.

09:36 - 27/09/2023

پیرۆزبایی بۆ كاكە بافڵ و یەكێتییەكان
كوڕی شیرینم كاكە بافڵ سەرۆكی یەكێتی نیشتیمانیی كوردستان، لە قووڵایی دڵەوە پیرۆزبایی ئەم سەركەوتنە گەورەیەی حزبی شەهیدان لە كەسوكاری سەربەرزی شەهیدان و خودی جەنابی مام و تەواوی پێشمەرگە قارەمانەكان و زیندانیان و هەموو خەڵكی كوردستان و جەماوەری بەرفراوانی یەكێتی و تەواوی ئەندامان و لایەنگرانی یەكێتیی نیشتیمانیی كوردستان بەڕابەرایەتی جەنابتان، دەكەم.
سەركەوتنی كۆنگرەی یەكێتی لەناو ئاپۆرای ئامادەبوان و دەستلەسەردڵی خەڵكی كوردستان و یەكێتییەكان، مژدەیەكی گەورەیە بەرەو سەركەوتنی زیاتری ئەم حزبەی كە پەروەردەی قوتابخانەی سەرۆك مام جەلال-ە.
ئێوەی سەركردایەتی نوێ‌ و بەتایبەتی تۆی كوڕی شیرینم بەرپرسیارێتیەكی یەكجار گەورەتان خستووەتە ئەستۆی خۆتان، بەڵام دڵنیام بە بیری ورد و پلانی تۆكمە و خوێندنەوەی پێشهاتەكان، ئەركی خۆتان جێبەجێدەكەن و یەكێتیی قاڵبووی هەورازە سەخت و نشێوە دژوارەكان و كارەساتە خوێناوییەكان دەكەنەوە بەو یەكێتییەی كە جێی ئومێدی تەواوی خەڵكی كوردستان و نەتەوەی كورد دەبێت.
نامەوێت بەم پەیامە كورتە هەر پیرۆزبایی لە خۆت و هەڤاڵەكانت بكەم، بەڵكو دەمەوێت ئەوەت بیربهێنمەوە تۆ كوڕی ئەو مام جەلال-ەی كە بووەتە سیمبولی بیری ورد و قوتابخانەی كوردایەتی و (صەمام الامان)ی عیراق و كۆكەرەوەی دژەكان، نەك هەر لە ئاستی كوردستان و عیراق بەڵكو لە ناوچەكە و جیهانیشدا، بۆیە چاوەڕێی ئەوەتان لێدەكەم رێبازە پیرۆزەكەی مامی كوردان بەرنەدەن و هەموو توانایەكتان بخەنەگەڕ لەپێناو ئاشتی و ئاوەدانی و پێكەوەژیانی هەموو خەڵكی كوردستان بە هەموو حزب و پێكهاتە جیاكانیەوە.
دووبارە پیرۆزبایی سەركەوتنی كۆنگرەكەتان لێدەكەم و ئومێدەوارم لە ئاستی چاوەڕوانیی كەسوكاری سەربەرزی شەهیدان و كۆمەڵانی خەڵكی كوردستاندا بیت.

گەلاوێژ