.
11:45 AM - 23/06/2022
بەشێوەیەكی رەسمی یانەی بایرن میونشنی ئەڵمانی گرێبەستی لەگەڵ سادیۆ مانی سەنیگالی و هێرشبەری یانەی لیڤەرپوڵی ئینگلیزی ئیمزاكرد، یانەی پاڵەوانی بۆندس لیگای ئەڵمانی لەبەیاننامەیەكی رەسمی لەرێگەی پێگەی خۆی ئیمزاكردنی گرێبەستی لەگەڵ سادیۆ مانی بۆ ماوەی 3 وەرز و تاهاوینی ساڵی 2025 بڵاوكردەوە، ئەو هێرشبەرە سەنیگالییە دوێنێ سێ شەممە گەیشتە وڵاتی ئەڵمانیا بۆ ئەنجامدانی پشكنینی پزیشكی لەیانەی بایرن میونشن و بەسەركەوتویی پشكنینەكانی تێپەراند پێش ئەوەی بەئامادەبوونی ئۆ لیڤەر كان بەرێوەبەری جێبەجێكار و حەسەن صاڵح حەمیدیچ بەرێوەبەری وەرزشی ئیمزا لەسەر گرێبەستەكەی پاڵەوانی ئەڵمانیا بكات، بەوەش مانی تەمەن 30 ساڵ كۆتایی بەو كاروانە هێنا كە بەدرێسی یانەی لیڤەرپوڵ و لەیاریگای ئانفیڵد لەساڵی 2016 وە دەستی پێكردبوو و لەگەڵیدا توانی نازناوی ناوخۆیی و ئەوروپی و جیهانی بەدەستبهێنێت و وەرزی رابردووش پلەی دووەمی پریمەرلیگ و خولی یانەپاڵەوانەكانی ئەوروپای بەدەستهێنا.
گرێبەستی گواستنەوەی مانی بۆ بایرن میونشن كە لەبەرامبەر 35.1 ملیۆن یۆرۆ یەكلایی كرایەوە لەدوای گفتوگۆیەكی چڕ و دورودرێژ هات كە لەدوای كۆتایی هاتنی وەرزی رابردوو دەستیپێكرد، ئەمە جگە لەوەی لەكاتێكدابوو كە هەواڵەكان باس لەنزیكبوونەوەی رۆبەرت لیڤاندۆڤسكی هێرشبەری پۆڵندی دەكەن لە رۆیشتن لەریزەكانی بایرن میونشن و پەیوەندیكردن بەیانەی بەرشەلۆنە.
لە تۆڕە کۆمەڵایەتیەکان شەیری بکە
