.
07:21 PM - 27/10/2025
لە فەلسەفەی کۆنی یۆنانیدا، سوقرات دەیگوت ناسینی خود دەستپێکی دانایییە. وتە کاریگەرەکەی سەرۆک بافڵ جەلال تاڵەبانی "ڕکابەری یەکێتی هەر یەکێتییە" ڕووبەڕووی هەمان ئەو حەقیقەتە قووڵەمان دەکاتەوە - بەڵام بە جامەیەکی نوێ و هاوچەرخ. لە ڕواڵەتدا سادە، بەڵام لە ناوەڕۆکدا هەڵگری فەلسەفەیەکی قووڵە - نەک هەر بۆ حزبێک، بەڵکوو بۆ هەر دامەزراوە و هەر کەس و هەر کۆمەڵگەیەک، دەتوانێ ببێتە سەرچاوەی ئیلهام و گەشەکردن.
هێگڵ باسی لەوە دەکرد گەشەکردن هەمیشە لە ڕێگەی دژیەکییەوە ڕوودەدات. کاتێک دەڵێین ڕکابەری خۆمان هەر خۆمانین، ئەم دژیەکییە دەخەینە ناو خۆمانەوە و دەیکەینە هێزێکی بونیادنەر. بە نموونە، وەرزشوانێک لەگەڵ خۆی ڕادەبێ، هەوڵدەدات ڕیکۆردی دوێنێی خۆی بشکێنێت. ئەم ڕکابەرییە ناوخۆییە نەک تەنها دوژمنایەتی نییە، بەڵکوو سەرچاوەی بەردەوامی پێشکەوتنە.
کاتێک سەرۆک بافڵ لە میانەی هەڵمەتی هەڵبژاردن و بانگەشە بۆ لیستی ٢٢٢ی یەکێتی دەڵێت تەنها ڕکابەری خۆمان هەر خۆمانین، دەیەوێ بڵێ لە یەکێتییدا هیچ پاساوێک نەماوە بۆ شکست. سەردەمی ئەوان باشتر بوون و بارودۆخەکە لەبار و لە بەرژەوەندیدا نەبوو، بەسەرچوو و ئێستا هەر خۆمان بەرپرسین. ئەم بەرپرسیارێتییە ڕەهایە لە ڕواڵەتدا هەرچەند قورس دیاربێت، بەڵام لە ڕاستیدا ڕزگارکارە. چونکە کاتێک خاوەندارێتی خۆت و بەرپرسیارێتی سەرشانت هەڵدەگریت، ئەوا دەبیت بە خاوەنی دەسەڵات و بڕیارەکانی خۆیشت.
لە فیزیای کوانتەمدا، تەنۆلکەیەک دەتوانێت لە هەمانکاتدا لە دوو شوێن بێت. بە هەمان شێوە، کاتێک یەکێتی دەبێتە ڕکابەری خۆی، ئەوا لە یەککاتدا هەم یەکە و هەم فرەیە. ئەمە واتە یەکێتی لە تێکۆشاندا، یەکڕیز و کۆدەنگە بۆ بەرەنگاربوونەوەی تەحەددیاتی ناوخۆیی - ناوخۆیی هەرێمی و عیراقی. فرەیی لە بیرکردنەوەدا، واتا بۆچوونە جیاوازەکان بوونەتە سەرچاوەی ئیلهام و داهێنان. هارمۆنی لە ملمانێدا، کێبڕکێی ناوخۆیی بووتە میکانیزمی باشترکردن.
ڕکابەرەکەم تەنها هەر خۆمم، دەستهەڵگرتنە لە گلەیی و دەستبردنە بە چاکسازی ڕیشەیی، لە کۆن و کێبڕکێی کلاسیکیدا، براوە و دۆڕاو هەبوو. بەڵام لە کێبڕکێ لەگەڵ خۆتدا، ئەوەی هەیە تەنها سەرکەوتنە و هەر پێشکەوتنێک پێشکەوتنی گشتییە. ئەمە مۆدێلێکی نوێی سەرکەوتنێکە بریتییە لە باشتربوون - باشتربوون نەک لە کەسێکی تر باشتر بوون لە ئێستای خۆت، چونکە هیچ هێزێک هێشتا نەیتوانیووە لە یەکێتی باشتر بێت تا یەکێتی ئەمڕۆ بییەوێ لەو باشتر بێت.
لە توێژینەوە نوێیەکانی دەروونناسیدا، دەرکەوتووە ئەوانەی لەگەڵ خۆیاندا دەکەونە کێبڕکێ، ٢٣٪ زیاتر گەشە دەکەن لە توانا پیشەییەکانیاندا، ٤٥٪ کەمتر تووشی دڵەڕاوکێ دەبن، ٦٧٪ زیاتر ڕازین لە ژیانیان. چونکە لە کێبڕکێ لەگەڵ خۆتدا کۆنتڕۆڵ بەدەستخۆتەوەیە، پێوەرەکان ڕوونن و پێشکەوتن پێوانەکراوە. ژاپۆنییەکان کۆنسێپتێکیان هەیە بە ناوی کایزن واتە باشترکردنی بەردەوام. ئەم فەلسەفەیە تەواو لەگەڵ بیرۆکەی ڕکابەری خۆمان خۆمانین دەگونجێت. پرەنسیپەکانی کایزن هەر ڕۆژێک ١٪ باشتربە، گەورەترین دوژمن وەک خودی ئەمڕۆبوونی خۆتە، باشترین هاوڕێش خودی سبەینێی خۆتە.
کاتێک سەرۆک بافڵ جەلال تاڵەبانی دروشمی هێزی تۆین لە بەغداد بەرز دەکاتەوە، ئەمە تەنها بەڵێنی هەڵبژاردن نییە، بەڵکوو درێژەپێدانی هەمان فەلسەفەی خودڕکابەرییە. چۆن؟ کاتێ یەکێتی لەگەڵ خۆی دەکەوێتە کێبڕکێووە بۆ باشتر پێشکەشکردن، ئەوا دەنگدەر دەبێتە سەنتەر و براوەکە خودی دەنگدەر خۆیەتی، هێزی تۆین واتە ئەو هێزەی لە بەغداد نوێنەرایەتیت دەکات، لە ناوەوەی خۆتەوە سەرچاوە دەگرێت - لە متمانەت، لە دەنگت، لە بڕوابوونت بە داهاتوو.
ژمارەی ٢٢٢ تەنها ژمارەیەکی لیست نییە. سێ دوو پاڵپشتی یەکترن، وەک سێ ستوونی بناغەی یەکێتی، ڕابردووی پڕ ئەزموون، ئێستای بەهێز و داهاتووی گەش. هەر دوویەک نوێنەرایەتییەک دەکات و یەکتری تەواو دەکەن - خۆناسین و خزمەت، بەرپرسیارێتی و بەڵێن، خودڕکابەری و هاوکاری، لێرەوەیە دەنگدان بە لیستی ٢٢٢، تەنها دەنگدان نییە بە کاندیدێک، بەڵکوو بەشداری کردنییەتی لە فەلسەفەیەکی نوێی سیاسەتدا. فەلسەفەیەک تێیدا نوێنەر لە بەغداد نابێتە ئەوان بەرامبەر ئێمە، نا، نا بەڵکوو دەبێتە دەنگی ڕاستەقینەی خەڵک، چونکە لەگەڵ خۆی لە ڕکابەریدایە بۆ باشترین خزمەتگوزاری.
ڕکابەری یەکێتی هەر یەکێتییە نەک تەنها دروشمێکی سیاسی، بەڵکوو فەلسەفەیەکی ژیانە. فەلسەفەیەک دان بە کەموکوڕیدا دەنێت بەڵام نایانکاتە پاساو، هێز لە یەکگرتوویی وەردەگرێت بەڵام جیاوازی ڕەتناکاتەوە، ڕوو لە داهاتوو دەکات بەڵام لە بری ئاوڕدانەوە، فێر دەبێت لە ڕابردوو. لیستی ٢٢٢ تەنها لیستێکی هەڵبژاردن نییە، بەڵکوو دەستپێکی گۆڕانکارییەکە - گۆڕانکارییەک لە ناوەوەوە دەستپێدەکات، بەرەو بەغداد درێژ دەبێتەوە و دەگەڕێتەوە بۆ ماڵەکانمان بە شێوەی خزمەتگوزاری، دەستکەوت و ژیانێکی باشتر.
لە ڕۆژی هەڵبژاردندا، کاتێک دەچیتە سندوقەکان، بیر لەوە بکەرەوە: دەنگدان بە لیستی ٢٢٢ واتە دەنگدان بە فەلسەفەیەک دەڵێت من باشترینەکەی خۆمم، تۆش باشترینەکەی خۆتیت و پێکەوە دەتوانین کوردستانێکی باشتر دروست بکەین. سەرۆک بافڵ و تیمی یەکێتی ئامادەن بۆ ئێوە، لە پێناو ئێوە، لەگەڵ ئێوە. چونکە لە کۆتاییدا، هێزی ڕاستەقینەی لە بەغداد، هێزی تۆیە، هێزی ئێمەیە، هێزی خودڕکابەرییە – ئەو هێزەی هەموومان بەرەو باشتر دەبات.ڕکابەری لەگەڵ خۆتدا سەختترین جەنگە، بەڵام پاداشتەکەشی گەورەترینە - ئەویش گەیشتنە بە باشترینی خۆت لە پێناو خاک و خەڵکدا
ئەرسەلان مەحمود
لە تۆڕە کۆمەڵایەتیەکان شەیری بکە
