کەناڵی ئاسمانی گەلی کوردستان

  Live

هەواڵەکان

هەرێم و ئارامیی سیاسیی

.

02:41 - 13/07/2021

ئاری عەبدولەتیف


چەتری هەموو ئارامیی و ئاشتییەكی كۆمەڵایەتیی و ئاسودەیی خەڵك و پێكەوەهەڵكردن و ژیانكردنێكی شایستە، (ئارامیی سیاسیی)یە بۆ هەر وڵات و نەتەوەیەك.

(ئارامیی سیاسیی)، هیچ شتێك لە پێشییەوە نییە، مەگەر (ئایین) نەبێت، مەگەر ئایین وەك چەمك و پرەنسیپ و تەشریع، ئارامیی هێنابێت بۆ تاك و خەڵك و كۆمەڵگە.
هیچ فەوزەوییەت و ململانێیەكی سیاسیی و حیزبیی، دڵخۆشكەر نییە، لە هەر كوێرە گەڕەك و گوندێكی هەرێمی كوردستاندا، یەك فیشەك بتەقێت، مایەی نیگەرانیی و شڵەژانی دەروونییە، لە هەر سێكتەر و وەزارەتێكدا، خاڵێكی ڕەشی فەسادی كارگێڕیی بوونی هەبێت، كۆی پرۆسەی حكومڕانیی دەخاتە ژێر پرسیار و هەڕەشەوە، لە سەرسنوور بۆمبێك بتەقێت، ناوجەرگەی شار ئەشڵەژێت، جومگەی هەر حیزبێك ئازاری تێبكەوێت، لەشی كۆمەڵگە موبتەلا دەبێت پێیەوە.

پەرلەمان تووشی هەوكردن بێت، خەڵك باجی موزاعەفات و ئیفرازات و ئازارەكەی دەدات، هەر كابینەیەك خەلەلی تێبكەوێت، دیسان هەر كۆمەڵگە ئەخاتە ڕەزالەت، سیستەمی حكوم و دەسەڵات پەیوەستە بە تاك و خانەوادە و كۆمەڵگە و نەتەوەوە، هەمیشە دوولایەنەیە، خەڵك و سیاسەت، یان دەسەڵات و حیزب لە لایەك و خەڵك و كۆمەڵگەش لە لایەك چارەنووسیان بەندە بە یەكەوە، لە هەرلا ناكۆكیی یان كێشە هەبوو، لاكەی تر پەلكێش دەكات، ئیتر لێرەدا دڵخۆشیی كوا، كە حاڵەتێكی تێكچڕژان و دووبەرەكیی و فەساد و گەندەڵیی ڕوودادەت، كامەیە ئارامیی و ئاسودەیی تاك و كۆمەڵگە؟

دەبێت هەموو لایەك ئەو ڕاستییە بزانن، فەوزەوییەت و هەیەجانی ناكۆكیی، ژیانی تێدا نییە، كەس دڵ بەوە خۆش نەكات فڵان شار نائارامە و ئەوی دی ئارام، یان فیسار حیزب كێشەدارە و ئەویتر ساف و بێ گرێ، دواجار هەموومان لە كەشتییەكداین و كون لە هەر پارچەیەكی بكەوێت، تەواوی سەرنشینان نغرۆ دەبن، كورد یەك پاكێجە، شوعییەك بمرێت ئیسلامییەك دەبێت كفن و دفنی بكات، ڕاستڕەوێك تووشی پێكدادانی ئۆتۆمبێل بێت، نەتەوەییەك یان چەپێك لە تەوارییەكە دەبینرێت، ئەمە سەرباری شڵەژانی شەقام و سۆشیالمێدیا لە هەموو ڕوویەكەوە دەربارەی هەر حادیسە و حاڵەتێكی نامۆ و ئازارهێن.

بۆیە دەبێت هەموومان لە خەمی یەكپارچەیی و گیان و ژیانی یەكتریدا بین، دەبێت شكۆی (ئارامیی سیاسیی) بپارێزین، مادەم لە ڕۆژهەڵاتدا دەژین و كۆمەڵگەكەمان فرەیی و پلوڕالیزم و حیزبییە، دەبێت مودارا بكەین و هەڵبكەین لەگەڵی، كاری ئێمە دەبێت هێوركردنەوە و ساڕێژ بێت نەك دنەدان و ئاگری فیتنەخۆشكردن، فیتنە حوشترێكە خەوتووە، نەفرەت لەوەی خەبەری دەكاتەوە، كە هەستا هەموومان دەشێلێت، وانەزانین پریشی ئاگر بەرمان ناكەوێت، هیچ ئاگرەسوورەیەك لە هیچ كەس دوور نییە، بۆیە دەهۆڵكوتین بۆ نائارامیی حیزبیی و سیاسیی و حكومیی و هەر ئاژاوەگێڕییەكی تر، باجی قورسی دەبێت، بە تایبەت بۆ ئەو كەس و لایەنانەشی كە تەنانەت تەرەفیش نین، چونكە دواجار كورد لە باڵۆنێكدایە و بە حەواوەین و هێشتا سەروەریی و سیادە و خاوەن دەستوور و پارێزبەندیی نێودەوڵەتیی و سیستەمی دژەتەنی نامۆ و ڕوخێنەر نین.

لە تۆڕە کۆمەڵایەتیەکان شەیری بکە

GK Sat Frequencies

NileSat:V:11636 - 27500

سەرەوە