.
02:59 PM - 15/09/2019
كۆسرەت ڕەسول عەلی لەگەڵ فەرماندەیی هێزەكانی حەفتا كۆبۆوە پێش نیوەڕۆی ئەمڕۆ یەكشەممە ١٥/٩/٢٠١٩ لە شاری سلێمانی، كۆسرەت ڕەسول عەلی جێگری سكرتێری گشتی یەكێتی نیشتمانی كوردستان بەهاوڕێیەتی حاكم قادر حەمەجان ئەندامی دەستەی كارگێڕی سەردانی فەرماندەیی هێزەكانی ٧٠ی كرد و لەلایەن فەرماندەكانی هێزی پێشمەرگەوە پێشوازی لێكرا.
سەردانەكەی كۆسرەت ڕەسول بەمەبەستی ماڵئاوایی كردن لە شێخ جەعفەر مستەفا و دەستبەكاربوونی مستەفا چاوڕەش وەك فەرماندەی هێزەكانی حەفتا بوو ڕێكخرابوو. لە كۆبوونەوەكەدا كە هەریەك لە شێخ جەعفەر شێخ مستەفا، مستەفا چاوڕەش و لاهور شێخ جەنگی و فەرماندە سەربازییەكان ئامادەی بوون، كۆسرەت ڕەسول عەلی وتەیەكی پێشكەشكردو پیرۆزبایی خۆی ئاراستەی شێخ جەعفەر مستەفا كرد كە وەك جێگری سەرۆكی هەرێمی كوردستان دەستبەكاربووەو پۆستی فەرماندەیی هێزەكانی حەفتا جێدێڵێ.
لە بەشێكی تری وتەكانیدا جێگری سكرتێری گشتی ستایشی ڕۆڵی هێزەكانی پێشمەرگەی كوردستانی كرد كە لە ناخۆشترین و سەختترین ڕۆژەكاندا بەرگریان لە خاكی پیرۆزی كوردستان كردووەو پاراستوویانە. كۆسرەت ڕەسول ستایشی ڕۆڵی شێخ جەعفەری كرد كە لەماوەی كاركردنیدا وەك فەرماندەی هێزەكانی حەفتا و فەرماندەیەكی مەیدانی لەجەنگی دژ بەداعش و سەردەمی خەباتی شاخ ڕۆڵی قارەمانانەی هەبووەو هیوای خواست لە ئەركی نوێشیدا بەردەوام بێ لەسەر خزمەتكردن. هەروەك وتیشی كاك مستەفا لەهەر پلەو پۆستێك بێ مستەفا چاوڕەشەو پیاوێكی تێكۆشەرو قارەمانە.
جێگری سكرتێری گشتی لەدرێژەی وتەكانیدا كورتەیەكی لەبارەی دۆخی یەكێتی پێشكەشكردو دووپاتی كردەوە كە پاراستنی یەكێتی ئەركی هەموومانە و ڕاشیگەیاند كۆنگرەیەكی یەكێتیانە دەكەین بۆ ڕێكخستنەوەو نوێكردنەوەی یەكێتی. دواتر هەڤاڵانی بەشداربووی كۆبوونەوەكە ڕاو بۆچوونی خۆیان دەربڕی و پیرۆزبایی دەستبەكاربوونیان هەڤاڵان لە شێخ جەعفەر مستەفا و مستەفا چاوڕەش كرد.
لە تۆڕە کۆمەڵایەتیەکان شەیری بکە