.

05:15 PM - 22/01/2026

خۆبەڕێوەبەری رۆژئاوا رایدەگەیەنێت، گرووپە چەكدارەكانی سەربە دیمەشق لە هێرشی دڕندانە بۆ سەر هاووڵاتیانی مەدەنی لە كۆبانێ و جزیرە بەردەوامن .   
خۆبەڕێوەبەری رۆژئاوا راگەیەندراوێكی لەبارەی دۆخی ناوچەكە بڵاوكردەوە و تێییدا، پابەندبوونی تەواوی خۆی بە ئاگربەستی راگەیەندراو لەگەڵ دیمەشق دووپاتكردووەتەوە. بەڵام رایگەیاندووە، گرووپە چەكدارەكانی سەر بە حكومەتی كاتیی دیمەشق، بە ئەنقەست و سیستماتیك، لە پێشێلكردنی رێككەوتنی ئاگربەست بەردەوامن، ئەوەش لە رێگەی هێرشی دڕندانە بۆ سەر خەڵكی مەدەنی و ناوچەكانیان، بەتایبەتی لە شاری كۆبانێ و ناوچەی جزیرە.
خۆبەڕێوەبەری رۆژئاوا رایگەیاندووە، ئەوەی ئەمڕۆ رووبەڕووی كۆبانی دەبێتەوە، تەنها هێرشێكی سەربازی نییە، بەڵكو تاوانێكی جەنگی تەواوەتییە. كۆبانێ كە نوێنەرایەتی خاڵی وەرچەرخانی مێژوویی و سەرەتای نەهێشتنی گرووپی تیرۆریستی داعشی دەكرد، كە مەترسییەكی راستەقینەی بۆ سەر هەموو مرۆڤایەتی دروستكردبوو، ئەمڕۆ دەكرێتە ئامانج. هەروەها، كۆبانی كە بەرگری لە جیهان كرد، لە ئەنجامی هێرشە بەردەوامەكان، بێ ئاو و كارەبا و خزمەتگوزارییە سەرەتاییەكانە.
ئاماژەی بەوەكردووە، ئەوەی لە كۆبانی و ناوچەی جزیرە و بە تایبەت بەرامبەر بە گەلی كورد روودەدات، شەڕێكی سیستماتیكی قڕكردنە، بە ئامانجی شكاندنی ئیرادەی گەلەكەمان و كۆتاییهێنانە بە دەستكەوتەكانیان. 
خۆبەڕێوەبەری رۆژئاوا وێڕای ئیدانی ئەو هێرشانە، داوا لە كۆمەڵگەی نێودەوڵەتی  و هاوپەیمانی نێودەوڵەتی دژی داعش دەكات، دەستوەردانێكی بەپەلە و دەستبەجێ بكەن بۆ وەستاندنی ئەو هێرشانە و كۆتاییهێنان بەو تاوانە جەنگییانەی كە لە دژی خەڵكی مەدەنی ئەنجام دەدرێن.
هاوكات بۆ بەرگریكردن لە دەستكەوتەكان و بەرخۆدان بانگەوازێك ئاراستەی گەلی كورد و دۆستانی دەكات و دەڵێت، ئەمڕۆ رۆژی یەكگرتنی نەتەوەییە، رۆژێكە كە كورد لە هەموو پارچەكانی كوردستاندا بە یەكرێزیی لە بەرامبەر جینۆسایددا وەستاوە، مێژوو ئەم خۆڕاگرییە تۆمار دەكات‌و گەلی كوردیش بە خۆڕاگری دەمێنێتەوە.