کەناڵی ئاسمانی گەلی کوردستان

  Live

هەواڵەکان

لەوانەیە دوای ئێمە كاك رەزاق كەمینی بۆ ئەحمەد رازی دانابێت!!؟؟

.

12:10 - 24/01/2023

سوهاد خانەقینی

  من سهاد داود کە بە سوهاد خانەقینی ناسراوم لەکاتی ئەنفالەکاندا فەرماندەی کەرتی تیپی تایبەت بوم، دوای شەڕەکانی قەرەداخ و گەرمیان بە بڕیاری مەڵبەند کە کاک قادری حاجی عەلی بەرپرسی بو، شێخ جەعفەر بەرپرسی سەربازی بوو، كاك عومەر فەتاح بەرپرسی سیاسی بوو، هێزەکان لەقۆپی قەرەداخ کۆبوینەوە بەنیازی کشانەوە بەرەو سنوور، دوای دابەشکردنی هێزەکە بۆ چەند رەتڵێک بریاری بەرێکەوتن درا..
من بڕیاری مانەوەم دابوو، بە کاک قادرم راگەیاند کەئەمێنمەوە، وەک مەفرەزەی پارتیزان، هەتا بەپێکەنینەوە وتی خۆ تەسلیم نابیتەوە، ئەو ئەیزانی کە من بەهیچ شێوەیک ناتوانم ئەوە بکەم، چونکە بڕیاری کوشتنم هەبو لە حکومەتی عیراقەوە، سەد دیناری ئەوکاتەی دامێ و لە سەر پارچە كاغەزێك ناوی سێ ئامر سریەی جاش و موستەشارێکی نووسی و وتی لەکاتی پێویست پەیوەندییان پێوە بکەن بۆ هاوکاری، ئەوە ئەو لیستەیە کە کاک رەزاق بەهەڵە لێی گەیشتوە.
مەفرەزەکەمان بریتیبوو لە ماجد فەیلی کە ئەویش  فەرماندەی کەرت بوو، پ-م بەرزان، پ م فوئاد، پ م رەزاق شەریف و بەندە، لە بیرم نایەت کامیان پرسیاری کاغەزەکەی کرد؟
لە وەڵامدا وتم هیچ نیە ناوی کۆمەڵێك خۆفرۆشن.
من لێرەوە ناچمە ناو وردەکاری ئەو کاتە، چیمان کرد چیمان بەسەرهات و چۆن ژیاین، بەڵام رۆژ بەرۆژ قورس و قورستر ئەبوو لەبەر بێ ئازوقەیی و خواردن.
لەگەڵ ماجد رامان گۆڕیەوە، گەیشتینە ئەوەی بەرەو شار بڕۆین بۆ دروستکردنی پەیوەندیی، ئەگەر سەرکەوتوو بووین ئەوە باشەو ئەگەریش نا ئەوا هەوڵ ئەدەین بگەڕێینەوە لای هاوڕێیانمان.
لە گەرمیانەوە بۆ قەرەداخ لەقەرەداخەوە بۆ بناری شارەزوور، ئێوارەیەک خۆمان گەیاندە لای کاک جەلالی عەلی ئاغا، دەواجنی هەبو لە زڕگوێز، شۆربایەکی نیسک حازربوو، وتی مەعیدەتان گەرم کەن هەتا مریشکتان بۆئامادە ئەکەین،چەند مریشکێکی بۆ سوور کردینەوە و کردمانە کۆڵەپشتەکانمان و ئەوێشمان بەجێهێشت، بەنیازی چوونە ناوشار لەکەنەسورە نزیک جادەی شەست مەتری بووینەوەو خۆمان لەزینانی توتندا شاردەوە، هەتا خۆر هەڵهات، وردە وردە خەڵک ئەهاتن بۆ سەر زەرعات بە بێڵ و خاکەناسەوە، من و ماجدیش بەدووربین سەیرمان ئەکردن تا بزانین کەسێک ناسراوێک ببینین، بەرزان وتی ئەوە کاک زایەرە، کاک زایەری مەلا عەبدوڵا برای مەلا خالید کادری رێکخستن بوو، لەدوای مفاوەزات لەشار مابوویەوە، جێگای باوەڕ بوون، چونکە بنەماڵەكەیان پێشمەرگە بوون، بەرزانم نارد بۆلای، دووقۆڵی هاتنەوە، ئەوەی ویستمان باسمان کرد، ئێوارە درەنگ لەگەڵ مەڕو ماڵاتی ئابڵاخ خۆمان کرد بەناو شاری سلێمانیداو لێرەوە چیرۆکەکە دەست پێدەکات، لەماڵی مەلا خالیدی مەلا عەبدوڵا ماینەوە.

بۆ رۆژی دواتر رۆشتم بەدوای ئەوەی بزانم ئەو کەسانەی کاک قادر ناوەکانی پێدام، دەستم دەکەون؟؟ بەکەسێکی نزیك خۆم جوابم بۆناردن چۆن ئەتوانن هاوکاریمان بکەن و ئازووقەمان بۆ دابینبکەن، هیچیان نەچونە ژێر ئەو ئەرکەوە بۆیە بڕیاری رۆشتن بەرەو سنوورمان هەڵبژارد..
کۆبونەوەیەکمان سازکرد.. من پرسیاری ئەوەم لێکردن ئایا کەستان بەتەمای مانەوەن لەشار؟؟؟
 هەمو وەڵامیان نەخێر بوو، روم کردە کاک رەزاق و پێموت پێمباشە تۆ بمێنیتەوە، تۆ خوێنكاری زانکۆ بوویت و بگەڕیوە سەر خوێندن، ئێوە خێزانێکی بە ئیمکانیەتن، ئەمڕۆ بەپارە هەمو شتێک ئەکرێت، ماجد فەیلی و زایەر و برادەران هاوڕابوون لەگەڵ بۆچوونەكەم بەهەمومان قەناعەتمان پێکردو ئەم پەیامەمان نارد بۆ خێزانەکەیان، دایکی رەزاق (بەرەحمەت بێت) هات ودوای گفتوگۆ ئەوانیش پێان باشبوو، ئێمەش ئیشوکاری خۆمان لە رێی برادەرێکی حزبی دیموکرات کە زۆر خۆشەویستم بوو، بەناوی (پەروێز) ئێستا نیشتەجێی وڵاتی سویدە، جێبەجێکرد و بەئۆتۆمبێلی حزبی دیموكرات بەرەو قەندیلی بردین، ئیتر نازانم دوای ئێمە کاک رەزاق کەمینی بۆ ئەحمەد رازی دانا بێت!!!؟؟؟؟

لە تۆڕە کۆمەڵایەتیەکان شەیری بکە

GK Sat Frequencies

NileSat:V:11636 - 27500

سەرەوە