کەناڵی ئاسمانی گەلی کوردستان

  Live

هەواڵەکان

تاڵەبانی لەیاخسەمەرەوە داوای مافی چارەنوس‌و دەوڵەتی بۆ كورد دەكرد!

.

12:01 - 03/10/2022

تاڵەبانی لەیاخسەمەرەوە داوای مافی چارەنوس‌و دەوڵەتی بۆ كورد دەكرد!

كتێبی (أغد ودیمقراطی وحرمان شعب حتی من حق الحلم؟)كتێبێكی ناوازەی سەرۆک مام جەلاله ساڵی 1987لە گوندی یاخسەمەری ناوجەرگەی شۆڕشەوە نوسیویەتی، كەبەگرنگترین بەڵگەنامەی سیاسی سەركردەكی كورد دادەنرێت سەبارەت بەمافی كورد بۆ دیاریكردنی چارەنووسی سیاسیی بەوشێوازەی بەگونجاوی دەزانێت.
فەرید ئەسەسەرد، بەحوكمی ئەوەی لەكاتی چاپكردنی چاپی یەكەمی كتێبەكەدا لەراگەیاندنی یەكێتی بووە لەبەرگەڵو، ئاگاداری ماجەرا‌و وردەكاریی ئەو چاپەیە‌و زانیاریی زۆری لەوبارەیەوە هەیە.
ئەسەسەرد پێشەكییه‌كی جوان‌و پڕ زانیاری بۆ چاپی دووەم نوسیوە‌و لەو پێشەكییەدا تیشك دەخاتە سەر ناوەرۆكی كتێبەكەدا‌و لەپێنج لاپەڕەدا گەوهەری كتێبەكە بەخوێنەر دەناسێنێت، لەبەر بایەخی ئەو پێشەكییە‌و بۆ ناساندنی ئەم كتێبە گرنگە بەخوێنەرانی كورد بەپێویستم زانی بۆسەر زمانی كوردی وەریبگێڕم.

خەلیل عەبدوڵڵا

پێشەكی چاپی دووەم
فەرید ئەسەسەرد
سەرەتای هاوینی 1987 تاڵەبانی دەستی بەنوسینی ئەم كتێبە كرد‌و پێش كۆتایی ساڵ تەواوی كرد. واتە نوسینی كتێبەكە نزیكەی شەش مانگی لەكاتی تاڵەبانی گرت‌و لەسەرەتای ساڵی 1988دا دەرچوو.
پێویستە ئاماژە بەوە بكرێ‌، ئەم چاپە چاپی دووەمە، كە دوای 26 ساڵ لەدوای دەرچوونی چاپی یەكەم دەردەچێ، بۆ یەكەمجارە ناوی تاڵەبانی نووسەری لەسەر دادەنرێ، چونكە چاپی یەكەم ناوی نووسەری بەسەرەوە نەبوو.
دانانی ناوی نووسەر لەسەر كتێبەكە بەمانای ئاشكراكردنی هیچ نهێنییەك نایەت، چونكە تاڕادەیەك هەموان‌و بەتایبەت ئەوانەی كتێبەكە‌وناوەڕۆكەكەیان لامەبەست بوو، ناسنامەی دانەرەكەیان لا شاراوە نەبوو.
لەراستیدا هیچ هەوڵێك نەبوو بۆ شاردنەوەی ناسنامەی نووسەرەكە، بەڵام بۆچی تاڵەبانی ناوی خۆی وەك دانەر لەسەر كتێبەكە دانەنا؟ ئەوە بۆ ئەوە دەگەڕێتەوە كە لەو قۆناغە شۆڕشگێڕییەدا نەریتێكی نیمچە پەیڕەوكراو لەناو یەكێتیی نیشتمانیی كوردستاندا هەبوو كە ناوی دانەر فەرامۆش بكرێ‌.
دەكرێ‌ تێبینی ئەوە بكرێ‌ لەهەموو ژمارەكانی رۆژنامەكانی ئەلشەرارە‌و رێبازی نوێدا بەدەگمەن ئاماژە بەناوی نووسەری وتارەكان كراوە.
بەتەبیعەتی حاڵ ئەم نەریتە كتێب‌و ئەو وتارە درێژانەشی گرتۆتەوە كەبەشێوەی نامیلكە دەرچوون.لەباشترین حاڵەت‌و هەندێ‌ جار لەجیاتی ناوی دانەر ناوی خوازراو دانراوە. هەرچۆنێك بێ‌ تاڵەبانی‌و هەموو ئەوانەی بەرهەمەكانیان بەبێ‌ ناوی خۆیان بڵاوبۆتەوە، ئەو نێرجسیەتەیان نەبووە كە لەنێوان داهێنەراندا بەشێوەیەكی بەرفراوان هەبووە. لەسەردەمی شۆڕشگێڕیدا بەها شۆڕشگێڕییەكان دەگاتە دوورترین مەودا‌و نێرجسییەت كەمترین دەركەوتنی نابێ‌.
كتێبەكە بەگشتی وەڵامی وتارێكی عەبدولئەئیمە ئەلئەنبارییە كەلەرۆژنامەی (الغد الدیمقراطی) بڵاوبوبۆوە، كەساڵح دگلەی ئەندامی حزبی شیوعی عیراق سەرنووسەری بوو.
بۆئەوەی خوێنەر ئاگاداری بابەتەكە بێ‌، چیرۆكەكە لەسەرەتاوە دەگێڕینەوە. ئایاری 1987 بەڕێز نەوشیروان مستەفا جێگری سكرتێری گشتیی یەكێتیی نیشتمانیی كوردستان سەرۆكایەتی وەفدێكی كرد بۆ بەشداریكردن لەكۆنگرەی حزبی سۆشیالیستی فەرەنسا. بەپێی گێڕانەوەی رەسمیی یەكێتیی نیشتمانیی كوردستان لەپەراوێزی كۆنگرەكەدا گفتوگۆ كرابوو سەبارەت بە مەسەلەی كورد‌و پاشەڕۆژی عیراق‌و ئەگەرەكانی ئایندە‌و بەتایبەت كە جەنگی عیراق –ئێران پێی نابووە ساڵی حەوتەمی‌و خۆرئاوا زۆر نیگەران بوون لەئەگەری شكستهێنانی بەرگری عیراق‌و سەركەوتنی یەكجاری ئێران لەو جەنگەدا.
بەپێی گێڕانەوە رەسمییەكان، بەڕێز نەوشیروان لەگفتوگۆكانی پەراوێزی كۆنگرەكەدا تیشكی خستبووە سەر بابەتە گرنگەكان، پەیامنێری رۆژنامەی لۆمۆندی فەرەنسی كەلەوێ‌ بووە، هەندێ‌ وتەی بەڕێز نەوشیروانی وەرگرتبوو ‌و لەرۆژنامەكەیدا بڵاوی كردبۆوە.
16ی ئایار رۆژنامەی ئەلسەفیری لوبنانی لەرۆژنامەی لۆمۆندی فەرەنسییەوە هەندێ‌ لێدوان كەدرابوونە پاڵ بەڕێز نەوشیروان بڵاوكردەوە. داوای دابەشكردنی عیراق بۆ سێ‌ قەوارەی جیا‌و جەختكردن لەسەر مافی كوردەكان بۆ بوونی دەوڵەتی نەتەوەیی سەربەخۆی تایبەت بەخۆیان ، تێیدا زەق كرابۆوە.
رۆژی 18ی ئایارو دوای تەنها دوو رۆژ لەبڵاوكردنەوەی ئەو لێدوانەی لەرۆژنامەی ئەلسەفیر درابووە پاڵ بەڕێز نەوشیروان ، یەكێتیی نیشتمانیی كوردستان سەبارەت بەوەی كە لەلۆمۆند بڵاوكرابۆوە رونكردنەوەیەكی دەركرد‌ورایگەیاند ئەوە دەربڕی سیاسەتی یەكێتیی نیشتمانیی كوردستان نییەو پەیوەندی بەبەڕێز نەوشیروانەوە كراوە، وتویەتی هیچ لێدوانێكی نەداوە‌و هیچ پرسیارێكیشی لێنەكراوە تا وەڵامی بداتەوە، ئەوەی بڵاوكراوەتەوە شێواندنی ئەسڵی گفتوگۆكانی پەراوێزی كۆنگرەكەی حزبی سۆشیالیستی فەرەنسایە. دەقی رونكردنەوەكە بۆ زۆربەی رۆژنامەكان‌و لەناویاندا (الغد الدیمقراطی) نێردرا.
رۆژنامەی (الغد الدیمقراطی) دەقی رونكردنەوەكەی وەرگرتبوو، ئەوەشی جەخت لەوە دەكاتەوە ئەوەیە كە ئەو ژمارەیەی كە وتارەكەی تێدا بڵاوبۆتەوە دان بەوەرگرتنی رونكردنەوەكەدا دەنێت، بەڵام پاساوی بڵاونەكردنەوەی بەوە دەهێنێتەوە كە رۆژنامەكەدا لەژێر چاپدا بووە.
یەكێتیی نیشتمانیی كوردستان پێی وابووە مادام رونكردنەوە دەركرا، پێویست نەبوو ئەو وتارە بڵاو بكرێتەوە، دەرفەتی ئەوەش هەبوو بڵاوكردنەوەی وتارەكە هەڵبوەشێنرێتەوە، بەڵام رۆژنامەكە بەئەنقەست فەرامۆشی كردووە.
دەكرێ‌ پاساوەكەی (الغد الدیمقراطی) راست بێ‌، بەڵام ناوەرۆكی وتارەكە‌و شێوازی نوسینەكەی لەگەڵ زمانی سیاسەت كەدەبێ‌ زمانێكی راقی بێ‌، ناگونجێ‌ ، لەگەڵ گەوهەری ئازادیی رادەربڕینیش ناگونجێ‌، چونكە وشەی ناشیرینی تێدایە.
بەجنێودان بەبەڕێز نەوشیروان دڵی ئاوی نەخواردۆتەوە، بەڵكو هەندێ‌ وەسفی كردووە خودی بەڕێزتاڵەبانیشی گرتۆتەوە.تێزی ناوازەی لەچەشنی ستایشیكردنی مەلیك فەیسەڵی یەكەمی هاوكارى بەریتانییەكانی لەخۆگرتووە‌و بانگەشەی ئەوەی بۆ كردووە كە لەگەڵ پاراستنی یەكێتیی عیراق بووە، بەپێچەوانەوە شێخ مەحموودی حەفید شەڕی بەریتانیای كردووە‌و داوای سەربەخۆیی كوردستانی كردووە!
وتارەكە گاڵتەی بەهەوڵی كوردەكان بۆ بەدیهێنانی سەربەخۆیی كردووە‌و بەخەونی نەزۆكی داناوە‌و دەوڵەتی كوردیشی بەپڕۆژەیەكی كۆڵۆنیالیستی لەقەڵەم داوە.
لەراستیدا قسەكردن بەم زمانە لەسەر تێكۆشانی كورد تەنها لەلایەن (الغد الدیمقراطی)یەوە نەبوو، بەڵكو بڵاوكراوەكانی ترو لەناویاندا گۆڤاری(الحریە)ی بەرەی دیموكراتی رزگاری فەلەستینی بەسەرۆكایەتیی نایف حەواتمەشی گرتبۆوە.
بەڕێز تاڵەبانی وەڵامی وتارەكەی دایەوە‌و كاردانەوەكەی لەتوندترین كاردانەوەكان بوو، ئەو توندییە لەناوەڕۆكی ئەو وشانەوە هەست پێ‌ دەكەین كەلە وەڵامەكەیدا بەكاری هێناون. بەشێوەیەكی گشتی بەڕێزتاڵەبانی لەم كتێبەدا شێوازی جیاوازتری لەنوسینەكانی پێشووی بەكار هێناوە، شێوازەكەی لێرەدا تا ئەو پەڕی سنوور توندو زبرو یەكلاكەرەوەیە‌و لە شێوازی فلادیمیر ئیلیچ لینینی سەركردەی شۆڕشگێڕی روسی دەچێت.
بەڕێزتاڵەبانی لەكتێبەكەیدا بەرگرییەكی شكۆمەندانە لەمافی چارەنووسی كورد دەكات، ئەم كتێبە بەگەورەترین بەڵگەنامەی سیاسی دادەنرێت كەسەركردەیەكی سیاسی كورد پێشكەشی كردووە سەبارەت بەمافی كورد بۆ دیاریكردنی چارەنووسی سیاسیی بەو شێوازەی بەگونجاوی دەزانێت.
بەشی چوارەمی ئەم كتێبە بەزۆری تەرخانكراوە بۆ رونكردنەوەی هەڵوێستی فكریی ماركسیزم لەمافی چارەنووس، لێرەدا تاڵەبانی بەمەبەست تەركیزی كردۆتە سەر بەیانكردنی هەڵوێستی فكریی ماركسیزم لەمافی چارەنووس، لەبەرئەوەی لەجەنگە فكرییەكەیدا روبەڕووی كەسانێك بۆتەوە وای دەبینن كە ماركسیزم بەشدارە لەداڕشتنی شێوازی بیركردنەوەیان‌و دیاریكردنی بژاردەكانیان، بەوە تاڵەبانی بەهەمان چەكی ئایدۆلۆجى رووبەڕوویان دەبێتەوە‌و دەیانخاتە گۆشەیەكی تەسكەوە.
سەرەڕای ئەوەی كە تاڵەبانی بۆ پشتیوانی پاساوەكانی پشت بەوتە درێژەكانی ماركس‌و لینین دەبەستێ‌، تارادەیەكی زۆر سەركەوتوو بووە لەوەی كەخۆی بەدوور بگرێ‌ لەراڤەكردنی ماركسیزم. وەرگرتنەكانی لەو بابەتانەیە كەپشتیوانی بۆچوونەكانی دەكەن‌و ئەو تێڕوانینە دەخاتەروو كەبەرامبەرەكانی سەرەڕای ئەوەی كەبانگەشەی پابەندبوون بەماركسیزم دەكەن، كەچی لەراستیدا لەناوەڕۆكی مرۆڤدۆستانەی فەلسەفەكە، كەداوای نوێنەرایەتیكردنی دەكەن، لایانداوە.
لەم كتێبەدا بەڕێزتاڵەبانی لایەنە درەوەشاوەكانی لینییزم‌و بەدیاریكراوی دەستكەوتە فكری‌و تێزە ئاوێتەكانی گیانی مرۆڤدۆستانەی لەسەرباشترین‌و باڵاترین ئاست پێشكەش دەكات. لەدۆخیكی وادا تاڵەبانی دەچێتە سەنگەری لینینزمەوە هەتا بەرامبەرەكانی سەغڵەت بكات‌ولەچەكی فكری دایانبماڵێ‌‌و بەكردەوە بەبێ‌ چەك بەجێیان بهێڵێ‌.
بەڕێزتاڵەبانی یەكێتیی عیراق لەگەوهەردا بەكێتییەكی پاشكۆیەتی دەبینێ‌‌و لەچەند بابەتێكی بەشی پێنجەمدا بەتوندی ئیدانەی لكاندن‌و پاشكۆیەتی دەكات.
ئەو وایدەبینێ‌ كە كوردەكان مافی خۆیانە داوای هەڵوەشانەوەی یەكێتیی پاشكۆیەتیی زۆرە ملێ‌‌و گۆڕینی بەیەكێتییەكی ئارەزوومەندانە یاخوود جیابوونەوە بكەن، ئەگەر پێویستی كرد. ئەو زۆربەوردی تەعبیر لە ناوەڕۆكی مافی چارەنووس دەكات.
تاڵەبانی درێژە بەپرسی لكاندن دەدات‌و لەبەشی پێنجەمی كتێبەكەدا بەشێوەیەكی جوان‌و زانستی‌و بەرفراوان باسی ئەم مەسەلەیە دەكات.
لكاندن دیاردەیەكە حزبە شیوعییەكانی جیهانی عەرەبی‌و ئیران‌و توركیا لەخۆرهەڵاتی ناوەڕاستدا فەرامۆشیان كردووە. لەمیانەی بانگەشەكردنیدا بۆ مافی چارەنووس، تاڵەبانی تەركیز دەكاتە ژمارەك نموونە لەوانە نموونەی سویدی- نەرویجی‌و نموونەی پۆڵەندی‌و نموونەی بەریتانی – ئیرلەندی.
ئەفزەڵییەتی بەنموونەی سویدی- نەرویجی داوە، بەڵام نمونەی پۆڵەندای دابەشكراویشی هەڵسەنگاندووە بەهۆی ئەوەی كەخاڵی هاوبەش لەنێوان ئەوێ‌‌و كوردستانی دابەشكراودا هەیە. بارودۆخی مەسەلەی ئێرلەندای بەمەسەلەی كورد بەراورد كردووە، لەو گۆشەیەوە هەڵوێستی بەریتانیای لەمەسەلەی ئێرلەندادا بەهەڵوێستی نەتەوەپەرستە عەرەبەكان بەمەسەلەی كورد بەراورد كردووە.
بەڕێزتاڵەبانی لەوەڵامەكەیدا دەربڕینێك بەكار دەهێنێ‌ كە هەتا ئەو كاتە لەئەدەبیاتی سیاسیدا بەربڵاو نەبوو، ئەویش دەربڕینی شیوعییە عروبییەكانە، بەمانای دەركەوتنی نەوەیەك لەناو حزبی شیوعی عیراق‌و زۆربەی حزبە شیوعییە عەرەبییەكاندا كەكەوتبوونە ژێر كاریگەری بزووتنەوەی نەتەوەیی عەرەب‌و تێزەكانی، كە هەوڵی بەرتەسكردنەوەی مافی كەمینەكانی دەدا‌و زیادەرۆیی لەچەمكی نەتەوەدا دەكرد.
لەساڵانی دوای ئەوەی كەتاڵەبانی ئاماژەی بەدەركەوتنی نەوەیەكی عروبی لەناو حزبی شیوعی عیراقدا كردبوو، ململانێكان لەناو دوو باڵی ناو ئەو حزبەدا قووڵ بۆوە‌و هەردووكیان جەختیان لە پێوەری نەتەوەیی دەكردەوە. بەوەش ئەو تێزانە زەق بوونەوە كەلەگەڵ چەمكی ئینتەرناسیونالیدا نەدەگونجان‌و داوای لابردنی سەركردە كوردەكانی لەحزبی شیوعی دەكرد. بانگەشە بۆ تیۆرێكی نامۆ لەماركسیزم دەكرا‌و داوا دەكرا كە دەبێ‌ سەركردایەتیی حزبی شیوعی لەزۆرینەوە سەرچاوە بگرێ‌، مەبەست لەمەش ئەوەبوو سەركردایەتی لە كەمینەی كورد بسەنرێتەوە‌و بدرێت بەزۆرینەی عەرەبی!.
بەكردەوە گەوهەری ئەو تێزانەی بانگەشەی بۆ دەكرا بۆ ئەوەبوو كە دەسەڵات لەسكرتێری لیژنەی مەركەزی عەزیز محەمەد‌وئەندامانی دیكەی كوردی دەستڕۆیشتووی ناومەكتەبی سیاسیی حزبی شیوعی بسەننەوە.
لەئەنجام‌و لەبەرانبەر ئەوەدا نەوەیەك لەشیوعییە كوردەكان دەركەوتن داوای دامەزراندنی حزبی شیوعی كوردستانیان دەكرد، دواتر‌و لەسەرەتای نەوەدەكاندا كار گەیشتە ئەوەی كە چەند دابەشبوونێك لەناو حزبی شیوعی عیراقدا روویدا‌و حزبی شیوعی كوردستان‌و حزبی كاری سەربەخۆیی كوردستان دامەزران.
وتارە بڵاوكراوەكەی (الغد الدیمقراطی)، لەوكاتەدا كاریگەرییەكی گەورەی لەسەر پەیوەندییەكانی نێوان یەكێتیی نیشتمانیی كوردستان‌و حزبی شیوعی عیراق بەجێهێشت. یەكێتیی نیشتمانیی كوردستان پێشبینی ئەوەی دەكرد كە حزبی شیوعی عیراق دەستپێشخەری لەئیدانەكردنی وتارەكەدا بكات، بەڵام نەیكرد.
یەكێتیی نیشتمانیی كوردستان ئەو بێدەنگییەی بەنیشانەی رازیبوون دانا. لەرۆژی 19ی حوزەیرانی 1987دا، یەكێتیی نیشتمانیی كوردستان رێكەوتنی ئاساییكردنەوەی پەیوەندییەكانی لەگەڵ حزبی شیوعی عیراقدا هەڵپەسارد‌و بۆئەو مەبەستە یاداشتێكی نووسی‌و دەقەكەی نارد بۆ حزبی شیوعی عیراق‌و پارتی دیموكراتی كوردستان‌و حزبی سۆشیالیستی كوردستان‌و پاسۆك‌و پارتی گەلی دیموكراتی كوردستان. بەهۆی ئەوەوە پەیوەندییەكانی نێوان یەكێتیی نیشتمانیی كوردستان‌و حزبی شیوعی عیراق ساردییەكی نوێی بەخۆوە بینی‌و كارگەیشتە دەركەوتنی بێمتمانەیی لەنێوان هەردوولادا.
هیچ گومانی تێدا نییە كە شیوعییەكان لەژێر كاریكەری روداوەكانی جەنگی ئەهلیدا بوون، بەدیاریكراوی ئەو روداوانەی كەلەساڵی 1983 رویاندا‌و بووە هۆی ئەوەی كەحزبی شیوعی عیراق تاڕادەیەك هەموو بارەگاكانی لەهەردوو پارێزگای سلێمانی‌و هەولێر لەدەست بدات‌و ژمارەیەك لەسەركردە دەسترۆشتووەكانی بەدیلی بكەونە دەست پێشمەرگەكانی یەكێتیی نیشتمانیی كوردستان.
ئەوە روونە كە یادگارییەكانی شەڕ بەئازارن‌و بەئاسانی ناسڕێنەوە،زۆر كات كاریگەری گەورە لەسەر هەڵوێستە گشتی‌و كەسییەكان بەجێدەهێڵن.
سەرباری ئەوەی بەڵگەیەكی بەهێز نییە كە بڵاوكردنەوەی وتارەكە لە(الغد الدیمقراطی) بەرێنمایی مەركەزی بوبێ‌، بەڵام لەو كاتەدا لەناو یەكێتیی نیشتمانیی كوردستاندا وابڵاوكرایەوە كەبڵاوكردنەوەی وتارەكە بەرەزامەندیی مەرجەعە باڵاكان بووە بۆزراندنی ناوبانگی سەركردەكانی یەكێتیی نیشتمانیی كوردستان.
كتێبەكە لەچەند شوینێكدا ئاماژەی بەبوونی گاڵدەری پشتی پەردە‌و هاندانی بۆ جنێودان بەیەكێتیی نیشتمانیی كوردستان‌و سەركردەكانی كردووە.
بەچاوپۆشین لە بوون یاخود نەبوونی گاڵدەری پشتی پەردە، دەبوو یەكێتیی نیشتمانیی كوردستان بەلێبوردەییەكی زیاترەوە مامەڵەی لەگەڵ ئەو مەسەلەدا بكردایە.
ئەوە روونە كەیەكێتیی نیشتمانیی كوردستان لەگۆشەی ئازادی رادەبڕین‌و مافی جیاوازییەوە سەیری مەسەلەكەی نەكردووە. ئەگەر لەو گۆشەیەوە سەیری مەسەلەكەی بكردایە دەكرا كێشەكە ئاسانتر چارەسەر بكرایە. ئەم هەڵسەنگاندنە ئەوە رەتناكاتەوە كە وتارەكە تائەوپەڕی جوێنفرۆشی‌و ئیستفزازی بووە. بەڵام دەكرا بابەتەكە بەگشتی فەرامۆش بكرێ‌‌و وەڵامیش نەدرێتەوە.
بەتایبەت كە(الغد الدیمقراطی) رۆژنامەیەكی بەربڵاو نەبوو و بەزەحمەت دەگەیشتە دەستی خوێنەران‌و نووسەری وتارەكەش لەسەر ئاستێكی بەرین كەسێكی ناسراو نەبوو.
وتارەكە میزاجی توندی سروشتیی شیوعییە عیراقییەكانی خستەروو كەلەژێر كاریگەری رێڕەوی روداوەكانی جەنگی ئەهلیدا بوون. كاردانەوەكەش قورسی كۆنترۆڵكردنی هەڵوێستە توندەكانی هەندێ‌ جار لەناو یەكێتیی نیشتمانیی كوردستاندا دەرخست. بەهەر حاڵ دوای ساڵێك هەردوولا توانیان قەیرانەكە تێپەڕێنن. لەو كاتەدا كەهەردوولا پێكەوە بەشداریان كرد لە دامەزراندنی بەرەی كوردستانیدا. كەلەپاڵ یەكێتیی نیشتمانیی كوردستان‌و لقی كوردستانی حزبی شیوعی عیراق، هەریەك لە پارتی دیموكراتی كوردستان‌و حزبی سۆشیالیستی كوردستان‌و پاسۆك‌و حزبی گەلی دیموكراتی كوردستانی لەخۆگرتبوو.
نوێنەرانی ئەولایانانە لەدووی ئایاری 1988 رێكەوتننامەی دامەزراندنی بەرەی كوردستانیان لەدۆڵی خواكورك ئیمزا كرد. بەوەش كۆتایی بەو قەیرانە هات كەلەدوای بڵاوبوونەوەی وتارەكەی رۆژنامەی(الغد الدیمقراطی) دروست بوو.
چاپكردنەوەی ئەم كتێبە لەچوارچێوەی ئەو پرۆژەیە دێت كەئەكادیمیای هۆشیاری‌و پێگەیاندنی كادیران لە ساڵی 2010ەوە داینا، تایبەتە بەچاپكردنەوە‌و بڵاوكردنەوەی ئەرشیفی مێژوویی و كەلتووری تایبەت بەیەكێتیی نیشتمانیی كوردستان لەماوەی نێوان ساڵانی 1975-1991كە ماوەیەكی دەوڵەمەندی بەڵگەنامەكانە‌و شایستەی دیراسەكردنە.

لە تۆڕە کۆمەڵایەتیەکان شەیری بکە

GK Sat Frequencies

NileSat:V:11636 - 27500

سەرەوە