کەناڵی ئاسمانی گەلی کوردستان

  Live

هەواڵەکان

بە دەستووری کوردەوارییەوە ھەرچۆنێک بێت ، رۆژنامەنووسان ، پیرۆزە

.

11:20 - 22/04/2021

بە دەستووری کوردەوارییەوە
ھەرچۆنێک بێت ، رۆژنامەنووسان ، پیرۆزە
ستران عەبدوڵلا

دەترسم وردە وردە لە كەمبوونەوە و کاڵبوونەوەی یادی رۆژنامەنووسیمان نزیك ببینەوە. ئەگەر وا بڕوا ساڵانی داهاتوو هیچ شەوق ‌و زەوقێكمان نەبێ كە یادی یەكەم حەرفی چاپكراوی خەبەرییمان بكەینەوە.

خۆی وا چەند ساڵێكە باومان نەماوە ‌و رزقەكەمان خەریکە لە كزی ئەدات. لەجێی ئەوەی کەمێک بە توڕەیی ئاوڕ لە دواوە بدەینەوە،  بەناوی ژیان ڕاوەستانی بۆ نییەوە، خەریكین هەروا دەیكێڵین.چاو لە توێژەكانی تر دەكەین، ئاخر كێ لە كوردەوایا  موراجەعەی خۆی كردۆتەوە تا ئێمە بیكەین؟

سەد پەڕاو و دۆسێمان بەسەردا كەڵەكە بووە، ئێستا خۆشمان وەك میهرەجانی فەنتازی هەڵە ‌و پەڵە،  هی تری دەخەینە سەر. زەمانی خۆی، بە گێڕانەوەی سەلامە موسا، رۆژنامەنووس وا عەدیم لشەئن بوو كە خەڵك كچیان  لە غەززەتەچی مارە نە ئەكرد. ئەوە رێك ئەوكاتە بوو كە حاجی قادری كۆیی بە گەشبینییەوە گوتبووی رۆژنامە قیمەت ‌و شەئن پەیدا دەكات.

ئێستا زەمەنێك دەگوزەرێنین ئەترسم وامان لێ بێت رۆژنامەنووسە پیاوەكان لە مەجلس ‌و كۆڕی یاران جێیان نەبێتەوە ‌و كچەكانیش قەیرە ببن. وام زەین دەكرد ئەم هەموو گەشە تەكنەلۆژییە كارەكانمان بۆ ئاسان بكات ‌و ئیتر بە كەمترین خەرجییەوە بەكار ‌و كردەوەی رۆژنامەنووسییەوە بدرەوشێینەوە. ئێستا وایە كە حیسابی ئەدمینی پەیجی پشتیوانانی فڵان ‌و فیساریشمان بۆ نەكرێت. جا خەتای بێ مروەتی رۆژگار ،یان خەتای گای بنە بێت، مردن هەریەكە ‌و روح كێشان تووشی هەموو روح لەبەرێك دەبێت.

وتمان قەینا سەرەتا شۆكە،  تا لەگەڵی ڕادێین. دەگێڕنەوە پرۆلیتاریا، كە بە وەسفەكەی مام جەلال، وەك ئێمە رەنجدەرە، ئەو هی بازوو ‌و ئێمەش هی بیر، لە پێشدا مەكینە ‌و ئامێرەكانی دەشكاند، لە ترسی ئەوەی ئاسنەکان ركابەری رزقی بن. تا شۆكی نامۆیی هەڵمژی ‌و ڕیزەكانی خۆی رێكخستەوە. وتمان رۆژنامەنووسیش كەمێك هێدمە دەبێت بەم ئاڵۆگۆڕی كاغەزی ‌و تەكنەلۆژیایە ‌و ئینجا دوایی خۆی مشتوماڵ دەكاتەوە، بۆ قۆناغێكی نوێ. ئاخر پێشتریش كە قەوان هات پیشەی شایەری باوی  نەما، كە رادیۆ هات پاڵی بە پێش خۆیەوە نا و تەلەفزیۆنیش بووە هەڕەشە لەسەر گشتییان. تا ئەمیش خۆشی بە هاتنی ئینتەرنێت یەکسەر لە تاقی گۆشەیەك سەغڵەتكرا. یانی شتی وا هەر هەبووە ‌و وەك دەشڵێن لە پیاو دەقەومێ. بەڵام حەیفەكە ئەوەیە ئەم تەكنەلۆژیایە هەر بە هەڕەشەی سەر كاغەزی نەماوەتەوە. خەریكە سەنعەتەكە وا رەزیل و سەفیل دەبێ بەرگدور ‌و كورتاندوور ، ئەهلی تەقەڵ ‌و ئەهلی چەقەڵیش تێدەپەڕێنێ ‌و تەقڵە بە هەمووان لێ دەدات.

مێژووی بەسەرھاتەکان  لە زمانی هێمنی موكریانییەوە، لە پێشەكی توحفەی موزەفەرییە، پێمان دەڵێت لە سەرەتای سەدەی بیست گرامافۆن هات، ئیتر توێژی شایەرەكان بێ جێگاو بێ رێمان، ماقوڵ چییە لە سەدەی بیست ‌و یەكدا پیشەی شایەری جێی رۆژنامەنووسی بگرێتەوە ؟!

مەعقول چییە هەزاران پەیج ‌و لایك ‌و شێر جێی پێگە‌و پرەستیجی ناو واقیع بگرێتەوە؟ خانەدانی ماڵی خۆمان بووین و ئێستا پیشەکەمان نانی کەسی پێ نادرێت .ئیشەكە پڕ بووە (لە عەبەسە ‌و تەوەلا ‌و ئیتر تەواو بووە بە مەلا). دونیای گریمانەی رۆژنامەنووسی وای لێهاتووە لە ژیانی رۆژانەدا شتێك دەگوزەرێ ‌و لە ژیانی دیوەخانی میلیشیاكانی «عەھدی دیموكراسیدا» لە رۆژگاری نانۆ دیموکراسییدا کە ھەووی دوکانی لاکۆڵانە  شتی تر وێنا دەكرێت. تەجرەبە مەعلانە و دەڵێ :كە قسە بە كۆكاكۆلا كرا مەرج نییە ئازادی بێت ، دەترسم بیبسی كۆلا سپۆنسەری كردبێ و دنەی دابێت.
سەیری مۆبایلەكانی دەستمان دەكەین بەو هەموو تقنیاتە جوانانەی دەستمانەوە كە ستۆدیۆ ‌و چاپخانە ‌و سینمایەكی گەڕۆكە، حەیفت پێی دێت كە ناتوانین خاسی وەبەر بهێنین.
بیری لێ دەكەیتەوە: مقداد مدحەت بەدرخان، بەو هەموو پاشازادەیی خۆیەوە، لە قاهیرە بۆ مەنفای ئەوروپا سەفا ‌و مەروای دەكرد تا شوێنێكی ئەمین ‌و ئومانی بۆ (كوردستان)ەكەی دەسیكەوێت. بیری لێ دەكەیتەوە پیرەمێرد بە سیدارەی فەیسڵی سەرییەوە ، بە تیكەیەك بابۆڵەی چەوری گیرفانییەوە، وەك جابی زەریبەی عوسمانلی ئابوونەی (ژین) ‌و ژیانی كۆدەكردەوە ‌و هەشبوون هەر لەم سلێمانییەی خۆمان لافوگەزافی ئابوونەداری لێ دەدا ‌و قەرز كوێریش بوون.

بیری لێ دەكەینەوە بەگ ‌و ئاغا ‌و باشبەكانێك نەبوو چاوی لە رۆژنامەی كوردی بێت ‌و موحتاجی دەستی داگیركەران ‌و بەو دوایەش ، كڵێسا ‌و باندەكانی «دیموكراسی خەواجە »نەبێت ‌و ئینجا بەراوردی دەكەین بە ئێستا كە هەموو شتێك هەرزانە ‌و هەموو شتێك بەردەستە، ئاخ دەکێشین و دڵی پڕ حەسرەت دەڵێ ئەی بۆ كاسبییەكە وا بێ نرخ و بێ رەواج بووە كە هەژار موكریانی بە زمانی خانییەوە دەڵێ:
(چ بكەم! كە گەلێ كەسادە بازاڕ
كووتاڵەكە باشە. نیمە كڕیار)

بۆچی ئەم گەشە مەزنەی تەكنەلۆژیا لەجێی ئەوەی ببێتە دەرفەت بۆتە هەڕەشە؟ بۆ ئەم مینبەرە گەورانە هەیە كەچی خەتیبەكان بوونەتە (میرابۆ)پیشە ‌و غۆبلز رەفتار؟

رۆژگارێك ساڵدانە ساڵدانە لە كۆڕ ‌و مەجلیسا خۆمان با دەدا، گوایە شتین، شت دەزانین ‌و شتمان پێ دەكرێ، دەمانگوت پیشەمان هونەر ‌و زانست، جەمالی سەنعەت ‌و جیمالی بە تەحەموولە. دەمانگوت سێ دەسەڵات هەیە، ئێمە چوارەمین . كەچی ئێستا وایە کەساس و لاتین ‌، دەور و دەسەڵاتمان نییە؟
جاران وا گەشاوە بووین گاڵتەمان بە دەسەڵاتەكانی تر دەكرد، دەمانگوت تەشریع و تەنفیزی و داد ئێوە بۆ نین ‌و بۆ لاوازن ‌و بۆ تێكەڵ وپیکەڵن ؟ ئێستا لە چەرخی فرەیی چانس ‌و فرەیی سەكۆدا بووینەتە میلیشیای  بەكرێ گیراوی ئەلكترۆنی كە جاران لە سوپای بابانا نالی پێی دەوتین؟:
ئەم تاقمە مومتازە كەوا خاسەیی شاهن
ئاشووبی دڵی مەملەكەت ‌و قەلبی سوپاهن  

تەبعەن بەم داخ ‌و خەفەتەوە کە باسی دەکەم  مانای ئەوە نییە من ئیكسیری چارەم پێیە، بۆیە جەژنەكەم لێ تاڵ كردن، بەڵكو نیەتی من ئەوەیە بێژم دەست لەسەر برینەکە دادەنێم و شتێک زۆریش نا، فەرقم پێكرد.

دە وەرن چارەیەكی لێ بكەین.
وەرن بۆنەی سەد ‌و قسوری یادەكەمان (  123 ساڵە) بكەینە دەرفەتی تێفكرینێك. تا ئەوە دەكەین ناچارم وەك عورفی كوردەواری بەم دەستووری جامانەی ھەولێرییەوە بێژم:

پیرۆزمان بێت،
پیرۆزتان بێت،
گەردنم ئازا بكەن ‌و پێكمانەوە بێت.

لە تۆڕە کۆمەڵایەتیەکان شەیری بکە

GK Sat Frequencies

NileSat:V:11636 - 27500

سەرەوە