.

05:01 PM - 12/05/2021

پەیامی پیرۆزبایی لێپرسراوی مەڵبەندی دهۆك بەبۆنەی هاتنەوەی جەژنی رەمەزان

خێزان و ماڵباتێن ب روومەتێن شەهیدان
پێشمەرگەهێن خۆڕاگر
خەلکێ دەڤەرا بادینان

بناڤێ گشت جێگر و کارگێڕ و کادرێن ئێکەتی نیشتیمانی کوردستان دسنورێ مەڵبەندێ چواردا جەژنا رەمەزانێ لهەوە پیرۆز دکەین، ژ خودایێ مەزن و دلۆڤان هیڤیخوازین ڕۆژی و عیبادەتێ هەوە یێ مەها ڕەمەزانێ قەبوول بکەت و بکەتە مایێ خێر و بەرەکەتێ بۆ سەرجەم پێکهاتێن ئولی و نەتەوی و مەسەبی لهەرێما کوردستانێ، خودایێ پاک و دلۆڤان شادی و بەختەوەری و خۆشگۆزەرانیێ بکەتە بەهرا گەل و وەڵاتێ مە.
حزب و لایەنێن سیاسیێن کوردستانی
د ڤێ قۆناغێدا، هەرێما کوردستانێ و بتایبەتی دەڤەرا بادینان کەتییە بەر هێڕشێن داگیرکاریێن لەشکەرێ تورکیا، هێشتا چارەسەرییا چەندین کێشە و گرفتان دگەل بەغدا مایینە هەلاویستی، ژیان و ژیارا خەلکی لژێر فشارێن هەمەجۆر ماییە، مافێن گشتی و ئازادیێن تاکە کەسی و ڕادەربڕینێ دهێنە سەرکۆتکرن، لەوڕا دەم دخوازیت مل بمل بەرهنگاری ڤان قەبخوازیان ببین، هەموو هەوڵێن مە پێحەمەت ئاشتبوونا کۆمەڵایەتی و بەرجەستەکرنا ماف و ئازادیان بهێنە مەزاختن، ژبەرکو بێی هەبوونا ڤان تێگەهان، جەژنێ بهایێن خۆیێن پیرۆز نامینن.
بهەلکەفتا جەژنا رەمەزانێ، دووپات دکەین ئێکەتی نیشتیمانی کوردستان وەکو نەریتەکێ خۆیێ هەمیشەیی دەستپێشخەرە بۆ پێکڤە کارکرنێ و خەباتا هەڤپشک ژبۆ مسوگەرکرنا ماف و داخوازیێن خەلکێ قوربانیدەر و هێژای خزمەتێ، و پاراستنا ئەزمۆنا هەرێمێ ژهەر گەف و داگیرکاریەکێ و دابینکرنا ئازادی و ئارامی و خۆشگۆزەرانیێ بۆ سەرجەم پێکهاتێن کۆمەڵایەتی.
دووبارە جەژن لهەموو لایەکی پیرۆز بیت
هەموو ڕۆژێن هەوە جەژن و خوشی و شادی بن

ئاراس محەمەد ئاغا
ئەندامێ جڤاتا سەرکردایەتییا ئێکەتی نیشتیمانی کوردستان
بەرپرسێ مەڵبەندێ چوارێ دهوک