای كرد لە سێكتەرەكانی پەروەردە، خوێندنی باڵاو كشتوكاڵ، تەندروستی و ئابووری هاوكاری هەرێمی كوردستان بكەن و پڕۆژەكانیان لەم سێكتەرە جیاوازانە بخەنەكار.
كۆسرەت ڕەسول كورتەیەكی لەبارەی مێژووی بزووتنەوەی ڕزگاریخوازی گەلی كورد و شۆڕشەكانی كوردو دۆخی ئەمڕۆی كوردستان پێشكەشی ئامادەبووان كرد و جەختی لەوەكردەوە: كە كێشەی كورد تەنها بە ئاشتی و دیالۆگ و بەڕێگای دیموكراسیانە چارەسەر دەكرێ و وەك هەموو گەلانی دنیا گەلی كوردیش خاوەن ناسنامەی نەتەوەیی خۆیەتی.
لەكۆتایی دیدارەكەداو لەبەرامبەر هەوڵەكانی بۆ بەرقەراربوونی ئاشتی لەناوچەكە مەدالیای ڕێزلێنانی ڕێكخراوی ئاشتی جیهانی بەخشرایە كۆسرەت ڕەسول عەلی.
فۆتۆ هاوژین شەریف
لە تۆڕە کۆمەڵایەتیەکان شەیری بکە
