.

04:15 PM - 25/09/2022

لە خەمی چارەسەركردنی كێشەكاندا

حەسەن بێگەڵاسی

 

بافڵ تاڵەبانی سەرۆكی یەكێتی تا هەنووكە خەمی گەورەی بۆ چارەسەركردنی كێشەكانی تاك و ئاڵەنگارییەكانی هاونیشتمانییانە، خەمی پێگەیاندی نەوەیەكی تەندروست و زانستدۆست و ژیاندۆست و مرۆڤدۆستە بۆ كۆمەڵگەكەی.

وەكو سەركردە و كارەكتەری سەدەی بیست و یەك تاكە بژاردە و سەرمایەی ئەو بەرجەستەكردنی ژیانێكی خۆشتر و ئاسوودە و بەختەوەرییە بۆ تاك، رۆژ بە رۆژ كۆشش توانا و هێز و كردار و جووڵەكانی لە برەودایە.

 سەركردەیەك پەیوەندییە دیپلۆماسییەكانی چ لە ناوخۆ و چ لە دەرەوە هێدی هێدی فراوانتر و گشتگیرتر و پڕشنگدارتر دەبن، خەمی ئەو سەركردەیە چارەسەركردنی كێشەكانی خوێندكاران و كەمی دەرمان بۆ نەخۆشخانەكان و پێداویستیەكانی ژیانی هاووڵاتییانە و بنبڕكردنی گەندەڵی و چارەسەركردنی قۆرخكاری بازاڕ و نۆژەنكردنەوەی داخیلیەكانی زانكۆ و پەیمانگاكان و دابینكردنی هاوكارییە بۆ خوێندكاران.

 ئەو لە هەوڵی ئاوەدانكردنەوەی زیاتری گوند و خزمەتكردن و جوانكردنی شار و شارۆچكەكان و پشتیوانیی چینی هەژار و كەمدەرامەتەكان و ژینگە پارێزان و خزمەتكردنی زیاتری كەسوكاری سەربەرزی شەهیدان و كەمئەندامانی سەنگەر و زیندانییانی سیاسی و پێشمەرگە قارەمانەكانە و بەدەنگەوە چوونی كێشەی وەرزشكارانە.

 لەم سۆنگەیەوە ئەو سەركردەیە بۆتە داینەمۆی كۆمەڵگە و فریادڕەسی هەر چوار پارچەی كوردستان، خەمی ئەو رزگاركردنی كۆمەڵگەیە لە عەقڵیەتی باوك سالاری و تاكڕەوی و توندوتیژی و نادادی كۆمەڵایەتی و ئابووری و سیاسییە.

دەیەوێت تاك بگات بە ئامانج و خواستەكانی خۆی و دروستبوونی زەمینەیەكی لێوان لێو لە جوانی و یەكتر قبوڵكردن و بەختەوەری و خۆشگوزەرانی و ئازادیی، كە تێیدا كەرامەت و شكۆی تاك و كۆمەڵگە پارێزراوبێت. كردارەكانی ئەو شانازییە سەروەرییە وەفایە تۆماركردنی مێژووە بۆ میللەت و بەكردار لە ئەرزی واقیعدا سەلماندی كە تاكە مەرجەع و خەمخۆر و فریادڕەسی تاك و كۆمەڵگەیە.