کەناڵی ئاسمانی گەلی کوردستان

  Live

هەواڵەکان

مەکتەبی راگەیاندن : تاسەر پابەندی دروشمی نان و ئازادی دەبین

.

04:26 - 03/05/2021

بەبۆنەی رۆژی جیهانی ئازادیی رۆژنامەگەریی، مەكتەبی راگەیاندنی یەكێتیی نیشتمانیی كوردستان وێڕای پیرۆزبایی لە رۆژنامەنووسان و میدیاكارانی كوردستان تەئكید لە پێویستی فەراهەمكردنی ئازادی بۆ كاری رۆژنامەوانی دەكاتەوە كە پایەیەكی گرنگی بەرەوپێشچوون و پەرەپێدانی میدیا و رۆڵگێڕانی كایەی رۆژنامەگەرییە لە كۆمەڵگەدا ، كە لە مێژە یەكێتیی نیشتمانیی كوردستان (نان و ئازادیی) كردۆتە پرانسیپی نەگۆڕی خۆی و پشتیوانییەكانی سەرۆك مام جەلال-یش بۆ رۆژنامەنووسان و نووسەران لەو بوارەدا پرشنگدارە.
ماوەی سێ دەیە یە نەتەوەیەكگرتووەكان لەسەر راسپاردەی رێكخراوی یونسكۆ 3ی ئایاری هەموو ساڵێكی بە رۆژی ئازادیی رۆژنامەگەریی لە جیهاندا ناساندووە و یادی دەكاتەوە، بۆ ئەمساڵیش كە دروشمی "زانیاری بۆ سوودی گشتی" بۆ یادكردنەوەكە دەستنیشانكردووە، جێی خۆیەتی پێداگری بكەینەوە لەسەر دەستڕاگەیشتنی رۆژنامەنووسانی كوردستان بە زانیاری و سەرچاوەكانی بەبێ جیاوازی، كە ئەوەش بە كۆڵەگەیەكی سەرەكی فەراهەمبوونی میدیایەكی بەتوانا و شەفاف و دوانەكەوتووە لە كاروانی خێرای رۆژنامەگەریی دادەنرێت، لەو پێناوەشدا پشتیوانی خواست و پێویستی هەموو رۆژنامەنووسێكی بە ویژدان و میدیایەكی سەنگین و پابەند دەكەین و كاریشی بۆ دەكەین.
بەئومێدی چارەسەركردنی هەموو ئەو ئاستەنگانەی لە رابردوودا هاتوونەتە رێی ئازادی و سەربەخۆیی و هەمەرەنگی رۆژنامەگەریی، هاوشانیش پانیایی ئازادیی و رەخنەگرتن بەرتەسك نەكرێتەوە و لە جێی بەندكردنی رۆژنامەنووسان مامەڵەی یاسایی و هاوچەرخیان لەگەڵ بكرێت، میدیاش رێز و شكۆی دەسەڵاتی چوارەمی بپارێزێت و بەرپرسیارانە مامەڵە بكات و رۆڵی سەرەكی لە چاودێریكردنی جومگەكانی دەسەڵات و حومكڕانی بگێرێت.
لەم یادەدا درود دەنێرین بۆ هەموو ئەو رۆژنامەنووسانەی لەپێناو ئەركی پیرۆزیاندا گیانیان بەخت كردووە.

مەكتەبی راگەیاندنی
یەكێتیی نیشتمانیی كوردستان
3ی ئایاری 2021

لە تۆڕە کۆمەڵایەتیەکان شەیری بکە

GK Sat Frequencies

NileSat:V:11636 - 27500

سەرەوە